ନୂଆଦିଲ୍ଲୀ: ଗତକାଲି ଅର୍ଥାତ ମେ 30ରେ ପ୍ରଧାନମନ୍ତ୍ରୀଙ୍କ ଶପଥ ଗ୍ରହଣ ଉତ୍ସବରେ ଯୋଗ ଦେଇଥିଲେ 7000ରୁ ଉର୍ଦ୍ଧ୍ବ ଅତିଥି । ଆଉ ସେମାନଙ୍କ ମଧ୍ୟରୁ ପ୍ରଖ୍ୟାତ ଗାୟିକା ଆଶା ଭୋସଲେ ଅନ୍ୟତମ । କିନ୍ତୁ ଶପଥ ସମାରୋହ ପରେ ଭିଡରେ ଫସିଯାଇଥିଲେ ଆଶା, ଆଉ ଏହା ଦେଖି ସାହାଯ୍ୟ କରିବାକୁ ଆଗେଇ ଆସିଥିଲେ ସ୍ମୃତି ଇରାନୀ ।
ପ୍ରକାଶ ଥାଉକି, ଶପଥ ସମାରୋହ ପରେ ଭିଡ ହେବାକୁ ଲାଗିଥିଲା । ଆଉ ଭିଡରେ ଫସିଯାଇଥିଲେ ଆଶା । କିନ୍ତୁ ଭିଡରୁ ବାହାରିବାକୁ ସେଠାରେ ତାଙ୍କୁ କେହି ସାହାଯ୍ୟ କରିନଥିଲେ । କିଛି ସମୟ ପରେ ସ୍ମୃତି ଏହା ଦେଖି ଆଶାଙ୍କୁ ଭିଡରୁ ବାହାର କରି ତାଙ୍କୁ ସୁରକ୍ଷିତ ଭାବରେ ଘରକୁ ପଠାଇବାର ପ୍ରବନ୍ଧ କରିଥିଲେ ।
ଆଜି ସକାଳେ ଆଶା ନିଜ ସୋସିଆଲ ମିଡିଆ ଆକାଉଣ୍ଟରେ ସ୍ମୃତିଙ୍କ ସହ ଗୋଟିଏ ଫଟୋ ପୋଷ୍ଟ କରି ଲେଖିଛନ୍ତି, ‘ଶପଥ ଗ୍ରହଣ ଉତ୍ସବ ପରେ ଭିଡରେ ଫସିଯାଇଥିଲି । ସ୍ମୃତିଙ୍କ ବ୍ୟତୀତ ଆଉ କେହି ମୋତେ ସାହାଯ୍ୟ କରିବାକୁ ଆସିନଥିଲେ । ଯିଏକି ମୋତେ ଭିଡରୁ ବାହାର କରି ସୁରକ୍ଷିତ ଭାବରେ ଘରେ ପହଞ୍ଚିବାକୁ ସାହାଯ୍ୟ କରିଥିଲେ । ସେ ସମସ୍ତଙ୍କ କଥା ଚିନ୍ତା କରନ୍ତି, ସେଥିପାଇଁ ସେ ଜିତିଲେ ।’
ତେବେ ଆଶାଙ୍କର ଏହି ଟ୍ବିଟ ଦେଖି ସ୍ମୃତି ମଧ୍ୟ ତୁରନ୍ତ ଏହାର ଜବାବ ଦେଇଛନ୍ତି । ଜବାବରେ ସେ ନମସ୍କାରର ଇମୋଜୀ ପଠାଇଥିବାର ନଜର ଆସିଛି ।
