ମୁମ୍ବାଇ: ଆଜି ଶେଷ ହୋଇଯିବ 2020ର କଳାର ପ୍ରଭାବ । ସମସ୍ତେ ଉତ୍ସାହିତ ସହ 2021କୁ ସ୍ବାଗତ କରିବାକୁ ଅନାଇ ବସିଛନ୍ତି । 2020 ବର୍ଷ ପୁରା ବିଶ୍ବର କାମକୁ ଠପ୍ କରିଦେଇଥିଲା । ଏମିତି ପରିସ୍ଥିତିରେ ସବୁଠୁ ଅଧିକ ପ୍ରଭାବିତ ହୋଇଛି କଳା ଜଗତ । ଅନେକ ବଡ ବଡ କଳାକାରଙ୍କ ଫିଲ୍ମ ଏବର୍ଷ ସିନେମାହଲରେ ରିଲିଜ ହୋଇପାରିନାହିଁ । ଯାହାକୁ ନେଇ ନିରାଶ ଦର୍ଶକ । ଏହି କ୍ରମରେ ସାମିଲ ଅଛନ୍ତି ବଲିଉଡର ସୁପରଷ୍ଟାର ସଲମାନ ଖାନ, ଆମୀର ଖାନ, ଶାହରୁଖ ଖାନ, କ୍ୟାଟ୍ରିନା କୈଫ ଓ ରଣବୀର କପୁର ।
ତେବେ 2019ରେ ସଲମାନଙ୍କ ଦୁଇଟି ବଡ ଫିଲ୍ମ ‘ଭାରତ’ ଓ ‘ଦବଙ୍ଗ 3’ ରିଲିଜ ହୋଇଥିଲା । ହେଲେ 2020ରେ କୋରୋନା ଭାଇରସ ପାଇଁ ଫିକା ପଡିଛି ତାଙ୍କ ଯାଦୁ । କାରଣ ଏଥର ଫ୍ୟାନ୍ସ ତାଙ୍କ ଫିଲ୍ମ ବିନା ଇଦ ପାଳନ କରିଛନ୍ତି । କୋରୋନା ପାଇଁ ଦେଶରେ ଲକଡାଉନ ହୋଇଥିବାରୁ ତାଙ୍କ ଆଗାମୀ ଫିଲ୍ମ ‘ରାଧେ’ର ସୁଟିଂରେ ବିଳମ୍ବ ହୋଇଥିଲା । ତେଣୁ ଫିଲ୍ମ ଏବର୍ଷ ଇଦରେ ରିଲିଜ କରିପାରିନାହାଁନ୍ତି ଭାଇଜାନ । ସେପଟେ ଓଟିଟି ପ୍ଲାଟଫର୍ମରେ ମଧ୍ୟ ଫିଲ୍ମ ରିଲିଜ କରିବାକୁ ସେ ମନା କରିଦେଇଥିଲେ ।
ସେହିପରି ମିଷ୍ଟର ପରଫେକ୍ସିନଷ୍ଟ ଆମୀର ଖାନଙ୍କ ଫିଲ୍ମ ନା ସିନେମାହଲରେ ରିଲିଜ ହୋଇଛି ନା ଓଟିଟି ପ୍ଲାଟଫର୍ମରେ । ଏବର୍ଷ ମଧ୍ୟ ତାଙ୍କ ଯାଦୁ ଫିକା ପଡିଛି । ଶେଷଥର ତାଙ୍କ ଫିଲ୍ମ ଦୁଇବର୍ଷ ପୂର୍ବେ ତଥା 2018ରେ ‘ଠଗ୍ସ ଅଫ ହିନ୍ଦୁସ୍ଥାନ’ ରିଲିଜ ହୋଇଥିଲା । ତାଙ୍କ ଫିଲ୍ମ କ୍ୟାରିୟରରେ ଏହା ସବୁଠୁ ଲମ୍ବା ଅନ୍ତରାଳ । ଏବର୍ଷ କ୍ରିସମାସରେ ରିଲିଜ ହୋଇଥାଆନ୍ତା ତାଙ୍କ ବହୁପ୍ରତିକ୍ଷିତ ଫିଲ୍ମ ‘ଲାଲ ସିଂ ଚଡ୍ଡା’ । ହେଲେ ତାହା ମଧ୍ୟ ସମ୍ଭବ ହୋଇପାରନାହିଁ । ଫିଲ୍ମଟି ଆସନ୍ତା ବର୍ଷ ଡିସେମ୍ବରରେ ରିଲିଜ କରିବାକୁ ଯୋଜନା କରିଛନ୍ତି ମେକର୍ସ । ଏତେ ଦିନ ପର୍ଯ୍ୟନ୍ତ ଅପେକ୍ଷା କରିବାକୁ ନେଇ ନିରାଶ ଫ୍ୟାନ୍ସ ।
ସୁପରଷ୍ଟାର ଶାହରୁଖ ଖାନଙ୍କ କୌଣସି ବି ଫିଲ୍ମ ଏବର୍ଷ ରିଲିଜ ହୋଇନାହିଁ । 2021ରେ ମଧ୍ୟ ତାଙ୍କର କୌଣସି ପ୍ରୋଜେକ୍ଟକୁ ନେଇ ଯୋଜନା ମଧ୍ୟ ନଥିଲା । 2018ରେ ଶେଷଥର ତାଙ୍କୁ ଆନନ୍ଦ ଏଲ ରୟଙ୍କ ଫ୍ଲପ୍ ଫିଲ୍ମ ‘ଜିରୋ’ରେ ଦେଖିବାକୁ ମିଳିଥିଲା ।
ଅନ୍ୟପଟେ ସେକ୍ସୀ ଅଭିନେତ୍ରୀ କ୍ୟାଟ୍ରିନା କୈଫ ମଧ୍ୟ ଶେଷଥର ‘ଠଗ୍ସ ଅଫ ହିନ୍ଦୁସ୍ତାନ’ରେ ନଜର ଆସିଥିଲେ । ସେହିପରି ଶାହରୁଖଙ୍କ ସହ ‘ଜିରୋ’ରେ ମଧ୍ୟ ଅଭିନୟ କରିଥିଲେ ସେ । ହେଲେ ଏହି ଦୁଇ ଫିଲ୍ମ ପରଠୁ ତାଙ୍କୁ ଆଉ କୌଣସି ଫିଲ୍ମରେ ଏଯାବତ ଦେଖିବାକୁ ମିଳିନାହିଁ । ଏବର୍ଷ ମଧ୍ୟ ରିଲିଜ ହୋଇନାହିଁ ତାଙ୍କର କୌଣସି ବି ଫିଲ୍ମ । ହେଲେ ଆସନ୍ତା ବର୍ଷ ତାଙ୍କୁ ଖିଲାଡି ଅକ୍ଷୟ କୁମାରଙ୍କ ସହ ଆକ୍ସନ ଡ୍ରାମା ଫିଲ୍ମ ‘ସୂର୍ଯ୍ୟବଂଶୀ’ରେ ଦେଖିବାକୁ ମିଳିବ । ଯାହାକୁ ନେଇ ଉତ୍ସାହିତ ଫ୍ୟାନ୍ସ ।
2018ରେ ରିଲିଜ ହୋଇଥିବା ବ୍ଲକବଷ୍ଟର ଫିଲ୍ମ ‘ସଞ୍ଜୁ’ରେ ଶେଷଥର ନଜର ଆସିଥିଲେ ରଣବୀର କପୁର । ଏବର୍ଷ ତାଙ୍କର କୌଣସି ବି ଫିଲ୍ମ ରିଲିଜ ହୋଇନାହିଁ । ହେଲେ ଆସନ୍ତା ବର୍ଷ ସେ ଆୟନ ମୁଖାର୍ଜୀଙ୍କ ମଲ୍ଟି ଷ୍ଟାରର ଫିଲ୍ମ ‘ବ୍ରହ୍ମାସ୍ତ୍ର’ରେ ନଜର ଆସିବାକୁ ଯାଉଛନ୍ତି । ଫିଲ୍ମରେ ପ୍ରଥମଥର ତାଙ୍କ ସହ ଆଲିୟା ଭଟ୍ଟ, ଅମିତାଭ ବଚ୍ଚନ, ନାର୍ଗାଜୁନ ଓ ମୌନୀ ରୟ ଭଳି କଳାକାର ଅଭିନୟ କରୁଥିବାର ଦେଖାଯିବେ ।
