ଗୁଆନା: ଚତୁର୍ଥ ଟି-20କୁ 5 ରନରେ ଜିତିନେଇଛି ଭ୍ରମଣକାରୀ ଭାରତୀୟ ମହିଳା ଦଳ । ୱେଷ୍ଟଇଣ୍ଡିଜ ଗସ୍ତରେ ଥିବା ଭାରତୀୟ ମହିଳା ଦଳ ଭାରତୀୟ ସମୟ ସୋମବାର ମଧ୍ୟରାତ୍ରୀରେ ଖେଳାଯାଇଥିବା ମ୍ୟାଚରେ ବାଜିମାତ୍ କରିଛି। ଏହି ବିଜୟ ସହ 5ଟିକିଆ ମ୍ୟାଚ ବିଶିଷ୍ଟ ଏହି ସିରିଜରେ 4-0ରେ ଆଗୁଆ ରହିଛି।
ପ୍ରଥମେ ବ୍ୟାଟିଂ କରିଥିଲା ଭ୍ରମଣକାରୀ ଭାରତ । ବର୍ଷା ଯୋଗୁଁ ମ୍ୟାଚକୁ 9 ଓଭର ବିଶିଷ୍ଟ କରାଯାଇଥିଲା । ଭାରତ ଦେଇଥିବା 51ରନ ବିଜୟ ଲକ୍ଷ୍ୟକୁ ପଶ୍ଚାତଧାବନ କରି 45/5 କରିପାରିଥିଲା । ଘରୋଇ ଦଳ ପାଇଁ ଏହି ସହଜ ବିଜୟ ଲକ୍ଷ୍ୟକୁ ଭାରତୀୟ ମହିଳା ବୋଲର କଷ୍ଟସାଧ୍ୟ କରି ଦେଇଥିଲେ । 5 ଓଭରର ଶେଷ ବେଳକୁ ଘରୋଇ ଦଳ ଖାତାରେ ଥିଲା 19/2 । ଶେଷ ଓଭରରେ ଆବଶ୍ୟକ 13ରନକୁ ପୁରଣ କରି ପାରିନଥିଲେ କାରବିୟାନ ମହିଳା ବ୍ୟାଟ୍ସମ୍ୟାନ। ଫଳରେ ସହଜ ମ୍ୟାଚକୁ କରିବାକୁ ପଡିଥିଲା ହାତଛଡା। ସିରିଜର 5ମ ତଥା ଶେଷ ମ୍ୟାଚ ଆସନ୍ତା 21 ତାରିଖରେ ଖେଳାଯିବ।
