ନୂଆଦିଲ୍ଲୀ: 20 ଅଗଷ୍ଟ ପରେ ସମସ୍ତ ଇଣ୍ଡିଆନ୍ ପ୍ରିମିୟର ଲିଗ୍ ଦଳ ସଂଯୁକ୍ତ ଆରବ ଏମିରେଟ୍ସ(ୟୁଏଇ)କୁ ଯାଇପାରିବେ ବୋଲି ବୋର୍ଡ ଅଫ୍ କଣ୍ଟ୍ରୋଲ୍ ଫର କ୍ରିକେଟ୍ ଇନ୍ ଇଣ୍ଡିଆ (ବିସିସିଆଇ) ରବିବାର ଫ୍ରାଞ୍ଚାଇଜମାନଙ୍କୁ କହିଛି ।
ଖବର ଅନୁଯାଇ,ଉଭୟ ଚେନ୍ନାଇ ସୁପର କିଙ୍ଗ୍ସ ଏବଂ ମୁମ୍ବାଇ ଇଣ୍ଡିଆନ୍ସ ଅଗଷ୍ଟ 10 କିମ୍ବା 12 ରେ ଆବୁଧାବି ଅଭିମୁଖେ ଯିବାକୁ ଯୋଜନା ରଖିଛନ୍ତି । କିନ୍ତୁ ସେମାନଙ୍କ ଯୋଜନାକୁ ବର୍ତ୍ତମାନ ସ୍ଥଗିତ ରଖିବାକୁ ପଡିବ ।
ଏକ ନ୍ୟୁଜ୍ ଏଜେନ୍ସି ସହ କଥାବାର୍ତ୍ତା କରି ଜଣେ ଫ୍ରାଞ୍ଚାଇଜ୍ ଅଧିକାରୀ କହିଛନ୍ତି ଯେ ଆଇପିଏଲ୍ ପରିଚାଳନା ପରିଷଦ ଏକ ମେଲ୍ ପଠାଇଛନ୍ତି ଯାହା ସ୍ପଷ୍ଟ ଭାବରେ କହିଛି ଯେ ଦଳମାନେ ଅଗଷ୍ଟ 20 ପୂର୍ବରୁ ୟୁଏଇ ଯାଇପାରିବେ ନାହିଁ ।
ଅଧିକାରୀ କହିଛନ୍ତି, "ଆଇପିଏଲ୍ ଜିସିର ଏକ ମେଲ୍ ଦ୍ବାରା ଆମକୁ ସୂଚନା ଦିଆଯାଇଛି ଯେ ଆମେ ଅଗଷ୍ଟ 20 ପରେ ୟୁଏଇ ଯାଇପାରିବା । ତେଣୁ ଏହା ପୂର୍ବରୁ ସେଠାକୁ ଯିବାର କୌଣସି ପ୍ରଶ୍ନ ନାହିଁ । "
ରବିବାର ଘରୋଇ କ୍ରିକେଟର ପୁନଃ ଆରମ୍ଭ ପାଇଁ ବିସିସିଆଇ ରାଜ୍ୟ ଆସୋସିଏସନକୁ ଷ୍ଟାଣ୍ଡାର୍ଡ ଅପରେଟିଂ ପ୍ରୋସିଡର୍ସ (SOP) ଜାରି କରିଥିବା ବେଳେ ଆଇପିଏଲ୍ ଦଳ ମଧ୍ୟ ଏହାକୁ ଆଶା କରୁଛନ୍ତି । କିନ୍ତୁ ସେମାନେ ସୋମବାର ଠାରୁ ଭିସା ପ୍ରକ୍ରିୟା ଆରମ୍ଭ କରୁଛନ୍ତି ।
