ମୁମ୍ବାଇ: ଛୋଟ ପରଦାର ପପୁଲାର ରିୟାଲିଟି ଶୋ ‘କୌନ ବନେଗା କରୋଡପଡି 12’କୁ ନେଇ ବର୍ତ୍ତମାନ ଦର୍ଶକ ଉତ୍ସାହିତ । ମହାନାୟକ ଅମିତାଭ ବଚ୍ଚନଙ୍କ ପ୍ରଶ୍ନର ଉତ୍ତର ଦେଇ କୋଟିପତି ହେବାକୁ ଚେଷ୍ଟା ଚଳାଇଛନ୍ତି ସମସ୍ତେ । ଏହା ବ୍ୟତୀତ ଶୋରେ ମଜାଦାର ଜିନିଷ ମଧ୍ୟ ଦେଖିବାକୁ ମିଳୁଛି । ହେଲେ ଆଶ୍ଚର୍ଯ୍ୟକର କଥା ହେଲା ଯେ ମଙ୍ଗଳବାର ପ୍ରସାରିତ ହୋଇଥିବା ଏକ ଏପିସୋଡରେ କିଙ୍ଗ ଖାନ ଶାହରୁଖଙ୍କୁ କ୍ଷମା ପ୍ରାର୍ଥନା କରିଥିଲେ ଅମିତାଭ । ଯାହାକୁ ନେଇ ସମସ୍ତେ ଆଶ୍ଚର୍ଯ୍ୟ । ତେବେ ଆସନ୍ତୁ ଜାଣିବା ଏହାର କାରଣ...
କଥାଟି ହେଲା ଯେ ‘କେବିସି 12’ ସେଟକୁ ଏମିତି ଜଣେ ପ୍ରତିଯୋଗୀ ଆସିଛନ୍ତି ଯିଏ ନିଜ କ୍ୟୁଟ ଅନ୍ଦାଜରେ ସମସ୍ତଙ୍କ ହୃଦୟ ଜିତିଛନ୍ତି । ଅମିତାଭ ମଧ୍ୟ ଏହି ଝିଅ ପ୍ରତିଯୋଗୀଙ୍କ ପାଇଁ ଖୁସି ଅଛନ୍ତି । ଯେତେବେଳେ ପ୍ରତିଯୋଗୀ କହିଥିଲେ ଅମିତାଭଙ୍କର ଗୋଟିଏ କଥା ପାଇଁ ସେ ଦୁଃଖି ଅଛନ୍ତି, ତେବେ ସଙ୍ଗେ ସଙ୍ଗେ ଅମିତାଭ ମଧ୍ୟ ସେହି କଥା ଜାଣିବା ପାଇଁ ଉତ୍ସାହିତ ହୋଇଥିଲେ । ଆଉ ତାଙ୍କୁ ପଚାରିଥିଲେ ।
ଏହାର ଜବାବରେ ପ୍ରତିଯୋଗୀ କହିଥିଲେ, ‘ଶାହରୁଖ ମୋ ଫେଭରେଟ ଆକ୍ଟର ଆଉ ଯେତେବେଳେ ଫିଲ୍ମ ମୋହାବତେଁରେ ଆପଣ ତାଙ୍କୁ ଗାଳି କରିଥିଲେ ମତେ ଖରାପ ଲାଗିଥିଲା । ଏହାପରେ ଆଉ କଣ ଥିଲା ଅମିତାଭ ତାଙ୍କୁ ବିଭିନ୍ନ କଥା କହି ବୁଝାଇବାକୁ ଚେଷ୍ଟା କରିଥିଲେ । ହେଲେ ସେ ମାନି ନଥିଲେ । ଆଉ କହିଥିଲେ ଯେ ଆପଣ ତାଙ୍କୁ ‘କଭି ଖୁସି କଭି ଗମ’ରେ ଘର ମଧ୍ୟ ବାହାର କରିଦେଇଥିଲେ ।
ଏହା ଶୁଣି ଅମିତାଭ ହାତ ଯୋଡି କ୍ଷମା ମାଗିବା ସହ କହିଥିଲେ, ‘ମତେ ଏମିତି କରିବା ପାଇଁ ସ୍କ୍ରିପ୍ଟ ରାଇଟର କହିଥିଲେ ।’ ଏହି ମଜାଦାର ନୋକ-ଝୋକ ଦର୍ଶକଙ୍କୁ ହସାଇଥିଲା ।
