ମୁମ୍ବାଇ: ଅଗଷ୍ଟ 30ରେ ଶ୍ରଦ୍ଧା କପୁରଙ୍କ ‘ସାହୋ’ ଏବଂ ନିକଟରେ ରିଲିଜ ହୋଇଥିବା ତାଙ୍କ ଅଭିନୀତ ଫିଲ୍ମ ‘ଛିଛୋରେ’ ଦର୍ଶକଙ୍କ ମନ କିଣିବାରେ ସଫଳ ହୋଇଛି । ‘ସାହୋ’ ବିଶ୍ବ ସ୍ତରରେ 402 କୋଟି ଆୟ କରିଥିବା ବେଳେ ‘ଛିଛୋରେ’ ମଧ୍ୟ 100 କୋଟିରେ ସାମିଲ ହୋଇସାଇଛି । ଯାହାକୁ ନେଇ ଖୁସି ଶ୍ରଦ୍ଧା ।
ଇତିମଧ୍ୟରେ ସେ ଏକ ସାକ୍ଷାତକାରରେ ଯୋଗ ଦେଇଥିବାର ନଜର ଆସିଥିଲେ । ଆଉ ତାଙ୍କ ଅନୁଯାଯୀ ସଫଳତା ଏବଂ ଅସଫଳତା ଜଣେ କଳାକାର ଜୀବନର ଗୋଟିଏ ଅଂଶ । ତେଣୁ ନକାରତ୍ମକ ପ୍ରସଙ୍ଗକୁ ନିଜ ଉପରେ ଆଣିବା କଥା ନୁହେଁ ।
ସେ କହିଥିଲେ ଯେ ଜଣେ ଅଭିନେତ୍ରୀ ରୂପେ ଆପଣଙ୍କୁ ଆଲୋଚନାର ସାମ୍ନା କରିବାକୁ ପଡିବ । ବର୍ତ୍ତମାନ ‘ସାହୋ’ ଫିଲ୍ମକୁ ଦର୍ଶକ ଖୁବ୍ ପସନ୍ଦ କରୁଛନ୍ତି । କିନ୍ତୁ ରିଲିଜ ସମୟରେ ଫିଲ୍ମର ଖୁବ୍ ଆଲୋଚନା ହୋଇଥିଲା । ସେ ଯେଉଁ ବି କାମ କରିବେ ତାର ଆଲୋଚନା ନିହାତି ହେବ । ତଥାପି ସେ ନିଜ କାମ କରିବାକୁ କେବେ ମଧ୍ୟ ପଛଘୁଞ୍ଚା ଦେବ ନାହିଁ । କାରଣ କିଛି ଲୋକ ଆପଣଙ୍କୁ ଭଲ କହୁଥିବା ବେଳେ ଆଉ କିଛି ଆପଣଙ୍କ ବିଷୟରେ ଖରାପ କହୁଥିବେ । ତେବେ ଏମାନଙ୍କ କଥାର ପ୍ରଭାବ ନିଜ ଉପରେ ପକାଇବାର କୌଣସି ଆବଶ୍ୟକ ନାହିଁ ।
ସେହିପରି ସେ ‘ଛିଛୋରେ’ ଫିଲ୍ମକୁ ନେଇ ନିଜ ଖୁସି ଜାହିର କରିଥିଲେ ଶ୍ରଦ୍ଧା । ଆଉ କହିଥିଲେ ଯେ ସେ ସବୁବେଳେ ଏପରି ଫିଲ୍ମ କରିବାକୁ ଚେଷ୍ଟା କରନ୍ତି । ଯେଉଁ ଚରିତ୍ରରେ ସେ ନିଜକୁ ଖାପଖୁଆଇ ପାରିବେ ।
ପ୍ରକାଶ ଥାଉକି ବରୁଣ ଧୱନଙ୍କ ସହ ‘ଷ୍ଟ୍ରିଟ ଡାନ୍ସର 3 ଡି’ ନେଇ ପରଦାରେ ନଜର ଆସିବେ ଶ୍ରଦ୍ଧା କପୁର । ଫିଲ୍ମର ନିର୍ଦ୍ଦେଶନା ଦାୟିତ୍ବ ତୁଲାଇଛନ୍ତି ରେମୋ ଡିସୁଜା । ଏହାପୂର୍ବରୁ ବରୁଣ ଓ ଶ୍ରଦ୍ଧା ଏକାଠି ‘ଏବିସିଡି 2’ରେ କାମ କରିସାରିଛନ୍ତି ।
