ନୂଆଦିଲ୍ଲୀ: ଦିଲ୍ଲୀର ବିଷାକ୍ତ ବାୟୁ ପ୍ରଦୂଷଣ ଯୋଗୁଁ ଭାରତ ବନାମ ବାଂଲାଦେଶ ପ୍ରଥମ ଟି-20 ପ୍ରାୟ ରଦ୍ଦ ହେବା ପରିସ୍ଥିତିରେ ଥିବା ବେଳେ ଯେନତେନ ପ୍ରକାରେ ସମ୍ପନ୍ନ ହୋଇଥିଲା ମ୍ୟାଚ। ତେବେ ବର୍ତ୍ତମାନ ଦ୍ବିତୀୟ ଟି-20 ମ୍ୟାଚରେ ବାତ୍ୟା ‘ମହା’ ପ୍ରଭାବ ପକାଇ ବୋଲି ଆଶଙ୍କା କରାଯାଉଛି । ଭାରତ ବନାମ ବାଂଲାଦେଶ ଦ୍ବିତୀୟ ଟି-20 ମ୍ୟାଚ ସୌରାଷ୍ଟ୍ର କ୍ରିକେଟ ଆଶୋସିଏନ ଷ୍ଟାଡିଅମ ଠାରେ ନଭେମ୍ବର 7 ତାରିଖରେ ଖେଳାଯିବ। ତେବେ ପାଣିପାଗ ବିଭାଗ ପକ୍ଷରୁ ସୂଚନା ମିଳିଛି ଯେ ବାତ୍ୟା କାରଣରୁ ଦକ୍ଷିଣ ଗୁଜୁରାଟ ଓ ସୌରାଷ୍ଟ୍ରରେ ପ୍ରବଳରୁ ଅତି ପ୍ରବଳ ବର୍ଷା ହେବ।
‘ସିଭିୟର ସାଇକ୍ଲୋନିକ ଷ୍ଟର୍ମ ‘ମହା’ ଦକ୍ଷିଣ ପଶ୍ଚିମ ଡିଉ ଠାରୁ 580 କିମି ଦୂରରେ ଥିବା ବେଳେ ଭେରାଭଲ ଠାରୁ 550 କିମି ଦକ୍ଷିଣ ପଶ୍ଚିମରେ କେନ୍ଦ୍ରୀଭୂତ ହୋଇଛି । ଗୁଜୁରାଟ ଆଞ୍ଚଳିକ ପାଣିପାଗ ନିର୍ଦ୍ଦେଶକ ଜୟନ୍ତ ସରକାର କହିଛନ୍ତି ଯେ, ଅତି ଭୟଙ୍କର ସାମୁଦ୍ରିକ ଝଡର ରୂପ ନେଇ ବାତ୍ୟା ମହା ବୁଧବାର ମଧ୍ୟରାତ୍ରି କିମ୍ବା ଗୁରୁବାର ଭୋରରୁ ଦ୍ବାରକା ଓ ଡିଉ ମଧ୍ୟ ସ୍ଥଳଭାଗ ଛୁଇଁବା ନେଇ ପୂର୍ବାନୁମାନ କରାଯାଇଛି। ଲ୍ୟାଣ୍ଡଫଲ କଲାବେଳେ ପବନର ବେଗ 120 କିମି ପ୍ରତିଘଣ୍ଟା ରହିବ,’ ବୋଲି କହିଛନ୍ତି ପାଣିପାଗ ନିର୍ଦ୍ଦେଶକ ।
ତେବେ ପୂର୍ବାନୁମାନ ସଠିକ ହୋଇଥିଲେ, ଭାରତ ବନାମ ବାଂଲାଦେଶ ଦ୍ବିତୀୟ ଟି-20 ମ୍ୟାଚ ବର୍ଷା ଯୋଗୁଁ ବାତିଲ ହେବାର ସମ୍ବାବନା ରହିଛି।
