ମୁମ୍ବାଇ: ଅଭିନେତ୍ରୀ ରବୀନା ଟଣ୍ଡନ ଦୀର୍ଘସମୟରୁ ଫିଲ୍ମ ଠାରୁ ଦୂରେଇ ଅଛନ୍ତି । କିନ୍ତୁ ସେ ଛୋଟ ପରଦାର ପପୁଲାର ଡାନ୍ସ ଶୋ ‘ନଚ ବଲିଏ’ ସିଜନ-9ରେ ଜଜ ଭୂମିକାରେ ନଜର ଆସୁଛନ୍ତି । ବର୍ତ୍ତମାନ ସେ ନିଜର ଏକ ଟ୍ବିଟକୁ ନେଇ ଚର୍ଚ୍ଚାରେ । ତାଙ୍କର ଏହି ଟ୍ବିଟ ବିହାର ସରକାରଙ୍କୁ ନେଇ କରାଯାଇଛି।
ଯେଉଁଥିରେ ଗୋଟିଏ ସରକାରୀ ନିଷ୍ପତ୍ତିକୁ ବିରୋଧ କରୁଥିବାର ଦେଖାଯାଉଛନ୍ତି । ଏହାସହ ସେ ବନ୍ୟ ଜୀବଜନ୍ତୁ ପ୍ରତି ସହାନୁଭୂତି ପ୍ରକାଶ କରିଛନ୍ତି । ନିକଟରେ ବିହାରରେ ଫସଲ ସୁରକ୍ଷାକୁ ଦୃଷ୍ଟିରେ ରଖି ରାଜ୍ୟ ସରକାର ନୀଳ ଗାଈକୁ ମାରିବାକୁ ଆଦେଶ ଦେଇଛନ୍ତି । ଏହି ଆଦେଶ ଆସିବା ପରେ ବିହାରର ବୈଶାଳୀ ଜିଲ୍ଲାରେ ମାତ୍ର ଚାରି ଦିନ ମଧ୍ୟରେ ପାଖାପାଖି 300 ନୀଳ ଗାଈକୁ ମାରିଦିଆ ଗଲାଣି । ବନ ବିଭାଗ ଏହି କାମ କରିବାରେ ଲାଗିଛି ।
ଜଣେ ଅଧିକାରୀ କହିଛନ୍ତି କି ଫସଲର ସୁରକ୍ଷା ପାଇଁ ନୀଳ ଗାଈକୁ ମାରିବା ନିହାତି ଦରକାର । ଏହି ଆଦେଶ ପରେ ବୈଶାଳୀରୁ ଆଶ୍ଚର୍ଯ୍ୟକର ଖବର ସାମ୍ନାକୁ ଆସିଥିଲା । ଯେଉଁଥିରେ ଗୋଟିଏ ନୀଳ ଗାଈକୁ ଜିଅନ୍ତା ପୋତି ଦିଆଗଲା। ଏ ଘଟଣାର ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଛି । ଯାହା ଉପରେ ପ୍ରତିକ୍ରିୟା ରଖିଛନ୍ତି ରବୀନା ।
ସେ ଟ୍ବିଟରରେ ଭିଡିଓକୁ ସେୟାର କରି ଲେଖିଛନ୍ତି, ‘ଯିଏ ମଧ୍ୟ ଏପରି କାର୍ଯ୍ୟ କରିବାକୁ ନିଷ୍ପତ୍ତି ନେଇଛି, ସେ ଅମଣିଷ। ମୁଁ ଆଶା କରୁଛି କି ସେହି ବ୍ୟକ୍ତିଙ୍କୁ ନିଜ କର୍ମର ଫଳ ନିହାତି ଭୋଗିବାକୁ ପଡିବ। ’
