ନୂଆଦିଲ୍ଲୀ: ଖୁବ୍ ଶୀଘ୍ର ସ୍ବର୍ଗୀୟ ଅଭିନେତ୍ରୀ ଶ୍ରୀଦେବୀଙ୍କ ଚର୍ଚ୍ଚିତ ଶେଷ ଫିଲ୍ମ 'ମମ' ଚୀନରେ ରିଲିଜ ହେବାକୁ ଯାଉଛି। ପୂର୍ବରୁ ଫିଲ୍ମଟି ମାର୍ଚ୍ଚ 22ରେ ରିଲିଜ ହେବାର ଥିଲା। କିନ୍ତୁ କିଛି ସମସ୍ୟା ପାଇଁ ରିଲିଜ ହୋଇପାରିନଥିଲା। ବର୍ତ୍ତମାନ ଫିଲ୍ମର ନୂଆ ରିଲିଜ ଡେଟ ସାମ୍ନାକୁ ଆସିଛି। ଫିଲ୍ମ କ୍ରିଟିକ ଏବଂ ଟ୍ରେଡ ଆନାଲିଷ୍ଟ ତରଣ ଆଦର୍ଶ ଟ୍ବିଟରେ ଏହାର ସୂଚନା ଦେଇଛନ୍ତି।
ସେ 'ମମ'ର ପୋଷ୍ଟର ସେୟାର କରି କ୍ୟାପସନରେ ଲେଖିଛନ୍ତି ଯେ ଶ୍ରୀଦେବୀଙ୍କ ବହୁ ଚର୍ଚ୍ଚିତ ଫିଲ୍ମ 'ମମ' ଚୀନରେ ମେ 10ରେ ରିଲିଜ ହେବାକୁ ଯାଉଛି। ଯାହା ଜି ଷ୍ଟୁଡିଓ ଦ୍ବାରା କରାଯିବ।
ପ୍ରକାଶ ଥାଉକି କ୍ରାଇମ, ଡ୍ରାମା ଉପରେ ଆଧାରିତ 'ମମ' ଫିଲ୍ମଟି ଭାରତରେ 2017 ଜୁଲାଇ 7ରେ ରିଲିଜ ହୋଇଥିଲା। ଫିଲ୍ମରେ ଶ୍ରୀଦେବୀଙ୍କ ବ୍ୟତୀତ ଅଭିନେତା ଅକ୍ଷୟ ଖାନ୍ନା, ନୱାଜୁଦ୍ଦୀନ ସିଦ୍ଦିକୀ ଏବଂ ପାକିସ୍ତାନୀ ଅଭିନେତା ଅଦନାନ ସିଦ୍ଦିକୀ, ସଜଲ ଅଲି ମୁଖ୍ୟ ଭୂମିକାରେ ନଜର ଆସିଥିଲେ।
'ମମ' ଫିଲ୍ମଟି ଶ୍ରୀଦେବୀଙ୍କ ଶେଷ ଫିଲ୍ମ ଥିଲା, ଯେଉଁଥିରେ ସେ ମୁଖ୍ୟ ଭୂମିକାରେ ଦେଖାଯାଇଥିଲେ। ତାଙ୍କ ମୃତ୍ୟୁ 2018 ଫେବୃଆରୀରେ ହୃଦଘାତ ଯୋଗୁଁ ହୋଇଥିଲା।
ଫିଲ୍ମଟିକୁ ଦର୍ଶକ ଖୁବ୍ ପସନ୍ଦ ମଧ୍ୟ କରିଥିଲେ। ଏହାସହ ଶ୍ରୀଦେବୀଙ୍କ ଅଭିନୟକୁ ଖୁବ୍ ପ୍ରଶଂସା ମିଳିଥିଲା। ଅନ୍ୟପଟେ ଫିଲ୍ମଟି ଦୁଇଟି ନ୍ୟାସନାଲ ଆୱାର୍ଡ ମଧ୍ୟ ଜିତିଥିଲା। ବେଷ୍ଟ ଆକ୍ଟ୍ରେସ ରୂପେ ଶ୍ରୀଦେବୀ ଆୱାର୍ଡ ପାଇଥିବାବେଳେ ବେଷ୍ଟ ବ୍ୟାକଗ୍ରାଉଣ୍ଡ ସ୍କୋର ପାଇଁ ଏ.ଆର ରହମାନ ଆୱାର୍ଡ ପାଇଥିଲେ।
ଫିଲ୍ମଟି Poland, Czech, Russia, UAE, UK, USA and Singaporeରେ ପୂର୍ବରୁ ରିଲିଜ ହୋଇସାରିଛି।
