ମୁମ୍ବାଇ: ଫେମସ ରାଜକୁମାର ରାଓଙ୍କ ଅପକମିଂ ଫିଲ୍ମ ‘ଛଲାଙ୍ଗ’ରେ ଅନେକ ପରିବର୍ତ୍ତନ କିଛିଦିନ ହେବ ଦେଖିବାକୁ ମିଳୁଛି । ପ୍ରଥମେ ଫିଲ୍ମର ନାମ ‘ତୁର୍ରମ ଖାନ’ ବଦଳାଇ ‘ଛଲାଙ୍ଗ’ ରଖାଯାଇଥିଲା। ଏହାପରେ ଏବେ ଫିଲ୍ମର ରିଲିଜ ତାରିଖକୁ ମଧ୍ୟ ପରିବର୍ତ୍ତନ କରିଦେଇଛନ୍ତି ମେକର୍ସ। ପୂର୍ବରୁ ଫିଲ୍ମକୁ ଜାନୁଆରୀରେ ରିଲିଜ ହେବାର ଥିଲା । ହେଲେ ଦର୍ଶକଙ୍କୁ ଆଉ କିଛି ମାସ ଅପେକ୍ଷା କରିବାକୁ ପଡିବ। କାରଣ ଫିଲ୍ମ ଜୁନ ମାସରେ ରିଲିଜ ହେବାକୁ ଯାଉଛି।
ଫିଲ୍ମ କ୍ରିଟିକ ତରଣ ଆଦର୍ଶ ଟ୍ବିଟରରେ ଦର୍ଶକଙ୍କୁ ଫିଲ୍ମର ନୂଆ ରିଲିଜ ତାରିଖ ବିଷୟରେ ସୂଚନା ଦେଇଛନ୍ତି । ସେ ଏକ ଟ୍ବିଟ କରି ଲେଖିଛନ୍ତି, ‘ରାଜକୁମାର ରାଓ ଓ ନୁସରତ ଭରୁଚାଙ୍କ ଫିଲ୍ମ ଛଲାଙ୍ଗର ନୂଆ ପୋଷ୍ଟର ଓ ନୂଆ ରିଲିଜ ତାରିଖ ସାମ୍ନାକୁ ଆସିଯାଇଛି । ଏବେ ଫିଲ୍ମଟି ଜୁନ 12ରେ ରିଲିଜ ହେବାକୁ ଯାଉଛି ।’
ପ୍ରକାଶ ଥାଉକି ଛଲାଙ୍ଗର ନିର୍ଦ୍ଦେଶନା ଦାୟିତ୍ବ ତୁଲାଇଛନ୍ତି ହଂସଲ ମେହତା । ସେହିପରି ଫିଲ୍ମର ପ୍ରଯୋଜନା ଅଜୟ ଦେବଗନ, ଲଭ ରଞ୍ଜନ ଓ ଅଙ୍କୁର ଗର୍ଗ ମିଶି କରୁଛନ୍ତି । ଟି-ସିରିଜ ଦ୍ବାରା ପ୍ରସ୍ତୁତ ଏହି ଫିଲ୍ମରେ ମହମ୍ମଦ ଜୀଶାନ ଆୟୁବ ଖାନ ମୁଖ୍ୟ ଭୂମିକାରେ ନଜର ଆସିବେ ।
ହଂସଲଙ୍କ ସହ ରାଜକୁମାର ଷଷ୍ଠ ଫିଲ୍ମ । ଏହି ଯୋଡି ‘ଶାହିଦ’, ‘ସିଟି ଲାଇଟ୍ସ’, ‘ଅଲିଗଢ’, ‘ଓମୋର୍ଟା’ ଓ ୱେବ ସିରିଜ ‘ବୋସ: ଡେଡ/ଅଲାଇଭ’ ଭଳି ପ୍ରୋଜେକ୍ଟରେ କାମ କରିସାରିଛନ୍ତି।
