ମୁମ୍ବାଇ: ପୁଅକୁ ଦେଖିବାକୁ ଜେଲରେ ପହଞ୍ଚିଲେ କିଙ୍ଗ ଖାନ । ଆଜି(ଗୁରୁବାର) ସକାଳୁ ବଲିଉଡ ସୁପରଷ୍ଟାର ଶାହାରୁଖ ଖାନ ପୁଅ ଆର୍ଯ୍ୟନଙ୍କୁ ଦେଖା କରିବାକୁ ଆର୍ଥର ରୋଡ ଜେଲକୁ ଯାଇଛନ୍ତି । ଯେଉଁଠି ଗତ ୧୪ ଦିନ ହେଲା ଆର୍ଯ୍ୟନ କ୍ରୁଜ ଡ୍ରଗ୍ସ ପାର୍ଟି ମାମଲାରେ ଗିରଫ ହୋଇ ଅଛନ୍ତି ।
ଉଲ୍ଲେଖଯୋଗ୍ୟ, ଗତକାଲି(ବୁଧବାର) କୋର୍ଟରେ ଆର୍ଯ୍ୟନଙ୍କ ବେଲ୍ ଆବେଦନର ଶୁଣାଣି ଥିଲା । ଯାହାକୁ ଖାରଜ କରିଛନ୍ତି କୋର୍ଟ । ଆର୍ଯ୍ୟନଙ୍କ ସମେତ ଅରବାଜ ମର୍ଚାଣ୍ଟ ଏବଂ ମୁନମୁନ ଧମେଚାଙ୍କ ଜାମିନ ଆବେଦନ ମଧ୍ୟ ଖାରଜ ହୋଇଛି । ଯେଉଁ କାରଣରୁ ବର୍ତ୍ତମାନ ଶାହାରୁଖ ଖାନଙ୍କ ପୁଅ ଆର୍ଯ୍ୟନ ଖାନଙ୍କୁ ଏବେ ଜେଲରେ ରହିବାକୁ ପଡ଼ିବ।
ଦୀର୍ଘ ଦିନ ହେଲା ପୁଅ ଜେଲରେ ଥିବାବେଳେ ଶାହାରୁଖ ଖାନ ଚିନ୍ତାଗ୍ରସ୍ତ ରହିଛନ୍ତି । ଏପରିସ୍ଥଳେ ପୁଅର ବେଲ୍ ଆବେଦନ ଖାରଜ ପରେ କିଙ୍ଗ ଖାନକୁ ବଡ ଝଟକା ଲାଗିଛି । ଆର୍ଯ୍ୟନଙ୍କୁ ଆଉ କିଛି ଦିନ ଜେଲରେ ରହିବାକୁ ଥିବାବେଳେ ଆଜି ଶାହାରୁଖ ପୁଅକୁ ଦେଖା କରିବାକୁ ଜେଲରେ ପହଞ୍ଚିଛନ୍ତି ।
ଉଲ୍ଲେଖଯୋଗ୍ୟ, ଅକ୍ଟୋବର ୨ ତାରିଖରେ କ୍ରୁଜ ଡ୍ରଗ୍ସ ପାର୍ଟି ମାମଲାରେ ଆର୍ଯ୍ୟନ ଖାନ ଏବଂ ଅନ୍ୟ ଅଭିଯୁକ୍ତଙ୍କୁ ପଚରାଉଚରା ପରେ ଗିରଫ କରିଥିଲା ଏନସିବି ।
ବ୍ୟୁରୋ ରିପୋର୍ଟ, ଇଟିଭି ଭାରତ
