ବରଗଡ: ବିଶ୍ବ ଚମ୍ପିଆନ ହୋଇଛନ୍ତି ଓଡିଆ ପୁଅ ପ୍ରମୋଦ ଭଗତ । ସୁଇଜରଲାଣ୍ଡର ବାସିଲ ଠାରେ ହେଉଥିବା ପାରା ବ୍ୟାଡମିଣ୍ଟନ ଚମ୍ପିଆନସିପରେ ଉଭୟ ପୁରୁଷ ଡବଲ୍ସ ଓ ସିଙ୍ଗଲ୍ସରେ ସ୍ବର୍ଣ୍ଣ ପଦକ ଜିତିଛନ୍ତି ପ୍ରମୋଦ । ଏବେ ପ୍ରମୋଦ ବରଗଡ କିମ୍ବା ଓଡିଶାର ଗର୍ବ ନୁହଁନ୍ତି, ସମଗ୍ର ଦେଶ ତାଙ୍କୁ ନେଇ ଗର୍ବ ଅନୁଭବ କରୁଛି |
ବ୍ୟାଡମିଣ୍ଟନର ଏହି ବିଶ୍ବସ୍ଥରୀୟ ଓ ସମ୍ମାନଜନକ ଟୁର୍ଣ୍ଣାମେଣ୍ଟରେ ଭାରତର ତ୍ରିରଙ୍ଗାକୁ ଉପରକୁ କରି ଭାରତର ଗୌରବ ବୃଦ୍ଧି କରିଛନ୍ତି ବରଗଡର ପୁଅ ପ୍ରମୋଦ । ସେ ଭାରତୀୟ କ୍ରୀଡାରେ ସଫଳତାର ଏକ ସ୍ବର୍ଣ୍ଣିମ ଅଧ୍ୟାୟ ଲେଖିଛନ୍ତି ।
ପ୍ରମୋଦଙ୍କ ଏହି ସଫଳତାରେ ପରିବାର ଲୋକେ ବେଶ ଉତ୍ସାହିତ ଅଛନ୍ତି । ସମଗ୍ର ବରଗଡ ଜିଲ୍ଲା ଓ ଅତାବିରା ଅଞ୍ଚଳରେ ଲୋକେ ଖୁସି ଅନୁଭବ କରୁଛନ୍ତି । ପ୍ରମୋଦ ଆନ୍ତର୍ଜାତୀୟ ସ୍ତରରେ ୧୯ ଗୋଟି ସ୍ଵର୍ଣ୍ଣ ପଦକ ଜିତିଛନ୍ତି । ସେହିପରି ୭ଟି ରୌପ୍ୟ ଓ ୧୨ଟି ବ୍ରୋଞ୍ଜ ପଦକ ମଧ୍ୟ ହାତେଇଛନ୍ତି ପ୍ରମୋଦ ।
ଜାତୀୟ ତଥା ଅନ୍ତର୍ଜାତୀୟ ସ୍ତରରେ ଉଚ୍ଚକୋଟୀର ଖେଳ ପ୍ରଦର୍ଶନ କରିଥିବା ପ୍ରମୋଦଙ୍କୁ ଆସନ୍ତା ୨୯ ତାରିଖରେ ରାଷ୍ଟ୍ରପତି ଭବନରେ ଅର୍ଜୁନ ପରୁସ୍କାର ପ୍ରଦାନ କରାଯିବ । ଏନେଇ ପୂର୍ବରୁ ଘୋଷଣା ହୋଇଛି । ଭାରତର ମହମହୀମ ରାଷ୍ଟ୍ରପତି କ୍ରୀଡାକ୍ଷେତ୍ରର ଏହି ସମ୍ମାନଜନକ ପୁରସ୍କାର ପ୍ରମୋଦଙ୍କୁ ପ୍ରଦାନ କରିବେ ।
ବରଗଡରୁ ରାଜେଶ ସରାପ, ଇଟିଭି ଭାରତ
