ନୂଆଦିଲ୍ଲୀ: ଚେନ୍ନାଇରେ ପ୍ରଥମ ଟେଷ୍ଟରେ ପରାଜୟ ପରେ, ଭାରତୀୟ କ୍ରିକେଟ ବୋର୍ଡର ବଡ ନିଷ୍ପତ୍ତି । ଏମଏ ଚିଦାମ୍ବରମ ଷ୍ଟାଡିୟମର ପିଚ୍ ପ୍ରସ୍ତୁତକର୍ତ୍ତାଙ୍କୁ(କ୍ୟୁରେଟର) ବିଦା କରିଛି ବୋର୍ଡ । ଶନିବାର ଠାରୁ ସିରିଜର ଦ୍ବିତୀୟ ଟେଷ୍ଟ ଆରମ୍ଭ ହେବ ।
ତେବେ ତାଙ୍କ ସ୍ଥାନରେ ଭି ରମେଶ କୁମାର ନାମକ ଜଣେ ସ୍ଥାନୀୟ ଗ୍ରାଉଣ୍ଡ୍ସମ୍ୟାନଙ୍କୁ ପିଚ୍ ପ୍ରସ୍ତୁତ ଦାୟିତ୍ବ ଦିଆଯାଇଛି । ମାତ୍ର କୁମାର କେବେ ପିଚ୍ ପ୍ରସ୍ତୁତ କରିନାହାଁନ୍ତି, ଏମିତି କି ପ୍ରଥମ ଶ୍ରେଣୀ ମ୍ୟାଚ ପାଇଁ ମଧ୍ୟ । ହାତରେ ମାତ୍ର ଦୁଇ ଦିନ ସମୟ ରହିଛି । ଏପରି ସ୍ଥିତିରେ କୁମାରଙ୍କ ଉପରେ ଦ୍ବିତୀୟ ଟେଷ୍ଟ ପାଇଁ ପିଚ ପ୍ରସ୍ତୁତ ଗୁରୁତ୍ବ ଦାୟିତ୍ବ ନ୍ୟସ୍ତ କରିଛି ମ୍ୟାନେଜମେଣ୍ଟ । ନାଲି ମାଟି ବଦଳରେ କଳା ମାଟିରେ ପ୍ରସ୍ତୁତ କରିବାକୁ ରହିଛି କଡା ନିର୍ଦ୍ଦେଶ ।
ଫେବ୍ରୁଆରୀ 13ରୁ ଦ୍ବିତୀୟ ଟେଷ୍ଟ ଆରମ୍ଭ ହେବ । ମାତ୍ର ସେଣ୍ଟ୍ରାଲ ଜୋନ୍ର ବିସିସିଆଇ କ୍ୟୁରେଟର ତାପସ ଚାଟାର୍ଜୀଙ୍କୁ ପ୍ରଥମ ମ୍ୟାଚ ପରେ ଦାୟିତ୍ବମୁକ୍ତ କରିଛି ବୋର୍ଡ । ଏଥିସହ ବିଜୟ ହଜାରେ ଟ୍ରଫି ମ୍ୟାଚ ପାଇଁ ଇନଡୋର ଓ ଜୟପୁରରେ ପିଚ୍ ପ୍ରସ୍ତୁତ ପାଇଁ ଚାଟାର୍ଜୀଙ୍କୁ କୁହାଯାଇଛି । ଏନେଇ ତାମିଲନାଡୁ କ୍ରିକେଟ ଆସୋସିଏସନ ପକ୍ଷରୁ ସ୍ପଷ୍ଟ କରାଯାଇଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
