ମୁମ୍ବାଇ: ଦେଶରେ ଜଳୁଛି ପ୍ରତିଶୋଧର ନିଆଁ । ଗୁରୁବାର ପୁଲୱାମାରେ ହୋଇଥିବା ଆତ୍ମଘାତୀ ଆକ୍ରମଣରେ 46 ଜଣ ଯବାନ ଶହୀଦ ହେବା ପରେ ଦେଶରେ ପାକିସ୍ତାନ ବିରୋଧୀ ନାରା ଜୋର ଧରିଛି । ତେବେ ଏହି କ୍ରମରେ ବିଶ୍ୱକପରେ ପାକିସ୍ତାନ ବିପକ୍ଷ ମ୍ୟାଚକୁ ବାତିଲ କରିବାକୁ ଦାବି କରାଯାଇଛି । ଏଥିସହିତ ପାକିସ୍ତାନକୁ କଡା ନିନ୍ଦା ଓ ସମସ୍ତ କ୍ଷେତ୍ରରେ ବାସନ୍ଦ ପାଇଁ ଦାବି ଦେଉଛି । ଦେଶରେ ପାକିସ୍ତାନ ବିରୋଧୀ ନାରା ଜୋର ଧରିଛି ।
ରବିବାର ସିସିଆଇ (କ୍ରିକେଟ୍ କ୍ଳବ୍ ଅଫ୍ ଇଣ୍ଡିଆ)ର ସଚ୍ଚିବ ସୁରେଶ ବାଫନା ବିସିସିଆଇକୁ ଅନୁରୋଧ କରି କହିଛନ୍ତି ଆଗମୀ ବିଶ୍ବକପରେ ଭାରତ ପାକିସ୍ତାନ ବିପକ୍ଷରେ ମ୍ୟାଚ୍ ଖେଳିବା ଅନୁଚିତ । ସୂଚନାଥାଉ କି, ଆସନ୍ତା ମେ 30ରୁ ଇଂଲଣ୍ଡରେ ଆରମ୍ଭ ହେବାକୁ ଯାଉଛି ବିଶ୍ବକପ ଟୁର୍ଣ୍ଣାମେଣ୍ଟ । ଯେଉଁ ଥିରେ ଜୁନ 16ତାରିଖରେ ପାକିସ୍ତାନ ବିପକ୍ଷରେ ଓଲ୍ଡ ଟ୍ରାଫର୍ଡଠାରେ ଭାରତ ମ୍ୟାଚ ଖେଳିବ ।
ତେବେ ସୁରେଶ ଏଏନ୍ଆଇକୁ ସାକ୍ଷାତକାର ଦେଇ କହିଛନ୍ତି, ଏହି ଆକ୍ରମଣକୁ ନେଇ ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ୍ ଖାନ୍ ଯେହେତୁ କିଛି ଖୋଲାଖୋଲି ଭାବରେ ନିଜର ମତ ରଖୁନାହାଁନ୍ତି । ତେଣୁ ଏହା ସ୍ପଷ୍ଟ କରୁଛି ଯେ,ପାକିସ୍ତାନର କିଛି ନା କିଛି ସମସ୍ୟା ରହିଛି ।
ସୁରେଶ ପୁଣି କହିଛନ୍ତି, " ଆମ ସେନା ଏବଂ ସିଆରପିଏଫ୍ ଉପରେ ଆତଙ୍କବାଦୀ ଆକ୍ରମଣକୁ ଆମେ ଦୃଢ଼ ନିନ୍ଦା କରୁଛୁ । ଯଦିଓ ସିସିଆଇ ଏକ କ୍ରୀଡ଼ା ସଂଗଠନ, ତଥାପି ସ୍ପୋର୍ଟ ପୂର୍ବରୁ ଦେଶ ଆସୁଛି ।"
