ମୁମ୍ବାଇ: ଘଟିଛି ସମସ୍ତ ପ୍ରତିକ୍ଷାର ଅନ୍ତ । ଆସିଲା ବର୍ଷର ସବୁଠାରୁ ବଡ ଫିଲ୍ମର ଟ୍ରେଲର । ଯାହାକୁ ଦର୍ଶକଙ୍କ ତରଫରୁ ମିଳୁଛି ଜୋରଦାର ରେସପନ୍ସ । ମୁମ୍ବାଇରେ ରିଲିଜ ହୋଇଛି ସାହୋ ଫିଲ୍ମର ଟ୍ରେଲର ।
ଧମାକାଦାର ଆକ୍ସନ ସହ ସସ୍ପେନ୍ସ । ଚମତ୍କାର ଗ୍ରାଫିକ୍ସ ଓ ଭିଜୁଆଲ । ଜବରଦସ୍ତ ଲୋକେସନ୍ । ତାହା ସାଙ୍ଗକୁ ଚୁଲ୍ବୁଲି ଶ୍ରଦ୍ଧା ଓ ଡାସିଙ୍ଗ୍ ପ୍ରଭାସଙ୍କ ରୋମାନ୍ସ ଲଗାଇଛି ଚାରଚାନ୍ଦ । ପୁଣି ଫ୍ୟାନ୍ସଙ୍କ ଏକ୍ସସାଇଟ୍ମେଣ୍ଟ ବଢାଇଛି ପ୍ରଭାସଙ୍କ ସିକ୍ସ ପ୍ୟାକ୍ ଲୁକ ପାଇଁ । ସବୁକିଛି ଦେଖିବାକୁ ମିଳିଛି କେବଳ ଗୋଟିଏ ଟ୍ରେଲରରେ ।
ଫିଲ୍ମରେ ମୁଖ୍ୟ ଭୂମିକାରେ ଅଛନ୍ତି ସାଉଥ୍ ସୁପରଷ୍ଟାର ପ୍ରଭାସ । ସେପଟେ ବିଟାଉନ ଅଭିନେତ୍ରୀ ଶ୍ରଦ୍ଧା ସାହୋ ଜରିଆରେ ପ୍ରଥମ ଥର ପାଇଁ ସାଉଥ୍ ଇଣ୍ଡଷ୍ଟ୍ରୀରେ ଡେବ୍ୟୁ କରିବେ । ତେବେ ଫିଲ୍ମକୁ ‘ବାହୁବଲୀ’ ଭଳି ହିଟ୍ କରିବା ପାଇଁ ପ୍ରଭାସ ପ୍ରଥମ ଥର ପାଇଁ ହିନ୍ଦୀରେ ନିଜ ସଂଳାପ ମଧ୍ୟ କହିଛନ୍ତି । ଫିଲ୍ମଟିକୁ ବଲିଉଡର ଅନ୍ୟତମ ଶ୍ରେଷ୍ଠ ଆକ୍ସନ ଫିଲ୍ମ ବୋଲି କୁହାଯାଉଛି ।
ଏଠାରେ ସୂଚନାଯୋଗ୍ୟ, ଟ୍ରେଲରଟି ହିନ୍ଦୀ, ତାମିଲ, ତେଲୁଗୁ ଓ ମାଲୟାଲମ ଭାଷାରେ ରିଲିଜ୍ ହୋଇଛି । ସବୁଠାରୁ ବଡ଼ କଥା ହେଲା ଫିଲ୍ମ ପାଇଁ ଡବିଂ ନ କରାଯାଇ ଏହି ୪ଟି ଭାଷାରେ ଫିଲ୍ମକୁ ସୁଟ୍ କରାଯାଇଛି । ତେବେ ଏପର୍ଯ୍ୟନ୍ତ ଟ୍ରେଲରକୁ 7 ଲକ୍ଷରୁ ଅଧିକ ଲୋକ ଦେଖି ସାରିଛନ୍ତି । ପ୍ରଥମରୁ ଫିଲ୍ମର ରିଲିଜ ଡେଟ 15 ଅଗଷ୍ଟ ଥିବାବେଳେ ଏବେ ଏହାକୁ ପରିବର୍ତ୍ତନ କରାଯାଇ 30 ଅଗଷ୍ଟ ରଖାଯାଇଛି ।
