ନୂଆଦିଲ୍ଲୀ: ପ୍ରାୟ ୨୯ ବର୍ଷ ପରେ ପାକିସ୍ତାନରେ କୌଣସି ଆଇସିସି ଟୁର୍ଣ୍ଣାମେଣ୍ଟ ଆୟୋଜନ ହେବାକୁ ଯାଉଛି । ଆଗାମୀ ୧୦ ବର୍ଷ ପାଇଁ କେଉଁ ଦେଶ ଆଇସିସି ଟୁର୍ଣ୍ଣାମେଣ୍ଟ ଆୟୋଜନ କରିବେ ତାହାର ଚୂଡ଼ାନ୍ତ ସୂଚୀ ପ୍ରସ୍ତୁତ କରିଛି ଆଇସିସି (ICC) । ଏହି କ୍ରମରେ ୨୦୨୫ରେ ପାକିସ୍ତାନ ଚମ୍ପିଆନ୍ସ ଟ୍ରଫି ଆୟୋଜନ କରିବ । ତେବେ ଏଥିରେ ଭାରତ ଭାଗ ନେବ କି ନାହିଁ ତାହା ବର୍ତ୍ତମାନ ଏକ ଆଲୋଚନାର ବିଷୟ ପାଲଟିଛି ।
ଏହାକୁ ନେଇ କିଛି ସ୍ପଷ୍ଟୀକରଣ ଦେଇଛନ୍ତି କେନ୍ଦ୍ର କ୍ରୀଡ଼ାମନ୍ତ୍ରୀ ଅନୁରାଗ ଠାକୁର । ସେ କହିଛନ୍ତି ଯେ, "ଭାରତ ଏହି ଟୁର୍ଣ୍ଣାମେଣ୍ଟରେ ଭାଗ ନେବ କି ନାହିଁ ତାହା ସମୟ ଆସିଲେ ନିଷ୍ପତ୍ତି ନିଆଯିବ । ସେଠାରେ ସୁରକ୍ଷାକୁ ନେଇ ନାନା ସମସ୍ୟା ରହିଛି । ନିକଟ ଅତୀତରେ କିଛି ଅନ୍ତର୍ଜାତୀୟ ଦଳ ପାକିସ୍ତାନ ସହ ଶୃଙ୍ଖଳା ବାତିଲ କରି ଫେରିଯାଇଛନ୍ତି । କିଛି ଆସିବା ପୂର୍ବରୁ ହିଁ ଶୃଙ୍ଖଳା ବାତିଲ କରିଛନ୍ତି । ଏସବୁ ବିଷୟରେ ସେହି ସମୟରେ ନିଷ୍ପତ୍ତି ନିଆଯିବ ।"
୨୦୦୯ ମସିହାରେ ପାକିସ୍ତାନରେ ଶ୍ରୀଲଙ୍କା କ୍ରିକେଟ ଦଳ ଉପରେ ଆତଙ୍କବାଦୀ ଆକ୍ରମଣ ହୋଇଥିଲା । ଫଳରେ ସେହି ଦିନଠାରୁ ଅଧିକ ଅନ୍ତର୍ଜାତୀୟ କ୍ରିକେଟ ଆୟୋଜନ କରିପାରିନାହିଁ ପାକିସ୍ତାନ । ଅଧିକାଂଶ ସମୟରେ ଦୁବାଇ ଷ୍ଟାଡିୟମକୁ ଘରୋଇ ପଡ଼ିଆ ଭାବେ ବ୍ୟବହାର କରିଛି ପାକିସ୍ତାନ । ତାଛଡ଼ା କୌଣସି ବଡ଼ ଦଳ ପାକିସ୍ତାନ ଗସ୍ତ କରିନାହନ୍ତି । ଶେଷ ଥର ପାଇଁ ୧୯୯୬ରେ ଭାରତ ଓ ଶ୍ରୀଲଙ୍କା ସହ ମିଶି ପାକିସ୍ତାନ ବିଶ୍ବକପ୍ ଆୟୋଜନ କରିଥିଲା ।
ଭାରତ ଓ ପାକିସ୍ତାନ ମଧ୍ୟରେ ଦ୍ବିପାକ୍ଷିକ ସମ୍ପର୍କ ଭଲ ନାହିଁ । ଏଥିପାଇଁ ଦୁଇ ଦେଶ ମଧ୍ୟରେ ଦୀର୍ଘ ବର୍ଷ ହେଲା କୌଣସି ଦ୍ବପାକ୍ଷିକ ସିରିଜ ମଧ୍ୟ ଖେଳାଯାଉନାହିଁ । ତେବେ ୨୦୨୫ ଚମ୍ପିଆନ୍ସ ଟ୍ରଫି(champions trophy)ରେ ଭାରତ ଭାଗ ନେବ କି ନାହିଁ ସେନେଇ ଠିକଣା ସମୟରେ ନିଷ୍ପତ୍ତି ନିଆଯିବ । ଏହି ନିଷ୍ପତ୍ତି ବେଳେ ଗୃହମନ୍ତ୍ରାଳୟର ସମ୍ପୃକ୍ତି ରହିବ ବୋଲି କହିଛନ୍ତି କେନ୍ଦ୍ର କ୍ରୀଡ଼ାମନ୍ତ୍ରୀ ।
ବ୍ୟୁରୋ ରିପୋର୍ଟ, ଇଟିଭି ଭାରତ
