ଚେନ୍ନାଇ: ଭାରତ-ୱେଷ୍ଟଇଣ୍ଡିଜ ମଧ୍ୟରେ ଏମ ଏ ଚିଦାମ୍ବରମ ଷ୍ଟାଡିୟମରେ ପ୍ରଥମ ମ୍ୟାଚ ଖେଳାଯାଉଛି। ଆମନ୍ତ୍ରଣ ପାଇ ପ୍ରଥମ ବ୍ୟାଟିଂ କରିଥିଲା ଘରୋଇ ଭାରତ। ନିର୍ଧାରିତ 50 ଓଭରରେ 8 ୱିକେଟ ହରାଇ 287 ରନ ସଂଗ୍ରହ କରିଛି ବିରାଟ ବାହୀନି । ଫଳରେ ୱେଷ୍ଟଇଣ୍ଡିଜ ସାମ୍ନାରେ ବିଜୟ ଲକ୍ଷ୍ୟ 288 ରହିଛି ।
ଭାରତ ପକ୍ଷରୁ ୱିକେଟ କିପର ଋଷଭ ପନ୍ତ ସର୍ବାଧିକ 71 ରନର ଇଂନିସରେ ଖେଳିଛନ୍ତି । ଏହାପରେ ଶ୍ରେୟସ ଆୟର 70 ରନର ଅର୍ଦ୍ଧଶତକୀୟ ଇଂନିସ ଖେଳିଛନ୍ତି । ପନ୍ତ 69 ବଲରୁ 7 ଚୌକା ଓ 2 ଛକା ସହ ଦମଦାର 71 ରନର କରି ଆଉଟ ହୋଇଥିଲେ । ଶ୍ରେୟସ ଆୟର 88 ବଲରୁ 7 ଚକା ଓ ଗୋଟିଏ ଛକା ସହ 70 ରନ କରି ଆଉଟ ହୋଇଥିଲେ । ଉଭୟଙ୍କ ମଧ୍ୟରେ 114 ରନର ଶତକୀୟ ଭାଗିଦାରୀ ହୋଇଥିଲା । ଫଳରେ ଭାରତ ଏକ ଲଢୁଆ ସ୍କୋର କରିପାରିଛି ।
ନିୟମିତ ଓପନର ଶିଖର ଧାୱନଙ୍କ ଅନୁପସ୍ଥିତିରେ ରୋହିତ ଶର୍ମାଙ୍କ ସହ ଲୋକେଶ ରାହୁଲ ଓପନିଂ କରିଥିଲେ । ଭାରତର ସ୍କୋର 21 ଥିବାବେଳେ ରାହୁଲ ମାତ୍ର 6 ରନ କରି ଆଉଟ ହୋଇଥିଲେ । ଏହାପରେ କ୍ୟାପଟେନ କୋହଲି ମଧ୍ୟ ଶୀଘ୍ର ଆଉଟ ହୋଇଥିଲେ। ରୋହିତ ଶର୍ମାଙ୍କ ୱିକେଟ 80 ରନ ମଧ୍ୟରେ ହରାଇ ଭାରତ ସଂକଟରେ ପଡିଥିଲା । ଶିବମ ଦୁବେ ଭାରତ ପକ୍ଷରୁ ଦିନିକିଆ ଡେବ୍ୟୁ ମ୍ୟାଚରେ 9 ରନ କରି ଆଉଟ ହୋଇଛନ୍ତି ।
