ହାମିଲଟନ ଟି-20 ମ୍ୟାଚରେ ଧୋନିଙ୍କ ରେକର୍ଡ ଭାଙ୍ଗିବେ ବିରାଟ !

ରେକର୍ଡ ଅପେକ୍ଷାରେ ଅଧିନାୟକ ବିରାଟ । ଆଜି ନ୍ୟୁଜଲାଣ୍ଡ ବିପକ୍ଷରେ 25ରନ୍‌ କଲେ ଅଧିନାୟକ ଭାବେ ଟି-20 ମ୍ୟାଚରେ ସର୍ବାଧିକ ରନ୍‌ କରିଥିବା ଭାରତୀୟ ଅଧିନାୟକ ହୋଇଯିବେ କୋହଲି ।

ହାମିଲଟନ: ଭାରତୀୟ ଅଧିନାୟକ ବିରାଟ କୋହଲି ଆଜି ନ୍ୟୁଜଲାଣ୍ଡ ବିପକ୍ଷରେ ଖେଳିବେ 3ୟ ଟି-20 ମ୍ୟାଚ । ତେବେ ଏହି ମ୍ୟାଚରେ ତାଙ୍କ ନାଁରେ ଯୋଡି ହୋଇପାରେ ଆଉ ଏକ ରେକର୍ଡ । ଯଦି ଏହି ମ୍ୟାଚରେ ବିରାଟ 25ରନ୍‌ ସଂଗ୍ରହ କରନ୍ତି ,ତାହେଲେ ସେ ଅଧିନାୟକ ଭାବେ ଟି-20 ମ୍ୟାଚରେ ସର୍ବାଧିକ ରନ୍‌ କରିଥିବା ଭାରତୀୟ ଅଧିନାୟକ ହୋଇଯିବେ ।

ଏଥିସହ ପୂର୍ବତନ ଅଧିନାୟକ ମହେନ୍ଦ୍ର ସିଂ ଧୋନିଙ୍କୁ ପଛରେ ପକାଇ ବିଶ୍ବର 3ୟ ଅଧିନାୟକ ଭାବେ ସର୍ବାଧିକ ରନ୍‌ ହାସଲ କରିଥିବା ଅଧିନାୟକ ହୋଇଯିବେ ବିରାଟ ।

ମାହି ଓ କୋହଲି

ବର୍ତ୍ତମାନ ଟି-20 ଫର୍ମାଟରେ ସର୍ବାଧିକ ରନ୍‌ କରିଥିବା ଅଧିନାୟକ ଭାବେ କୋହଲି 4ର୍ଥ ସ୍ଥାନରେ ରହିଛନ୍ତି । ସେହି ତାଲିକାରେ ମାହି 1112ରନ ସହ 3ୟ ସ୍ଥାନରେ ରହିଛନ୍ତି ।

ତେବେ ଏହି ତାଲିକାରେ ଶୀର୍ଷରେ ରହିଛନ୍ତି 1273 ରନ ସହ ଫାଫ ଡୁ ପ୍ଲେସିସ । ତାଙ୍କ ପଛକୁ ରହିଛନ୍ତି 1148ରନ୍‌ ସହ କ୍ବିଓ୍ବି ଅଧିନାୟକ କେନ ଓ୍ବିଲିୟମସନ ।

ଟି-20 ଫର୍ମାଟରେ ଅଧିନାୟକ ଭାବେ ସର୍ବାଧିକ ରନ୍‌ କରିଥିବା ଖେଳାଳି

କ୍ବିଓ୍ବି ଦଳ ବିପକ୍ଷରେ 2ଟି ମ୍ୟାଚରେ ଭାରତ ସାନଦାର୍‌ ପ୍ରଦର୍ଶନ କରି 5ଟିକିଆ ଟି-20 ସିରିଜରେ 2-0ରେ ଆଗୁଆ ରହିଛି । ଆଜି ଉଭୟ ଦଳ ମଧ୍ୟରେ 3ୟ ଟି-20 ମ୍ୟାଚ ଖେଳାଯିବ । ଏହା ପୂର୍ବରୁ 2ଟି ମ୍ୟାଚ ଅକଲାଣ୍ଡରେ ଖେଳାଯାଇଥିଲା । ଆଜି 3ୟ ମ୍ୟାଚଟି ହାମିଲଟନ ସ୍ଥିତ ସେଡନ ପାର୍କ ଗ୍ରାଉଣ୍ଡରେ ଖେଳାଯିବ ।