ଶାରଜାହ: ଆଇପିଏଲର 9ମ ମ୍ୟାଚ କିଙ୍ଗ୍ସ ଇଲେଭେନ ପଞ୍ଜାବ ଓ ରାଜସ୍ଥାନ ରୟାଲ୍ସ ମଧ୍ୟରେ ଖେଳାଯାଉଛି । ମ୍ୟାଚରେ ପଞ୍ଜାବର ଦୁଇ ଓପନର କେଏଲ ରାହୁଲ ଓ ମୟଙ୍କ ଅଗ୍ରୱାଲ ଆଇପିଏଲ ଇତିହାସରେ ଦ୍ବିତୀୟ ସର୍ବାଧିକ ପାର୍ଟନରସିପ କରିଛନ୍ତି । ଉଭୟ ବ୍ୟାଟ୍ସମ୍ୟାନଙ୍କ ମଧ୍ୟରେ 183 ରନର ରେକର୍ଡ ପାର୍ଟନରସିପ ହୋଇଛି । ଏହା କିଙ୍ଗ୍ସ ଇଲେଭେନ ପଞ୍ଜାବ ପାଇଁ ସର୍ବାଧିକ ଓପନିଂ ପାର୍ଟନରସିପ ମଧ୍ୟ ହୋଇଛି ।
ମୟଙ୍କ ଅଗ୍ରୱାଲ 45 ବଲରୁ ନିଜର ଶତକ ପୂରଣ କରିଛନ୍ତି । ମୟଙ୍କ 50 ବଲରୁ 10 ଚୌକା ଓ 7 ଛକା ସହାୟତାରେ 106 ରନର ଦମଦାର ଶତକୀୟ ଇଂନିସ ଖେଳିଛନ୍ତି। ଏହା ଚଳିତ ଆଇପିଏଲର ଦ୍ବିତୀୟ ଶତକ । ଏଥିସହିତ ଚଳିତ ସଂସ୍କରଣରେ ଦ୍ବିତୀୟ କିଙ୍ଗ୍ସ ଇଲେଭେନ ବ୍ୟାଟ୍ସମ୍ୟାନ ଭାବେ ଶତକୀୟ ଇଂନିସ ଖେଳିଛନ୍ତି ମୟଙ୍କ । ରାହୁଲ ମଧ୍ୟ 54 ବଲରୁ 7 ଚୌକା ଓ ଗୋଟିଏ ଛକା ସହାୟତାରେ 69 ରନର ଇଂନିସ ଖେଳିଛନ୍ତି ।
ଆଇପିଏଲରେ ସର୍ବାଧିକ ଓପନିଂ ପାର୍ଟନରସିପର ରେକର୍ଡ ସନରାଇଜର୍ସ ହାଇଦ୍ରାବାଦର ଜନ୍ନି ବେୟାରଷ୍ଟୋ ଓ ଡେଭିଡୱାର୍ଣ୍ଣରଙ୍କ ନାମରେ ରହିଛି । ଉଭୟଙ୍କ ମଧ୍ୟରେ 185 ରନର ଦମଦାର ପାର୍ଟନରସିପ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ବିପକ୍ଷରେ ଗତ ସଂସ୍କରଣର ଆଇପିଏଲରେ ହୋଇଥିଲା ।
ତେବେ ଆରସିବିର ବିରାଟ କୋହଲି ଓ ଏବି ଡି ଭିଲିୟର୍ସମଧ୍ୟ ନାମରେ ସମସ୍ତ ୱିକେଟ ପାଇଁ ସର୍ବାଧିକ ପାର୍ଟନରସିପର ରେକର୍ଡ ରହିଛି । ଉଭୟଙ୍କ ମଧ୍ୟରେ 2016 ସଂସ୍କରଣ ଆଇପିଏଲରେ 229 ରନର ପାର୍ଟନରସିପ ହୋଇଥିଲା ।
ବ୍ୟୁରୋ ରିପୋର୍ଟ, ଇଟିଭି ଭାରତ
