ଆମେରିକା: ପୁଣି ସାପ ଆତଙ୍କ । ବଲିଉଡ ସୁପରଷ୍ଟାର ସଲମାନ ଖାନଙ୍କ ପରେ ୨୧ ବର୍ଷୀୟା ଇଣ୍ଟରନ୍ୟାସନାଲ୍ ସିଙ୍ଗର ମେଟାଙ୍କୁ କାମୁଡିଲା ସାପ । ସିଙ୍ଗର ମେଟା ସୋସିଆଲ ମିଡିଆରେ ତାଙ୍କର ଏକ ଫଟୋସୁଟର ଏକ ଭିଡିଓ ସେୟାର କରିଛନ୍ତି । ଏହି ଭୟାନକ ଭିଡିଓ ସେୟାର କରି ସିଙ୍ଗର କ୍ୟାପସନରେ ଲେଖିଛନ୍ତି, ଆଉ କେବେ ନୁହେଁ । ସୋସିଆଲ ମିଡିଆ ପ୍ଲାଟଫର୍ମ ଟ୍ବିଟରରେ ମେଟା ଏହି ଭିଡିଓ ସେୟାର କରିଛନ୍ତି।
ସାମ୍ନାକୁ ଆସିଥିବା ଏହି ଭିଡିଓରେ ସିଙ୍ଗର ଏକ ଫଟୋ ସୁଟ୍ କରୁଥିବା ଦେଖିବାକୁ ମିଳିଛି | ସୁଟ୍ ପାଇଁ ସେ ସାପ ସହିତ ପୋଜ୍ ଦେଉଥିବା ନଜର ଆସିଛନ୍ତି। ଏହି ସମୟରେ, କଳା ରଙ୍ଗର ଏକ ସାପ ହଠାତ୍ ତାଙ୍କ ଓଠକୁ କାମୁଡ଼ିଥିଲା । ମେଟା ଭୟଭୀତ ହୋଇ ସଙ୍ଗେ ସଙ୍ଗେ ସାପକୁ ଧରି ଫିଙ୍ଗିଦେଇଥିଲେ । ସୌଭାଗ୍ୟ ବଶତଃ ଏହି ସାପକୁ ଫଟୋସୁଟରେ ବ୍ୟବହାର କରାଯାଉଥିବାରୁ ଏହା ବିଷାକ୍ତ ନଥିଲା ।
ଫଟୋ ସୁଟ୍ ପାଇଁ ମେଟା ତଳେ ଶୋଇଥିଲେ। ଏହା ସହିତ କିଛି ସାପ ମଧ୍ୟ ସେମାନଙ୍କ ଉପରେ ରଖାଯାଇଥିବା ଦେଖାଯାଇଥିଲା | ଏହି ସମୟରେ ସେ ଏକ କଳା ରଙ୍ଗର ପୋଷାକ ପିନ୍ଧିଥିଲେ । ଏହି ସମୟରେ, ତାଙ୍କ ଉପରେ ଏକ ଧଳା ରଙ୍ଗର ସାପ ରଖାଯିବା ମାତ୍ରେ ପୂର୍ବରୁ ଥିବା କଳା ରଙ୍ଗର ସାପ ତାଙ୍କୁ କାମୁଡ଼ି ଥିଲା । ମେଟା ଏହି ଭିଡିଓକୁ ନିଜ ଇନଷ୍ଟାଗ୍ରାମ ଆକାଉଣ୍ଟରେ ସେୟାର କରିଛନ୍ତି। ସେ ନିଜ ଇନ୍ଷ୍ଟାଗ୍ରାମରେ ଲେଖିଛନ୍ତି, ‘ଆପଣ ସମସ୍ତଙ୍କ ଲାଗି ଭିଡିଓ ତିଆରି କରିବା ପାଇଁ ମୋତେ କ’ଣ କ’ଣ କରିବାକୁ ପଡୁଛି ।’
ସୂଚନାଯୋଗ୍ୟ ଯେ, ମେଟା ଲୋକପ୍ରିୟ ହଲିଉଡ ଗୀତ ‘ବିଚ୍ ଡୋଣ୍ଟ ବି ମେଡ୍’ ଗାଇଛନ୍ତି। ଏହି ଗୀତ ତାଙ୍କୁ ଏକ ଭିନ୍ନ ପରିଚୟ ଦେଇଛି। ନିକଟରେ ସେ ମ୍ୟୁଜିକ ଭିଡିଓ ଆଲବମ୍ ‘ହ୍ୟାବିଟ୍ସ’ରେ ମଧ୍ୟ ଡେବ୍ୟୁ କରିଛନ୍ତି। ତେବେ ଗତ ଶନିବାର ରାତିରେ ସଲମାନ ଖାନ୍ ସାପ କାମୁଡାରେ ଆହତ ହୋଇଥିଲେ । ପନଭେଲ ସ୍ଥିତ ଫାର୍ମହାଉସରେ ଏହି ଘଟଣା ଘଟିଥିଲା । ସାପ କାମୁଡିବା ମାତ୍ରେ ସଲମାନ ଖାନକୁ ହସ୍ପିଟାଲରେ ଭର୍ତ୍ତି କରାଯାଇଥିଲା । ତେବେ ସାପଟି ଅଧିକ ବିଷାକ୍ତ ହୋଇନଥିବା ଯୋଗୁଁ ସଲମାନଙ୍କ କୌଣସି କ୍ଷତି ହୋଇନଥିଲା ।
