ମୁମ୍ବାଇ: ଦବଙ୍ଗ ବୟ ସଲମାନ ଖାନ ନିଜର ଆଗାମୀ ଆକ୍ସନ ଫିଲ୍ମ ‘ଦବଙ୍ଗ 3’ର ପ୍ରସ୍ତୁତିରେ ଲାଗିପଡିଛନ୍ତି । ନିକଟରେ ଫିଲ୍ମର ଏକ ଦମଦାର ମୋଶନ ପୋଷ୍ଟର ରିଲିଜ କରିଥିଲେ ଦବଙ୍ଗ ମେକର୍ସ । ଯେଉଁଥିରେ ଚୁଲବୁଲ ପାଣ୍ଡେ ଅନ୍ଦାଜରେ ସଲମାନ ଦର୍ଶକଙ୍କୁ ନିଜ ସ୍ବାଗତ କରିବାକୁ କହିଥିଲେ । ତାଙ୍କ ଫ୍ୟାନ୍ସ ଫିଲ୍ମକୁ ନେଇ ଖୁବ୍ ଏକ୍ସାଇଟେଡ । ଖ୍ରୀଷ୍ଟମାସରେ ରିଲିଜ ହେବାକୁ ଯାଉଥିବା ଏହି ଫିଲ୍ମ ପାଇଁ ସଲମାନ ଖୁବ୍ ପରିଶ୍ରମ କରିଛନ୍ତି ।
ଆଉ ‘ଦବଙ୍ଗ 3’ ସଲମାନଙ୍କ ପ୍ରଥମ ଏମିତି ଫିଲ୍ମ ଯାହା ହିନ୍ଦୀ ସହ ତେଲୁଗୁ, ତାମିଲ, କନ୍ନଡରେ ରିଲିଜ ହେବ । କିନ୍ତୁ ସବୁଠାରୁ ମୁଖ୍ୟ କଥା ହେଲା କି ଫିଲ୍ମ ପାଇଁ ସଲମାନ କନ୍ନଡ, ତେଲୁଗୁ ଏବଂ ତାମିଲ ଭାଷାର ଟ୍ରେନିଂ ନେଇଛନ୍ତି । ଆଜ୍ଞା ହଁ, ଏହାର ମୋଶନ ପୋଷ୍ଟରରେ ସଲମାନ ତେଲୁଗୁ, ତାମିଲ ଓ କନ୍ନଡ କହୁଥିବାର ନଜର ଆସିଥିଲେ ।
ପ୍ରକାଶ ଥାଉକି ‘ଦବଙ୍ଗ 3’ରେ ଭିଲେନ ରୂପେ ନଜର ଆସିବେ ସାଉଥ ହିରୋ କିଚ୍ଚା ସୁଦୀପ । ଖାଲି ଏତିକି ନୁହେଁ ଏଥର ଦର୍ଶକ ଚୁଲବୁଲ ପାଣ୍ଡେଙ୍କ ଯୁବ ଭୂମିକା ମଧ୍ୟ ଦେଖିବେ । ଯାହା ପାଇଁ ନିଜ ଶରୀର ଓଜନ କମ କରିଛନ୍ତି ସଲମାନ । ସେହିପରି ଫିଲ୍ମରେ ନିର୍ଦ୍ଦେଶନା ଦାୟିତ୍ବ କୋରିଓଗ୍ରାଫର, ଅଭିନେତା ପ୍ରଭୁଦେବା ତୁଲାଉଛନ୍ତି । ପୁଣି ସଲମାନ ଓ ସୋନାକ୍ଷୀ ସିହ୍ନାଙ୍କ ରୋମାନ୍ସ ‘ଦବଙ୍ଗ 3’ରେ ନଜର ଆସିବ ।
