ନୂଆଦିଲ୍ଲୀ: ଇଣ୍ଡିଆନ ପ୍ରିମିୟର ଲିଗ୍ର 14ତମ ସଂସ୍କରଣ ଏପ୍ରିଲ 9ରୁ ଆରମ୍ଭ ହେବ । ଡିଫେଣ୍ଡିଂ ଚମ୍ପିଆନ ମୁମ୍ବାଇ ଇଣ୍ଡିଆନ୍ସ ଓ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ମଧ୍ୟରେ ଏମଏ ଚିଦାମ୍ବର ଷ୍ଟାଡିୟମ, ଚେନ୍ନାଇରେ ଉଦ୍ଘାଟନୀ ମ୍ୟାଚ ଖେଳାଯିବା ନେଇ ସୂଚୀ ରହିଛି ।
ତେବେ ଉଦ୍ଘାଟନୀ ମ୍ୟାଚ ଦେଖିବାକୁ ଚିଠି ଲେଖି ସମସ୍ତ ସହଯୋଗୀ ରାଜ୍ୟ ବୋର୍ଡ ସଭାପତି ଓ ସମ୍ପାଦକଙ୍କୁ ନିମନ୍ତ୍ରଣ କରିଛନ୍ତି ବିସିସିଆଇ ସମ୍ପାଦକ ଜୟ ଶାହ ।
ମେଗା ଲିଗ୍ର ଗତ ସଂସ୍କରଣ ୟୁଏଇରେ ଖେଳାଯିବା ପରେ ଭାରତକୁ ଫେରିଥିବା ନେଇ ଉତ୍ସାହିତ ଥିବା କହିଛନ୍ତି ଜୟ ଶାହ । ସମସ୍ତ ରାଜ୍ୟ ବୋର୍ଡର ସଭାପତି ଓ ସମ୍ପାଦକଙ୍କ ଉପସ୍ଥିତି ସହ ଏକତ୍ର ଭାରତୀୟ କ୍ରିକେଟର ଉନ୍ନତି ପାଇଁ ବୈଠକ ହେବା ନେଇ ଆଶାବାଦୀ ଅଛନ୍ତି ବିସିସିଆଇ ସମ୍ପାଦକ ।
ଆଇପିଏଲ ମ୍ୟାଚ ଖେଳାଯିବାକୁ ସ୍ଥିର ହୋଇଥିବା ବିଭିନ୍ନ ଭେନ୍ୟୁରେ ସୁରକ୍ଷିତ ଜୈବ ସୁରକ୍ଷା ବଳୟରେ ଭାରତ ଆଇପିଏଲ ଟୁର୍ଣ୍ଣାମେଣ୍ଟ ସଫଳତାର ସହ ଆୟୋଜନ କରିବ ବୋଲି ଆଶାବାଦୀ ଅଛନ୍ତି ଶାହ । ଏଥିସହ ବର୍ଷର ଶେଷ ଭାଗରେ ଟି20 ବିଶ୍ବକପର ମଧ୍ୟ ସଫଳ ଆୟୋଜନ ନେଇ ବିଶ୍ବାସ ରହିଥିବା ସେ କହିଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
