ମୁମ୍ବାଇ: ଇଦ ଅବସରରେ ଭାଇଜାନ ସଲମାନ ଭାଇ ଏବର୍ଷ ବହୁ ଚର୍ଚ୍ଚିତ ଫିଲ୍ମ ‘ରାଧେ’ ରିଲିଜ କରି ଫ୍ୟାନ୍ସଙ୍କୁ ଇଦି ଦେଇଛନ୍ତି । ଯାହାକୁ ନେଇ ଉତ୍ସାହିତ ସମସ୍ତେ । ଗତ ବର୍ଷ ଇଦରେ ରିଲିଜ ହୋଇପାରିନଥିଲା ଏହି ଫିଲ୍ମ । ଫିଲ୍ମକୁ ମିଶ୍ରିତ ପ୍ରତିକ୍ରିୟା ମିଳୁଥିବା ବେଳେ ସଲମାନଙ୍କ ପ୍ରଶଂସା କରିଛନ୍ତି ତାଙ୍କ ରିୟୁମର ଗାର୍ଲଫ୍ରେଣ୍ଡ ୟୁଲିୟା ବନ୍ତୁର।
ସେ ସଲମାନଙ୍କ ବିଷୟରେ ଆଲୋଚନା କରି କହିଛନ୍ତି, ‘ସଲମାନ ହେଉଛି ମାନବିକତାର ପରିଭାଷା | କାରଣ ସେ ଯାହା କରନ୍ତି ତାହା କେବଳ ଅନ୍ୟ ଲୋକଙ୍କ ଜୀବନରେ ଉନ୍ନତି ଆଣିବାକୁ ବିଚାର କରନ୍ତି । ସେ ସର୍ବଦା ଲୋକଙ୍କୁ ସାହାଯ୍ୟ କରନ୍ତି ଏବଂ ଜୀବନରେ ସମସ୍ତଙ୍କ ପାଇଁ କିଛି ଭିନ୍ନ କିମ୍ବା ନୂତନ କରିବାକୁ ଚେଷ୍ଟା କରନ୍ତି | ମୁଁ ତାଙ୍କ ସହିତ କାମ କରି ଖୁସି ଅନୁଭବ କରୁଛି । ପ୍ରକୃତରେ ଯାହା ଖୁବ୍ ଏଣ୍ଟରଟେନିଂ ଥିଲା ।’
ସେହିପରି ଫିଲ୍ମର ଗୀତ ‘ସିଟି ମାର’ ବିଷୟରେ ୟୁଲିୟା କହିଛନ୍ତି, ‘ମୁଁ ଏହାକୁ ବହୁତ ଏନଜୟ କଲି, କାରଣ ମୁଁ ଏହାକୁ ଅଭ୍ୟାସ କରୁଥିଲି ଏବଂ ମୁଁ ଜାଣି ନଥିଲି ଯେ ସେ ଫିଲ୍ମ ପାଇଁ ସମାନ ରେକର୍ଡିଂ ମଧ୍ୟ ବ୍ୟବହାର କରିବେ ।’
ପ୍ରକାଶ ଥାଉକି ‘ରାଧେ’ ଫିଲ୍ମର ଏହି ଗୀତକୁ ଗାଇଛନ୍ତି ୟୁଲିୟା । ସଲମାନଙ୍କ ବ୍ୟତୀତ ଫିଲ୍ମରେ ଦିଶା ପଟାନୀ, ରଣଦୀପ ହୁଡ୍ଡା ଓ ଜ୍ୟାକି ଶ୍ରଫଙ୍କୁ ଦେଖିବାକୁ ମିଳୁଛି । ସେହିପରି ଫିଲ୍ମର ନିର୍ଦ୍ଦେଶନା ଦାୟିତ୍ବ ତୁଲାଇଛନ୍ତି ପ୍ରଭୁଦେବା ।
