ମୁମ୍ୱାଇ: ଏବେ ମହିଳା କ୍ରିକେଟରଙ୍କର ମଧ୍ୟ ଇଣ୍ଡିଆନ ପ୍ରିମିୟର ଲିଗ(ଆଇପିଏଲ) ହେବା ଉଚିତ । ଏହି ଟୁର୍ଣ୍ଣାମେଣ୍ଟ ପାଇଁ ଏହା ସବୁଠାରୁ ଉତ୍କୃଷ୍ଟ ସମୟ । ଭାରତୀୟ କ୍ରିକେଟ ବୋର୍ଡ(ବିସିସିଆଇ) ଏହା ବିଷୟରେ ଚିନ୍ତା କରିବା ଉଚିତ ବୋଲି ଭାରତୀୟ ମହିଳା ଦିନିକିଆ କ୍ରିକେଟ ଦଳର ଅଧିନାୟିକା ମିତାଲି ରାଜ କହିଛନ୍ତି ।
ମିତାଲି କହିଛନ୍ତି ଯେ କିଛି ବର୍ଷ ଆଗରୁ ଲୋକେ ମହିଳା କ୍ରିକେଟରଙ୍କୁ ଚିହ୍ନିନଥିଲେ । ଏହି ଖେଳ ବିଷୟରେ ଜାଣିନଥିଲେ । କିନ୍ତୁ ଗତବର୍ଷ ବିଶ୍ୱକପ ପରେ ଭାରତୀୟ ମହିଳା କ୍ରିକେଟରଙ୍କ ପରିଚୟ ବଦଳି ଯାଇଥିଲା । ଲୋକେ ସେମାନଙ୍କୁ ଭଲ ଭାବେ ଚିହ୍ନିଥିଲେ । ଏପରିକି ଅନେକ ଲୋକ ଜାଣିବାକୁ ଚେଷ୍ଟା କରିଥିଲେ ଯେ ଭାରତୀୟ ମହିଳା ଦଳ କଣ ଏବଂ ଏଥିରେ କିଏ କିଏ ଖେଳୁଛନ୍ତି । ଫଳରେ ବିଶ୍ୱ କ୍ରିକେଟରେ ଏମାନଙ୍କର ଏକ ନୂଆ ପରିଚୟ ସୃଷ୍ଟି ହୋଇଥିଲା ବୋଲି ସେ କହିଛନ୍ତି ।
ଏହାସହ ଏବେ ଆଇସିସି ମଧ୍ୟ ମହିଳା କ୍ରିକେଟକୁ ପ୍ରୋତ୍ସାହିତ କରିବା ପାଇଁ ନୂଆ ପଦକ୍ଷେପ ଆରମ୍ଭ କରିଛି । ମହିଳାଙ୍କୁ ଟ୍ୱେଣ୍ଟି20 ଖେଳରେ ଅଧିକ ସୁଯୋଗ ମିଳୁଛି । ତେଣୁ ବିସିସିଆଇକୁ ଏବେ ମହିଳା ଆଇପିଏଲ ବିଷୟରେ ଚିନ୍ତା କରିବାର ସମୟ ଆସିଯାଇଛି । ଏହାଦ୍ୱାରା ବିଶ୍ୱ ଦରବାରରେ ମହିଳା କ୍ରିକେଟକୁ ଏକ ନୂଆ ପରିଚୟ ମିଳିବ ବୋଲି ମିତାଲି କହିଛନ୍ତି ।
ବର୍ତ୍ତମାନ ଭାରତୀୟ ମହିଳା ଦଳ ଭ୍ରମଣକାରୀ ଇଂଲଣ୍ଡ ମହିଳା ଦଳ ବିପକ୍ଷରେ 3 ମ୍ୟାଚର ଦିନିକିଆ ସିରିଜ ଖେଳୁଛି । ଏଥିରେ ପ୍ରଥମ ମ୍ୟାଚକୁ ଏହା ସହଜରେ ଜିତିନେଇ ସିରିଜରେ 1-0ରେ ଆଗୁଆ ରହିଛି । ଉଲ୍ଲେଖଯୋଗ୍ୟ ଯେ ଗତବର୍ଷ ମହିଳା ବିଶ୍ୱକପରେ ଭାରତୀୟ ମହିଳା ଦଳ ଫାଇନାଲରେ ଇଂଲଣ୍ଡ ଠାରୁ ହାରିଯାଇଥିଲା ।
