ମୁମ୍ବାଇ: ସୁପରଷ୍ଟାର ସଲମାନ ଖାନଙ୍କ ବହୁ ପ୍ରତିକ୍ଷିତ ଫିଲ୍ମ ‘ରାଧେ’ ଇଦରେ ରିଲିଜ ହେବାକୁ ବର୍ତ୍ତମାନ ପ୍ରସ୍ତୁତ । ଗୁରୁବାର ଫିଲ୍ମର ଜବରଦସ୍ତ ଟ୍ରେଲର ରିଲିଜ ହୋଇଥିଲା । ଯେଉଁଥିରେ ସଲମାନଙ୍କ ଆକ୍ସନ ଅନ୍ଦାଜ ଦେଖିବାକୁ ମିଳିଥିଲା । ସେହିପରି ଫିଲ୍ମର ନିର୍ଦ୍ଦେଶନା ଦାୟିତ୍ବ ତୁଲାଉଛନ୍ତି ପ୍ରଭୁଦେବା । ସଲମାନଙ୍କ ବ୍ୟତୀତ ଫିଲ୍ମରେ ଦିଶା ପଟାନୀ, ରଣଦୀପ ହୁଡ୍ଡା ଓ ଜ୍ୟାକି ଶ୍ରଫ ମଧ୍ୟ ମୁଖ୍ୟ ଭୂମିକାରେ ଅଛନ୍ତି । ଇତିମଧ୍ୟରେ ଟ୍ରେଲରକୁ ନେଇ ନୂଆ ଖବର ସାମ୍ନାକୁ ଆସିଛି । ଯାହାକୁ ନେଇ ମେକର୍ସଙ୍କ ଖୁସି ନକହିଲେ ସରେ ।
କଥାଟି ହେଲା ଯେ ଫିଲ୍ମର ଟ୍ରେଲରେ ସଲମାନଙ୍କ ସିଗ୍ନଚର ଡାଇଲଗ ଠୁ ନେଇ ଆକ୍ସନ ସିନ୍ସ, ମ୍ୟୁଜିକ ଓ ଡ୍ରାମାକୁ ବେଶ୍ ପସନ୍ଦ କରିଛନ୍ତି ଦର୍ଶକ । ଏହି କାରଣ ପାଇଁ ‘ରାଧେ’ ଟ୍ରେଲର ରିଲିଜର କେବଳ 10 ମିନିଟ୍ ମଧ୍ୟରେ 1 ଲକ୍ଷ ଲାଇକ ପାଇ ନୂଆ ରେକର୍ଡ ସୃଷ୍ଟି କରିଛି । ଯାହାଦ୍ବାରା ଏତେ କମ୍ ସମୟରେ 1 ଲକ୍ଷ ଲାଇକ ପାଇ ‘ରାଧେ’ ବଲିଉଡର ପ୍ରଥମ ଫିଲ୍ମ ଟ୍ରେଲର ସାଜିଛି । ଏହାସହ ସବୁ ୟୁଟ୍ୟୁବ ପ୍ଲାଟଫର୍ମରେ 12 ଘଣ୍ଟାରେ 30 ମିଲିୟନ ଭ୍ୟୁର ଏକ ବେଞ୍ଚମାର୍କ ଭ୍ୟୁଅରସିପ୍ ସ୍ଥାପନ କରିବାରେ ମଧ୍ୟ ସଫଳ ହୋଇଛି ।
ଖାଲି ଏତିକି ନୁହେଁ ଟ୍ରେଲର ରିଲିଜର 4 ଘଣ୍ଟା ମଧ୍ୟରେ ନଂ ୱାନରେ ଟ୍ରେଣ୍ଡ ମଧ୍ୟ କରୁଥିଲା । ଏପର୍ଯ୍ୟନ୍ତ ମଧ୍ୟ ଟ୍ରେଣ୍ଡରେ 1 ନଂ ସ୍ଥାନରେ ଅଛି । ପ୍ରକାଶ ଥାଉକି ‘ରାଧେ’ ଫିଲ୍ମର ପ୍ରଯୋଜନା ସଲମାନ ଖାନ ଫିଲ୍ମସ ଜି ଷ୍ଟୁଡିଓ ସହ ମିଶି କରିଛି । ସେହିପରି ସଲମାନ ଖାନ, ସୋହିଲ ଖାନ ଓ ରିଲ ଲାଇଫ ପ୍ରଡକ୍ସନ ପ୍ରାଇଭେଟ ଲିମିଟେଡ ଦ୍ବାରା ନିର୍ମିତ କରାଯାଇଛି ।
