ଚେନ୍ନାଇ: ଆଜି ମ୍ୟାଚ ନମ୍ବର 50ରେ ହେଉଛନ୍ତି ଦୁଇ ଟପ୍ପରଙ୍କ ମଧ୍ୟରେ ଟକ୍କର । ସିଏସକେ ଓ ଡିସି । ଏହି ଦୁଇ ଦଳ ପ୍ଲେ-ଅଫରେ ସାମିଲ ହୋଇସାରିଥିବା ବେଳେ ଆଜି ମ୍ୟାଚ ଔପଚାରିକ ହେବ । ମାତ୍ର ସିଜନ ଆରମ୍ଭରୁ ଟେବୁଲ ଟପ୍ପର ଥିବା ଚେନ୍ନାଇ ଆଜି ମ୍ୟାଚ ଜିତି ପୁଣିଥରେ ଟପ୍ ସ୍ପଟକୁ ବଜାୟ ରଖିବାକୁ ଚାହିଁବ । ସେହିପରି ନିଜର ଘରୋଇ ଗ୍ରାଉଣ୍ଡରେ ଚେନ୍ନାଇଠାରୁ ପାଇଥିବା ପରାଜୟର ପ୍ରତିଶୋଧ ନେବାକୁ ବି ଯୁବ ଦଳ ଦିଲ୍ଲୀ ପ୍ରସ୍ତୁତ । ଚେନ୍ନାଇର ଏମ. ଚିଦାମ୍ବରମ୍ ଷ୍ଟାଡିୟମରେ ଖେଳାଯିବ ଏହି ମ୍ୟାଚ ।
ମ୍ୟାଚ ପୂର୍ବରୁ ଚେପକ୍ ଗ୍ରାଉଣ୍ଡରେ ଦେଖା ଦେଇଛି ଏକ ମଜାଳିଆ ଦୃଶ୍ୟ । ଯୁବ ଦିଲ୍ଲୀ ଦଳର ୱିକେଟକିପର-ବ୍ୟାଟ୍ସମ୍ୟାନ ଋଷଭ ପନ୍ତ ଚେନ୍ନାଇର ବିଭିନ୍ନ ଖେଳାଳିଙ୍କୁ ଆଲିଙ୍ଗନ କରିବାରେ ଲାଗିଛନ୍ତି । ତେବେ ଏହି ସମୟର ଦୃଶ୍ୟକୁ ଫଟୋ ଉଠାଇ ଚେନ୍ନାଇ ସୁପର କିଙ୍ଗ୍ସ ନିଜ ଟ୍ବିଟର ଆକାଉଣ୍ଟରେ ପୋଷ୍ଟ କରିଛି ।
ଫଟୋରେ ଦେଖାଯାଇଛି ଯେ, ପନ୍ତ ସିନିୟର ସ୍ପିନର ହରଭଜନ ସିଂ, ସୁରେଶ ରାଇନା ଓ ଅମ୍ବାତି ରାୟୁଡୁଙ୍କୁ ଆଲିଙ୍ଗନ କରୁଛନ୍ତି ।
ତେବେ ଲଗାତାର ଧୋନିଙ୍କ ଅଣ୍ଟା ଯନ୍ତ୍ରଣା ପାଇଁ ଧୋନି ମ୍ୟାଚରୁ ବିଶ୍ରାମ ନେଉଛନ୍ତି । ସେହିପରି ଦଳର ଅଲରାଉଣ୍ଡର ରବୀନ୍ଦ୍ର ଜାଡେଜା ଅସୁସ୍ଥ ଥିବାରୁ ସେ ମଧ୍ୟ ମ୍ୟାଚ ଖେଳିପାରୁ ନାହାନ୍ତି । ତେଣୁ ଆଜି ଅଭ୍ୟାସ ସେସନରେ ଧୋନିଙ୍କୁ ପଡିଆରେ ଦେଖିବାକୁ ମିଳି ନଥିବାରୁ ବୋଧ ହୁଏ ଆଜି ମ୍ୟାଚରେ ମଧ୍ୟ ସେ ଉପସ୍ଥିତ ନ ରହିପାରନ୍ତି ।
