ମୁମ୍ବାଇ: ବଲିଉଡ ଅଭିନେତା ସୁଶାନ୍ତ ସିଂ ମୃତ୍ୟୁ ମାମଲାର ଯାଞ୍ଚ ସିବିଆଇ କରୁଛି । ବର୍ତ୍ତମାନ ବିଭିନ୍ନ ସୋସିଆଲ ମିଡିଆରେ ଅଭିନେତ୍ରୀ ରିୟା ଚକ୍ରବର୍ତ୍ତୀ ଓ ଫିଲ୍ମ ନିର୍ଦ୍ଦେଶକ ମହେଶ ଭଟ୍ଟଙ୍କ ହ୍ବାଟ୍ସ ଆପ ଚାଟ ଲିକ ହୋଇଛି । ଏହି ଚାଟ ସାମ୍ନାକୁ ଆସିବା ପରେ ରିୟା ସୁଶାନ୍ତଙ୍କୁ ଛାଡି ଥିବା ନେଇ ଚର୍ଚ୍ଚା ହେଉଛି । ଏପରିକି ରିୟା ପୋଲିସ ତଦନ୍ତରେ କୌଣସି ସ୍ପଷ୍ଟ ସୂଚନା ଦେଇନଥିବା ଜଣାପଡିଛି । ତେବେ ରିୟା ତଦନ୍ତରେ ମିଛ କହୁଥିବା ନେଇ ଏବେ ଚର୍ଚ୍ଚା ଜୋର ଧରିଛି ।
ରିୟା ବର୍ତ୍ତମାନ ପର୍ଯ୍ୟନ୍ତ ସୁଶାନ୍ତ ଡିପ୍ରେସନରେ ଥିବା କହି ଆସୁଛନ୍ତି। ସୁଶାନ୍ତଙ୍କ ଯୋଗୁଁ ସେ ମଧ୍ୟ ଚାପରେ ଥିଲେ। ସେ ସୁଶାନ୍ତଙ୍କୁ ଛାଡିବାକୁ ଚାହୁଁନଥିଲେ। କିନ୍ତୁ ସୁଶାନ୍ତଙ୍କ କହିବା ପରେ ସେ ତାଙ୍କୁ ଛାଡିବାକୁ ବାଧ୍ୟ ହୋଇଥିଲେ । ଏପରିକି ରିୟା ସୁଶାନ୍ତଙ୍କ ଭଉଣୀଙ୍କ ଉପରେ ମଧ୍ୟ ଅଭିଯୋଗ କରିଥିଲେ। ହେଲେ ମହେଶ ଭଟ୍ଟଙ୍କ ସହ ଲିକ ହୋଇଥିବା ଏହି ଚାଟ୍ କିଛି ଅଲଗା କାହାଣୀ କହୁଛି ।
ଜୁନ୍ 8 ରେ ସୁଶାନ୍ତଙ୍କ ଘରୁ ବାହାରିବା ପରେ ରିୟା ମହେଶ ଭଟ୍ଟଙ୍କୁ ମେସେଜ୍ କରିଥିଲେ - ଭାରି ହୃଦୟ ଏବଂ ଶାନ୍ତି ସହ ଆୟୋଶା ଆଗକୁ ବଢୁଛି । ତୁମ ସହିତ ମୋର ଶେଷ ବାର୍ତ୍ତାଳାପ ମୋ ଆଖି ଖୋଲି ଦେଇଛି । ତୁମେ ମୋର ଦେବଦୂତ । ସେତେବେଳେ ଥିଲ ଏବଂ ଆଜି ମଧ୍ୟ ଅଛ । ପ୍ରକାଶ ଥାଉକି, ମହେଶ ଭଟ୍ଟଙ୍କ ସହ ପ୍ରଯୋଜିତ 2018 ଚଳଚ୍ଚିତ୍ର ଜଲେବିରେ ରିୟାଙ୍କ ଭୂମିକାର ନାଁ ଆୟେଶା ଥିଲା ।
ସେ ଆହୁରି ଲେଖିଛନ୍ତି - ତୁମେ ମୋତେ ପୁନର୍ବାର ମୁକ୍ତ କରିଛ, ତୁମେ ମୋ ଜୀବନରେ ଭଗବାନଙ୍କ ପରି । ସେହି ସମୟରେ ମହେଶ ଭଟ୍ଟ ଉତ୍ତର ଦେଇ କହିଛନ୍ତି - ବର୍ତ୍ତମାନ ପଛକୁ ଦେଖ ନାହିଁ । ତୁମ ବାପାଙ୍କୁ ମୋର ଭଲପାଇବା ଦିଅ । ବର୍ତ୍ତମାନ ସେ ବହୁତ ଖୁସି ହେବେ ।’
ତେବେ ରିୟା ଓ ମହେଶ ଭଟ୍ଟଙ୍କ ଚାଟରୁ ସୁଶାନ୍ତ-ରିୟାଙ୍କୁ ନୁହେଁ, ବରଂ ରିୟା ସୁଶାନ୍ତଙ୍କୁ ଛାଡି ଯାଉଥିବା ସ୍ପଷ୍ଟ ହୋଇଛି । ହେଲେ ସୁପ୍ରିମକୋର୍ଟରେ ହୋଇଥିବା ଶୁଣାଣି ସମୟରେ ସିନିୟର ଆଡଭୋକେଟ୍ ଶ୍ୟାମ କହିଥିଲେ ଯେ ରିୟା ଚକ୍ରବର୍ତ୍ତୀ ସୁଶାନ୍ତଙ୍କୁ ଭଲ ପାଆନ୍ତି ଏବଂ ତାଙ୍କ ମୃତ୍ୟୁ ପରଠାରୁ ସେ ସ୍ତବ୍ଧ ହୋଇଯାଇଛନ୍ତି। ସେପଟେ ସୁଶାନ୍ତଙ୍କ ମୃତ୍ୟୁରେ ରିୟାଙ୍କ ହାତ ଥିବା ନେଇ ସୋସିଆଲ ମିଡିଆରେ ତାଙ୍କୁ ଟ୍ରୋଲ କରାଯାଉଛି ।
