ମୁମ୍ବାଇ: ‘ଦଙ୍ଗଲ’ ଅଭିନେତ୍ରୀ ଜାଏରା ୱାସମୀ ନିକଟରେ ବଲିଉଡ ଛାଡିବା ଖବର ଦେଶରେ ଏକ ବଡ ପ୍ରସଙ୍ଗ ସାଜିଥିଲା । ଜାଏରା ଏକଦା ସୋସିଆଲ ମିଡିଆରେ ଏକ ନୋଟ ଲେଖି ବଲିଉଡ ଛାଡିବା କଥା କହିଥିଲେ । ଏହାପରେ ଆଉ କଣ ଥିଲା ତାଙ୍କ ବଲିଉଡ ଛାଡିବା ସମସ୍ତଙ୍କ ପାଇଁ ବଡ ପ୍ରଶ୍ନବାଚୀ ସୃଷ୍ଟି କରିଥିଲା । କାରଣ ସେ ନିଜ ଧର୍ମ ପାଇଁ ବଲିଉଡ ଛାଡିବା କଥା ପୋଷ୍ଟରେ ଲେଖିଥିଲେ । ସେ ପୋଷ୍ଟରେ କହିଥିଲେ କି ସେ ଅଭିନୟ କରିବା ଯୋଗୁ ନିଜ ଆଲ୍ଲାହଙ୍କ ଠାରୁ ଦୂରେଇ ଯାଉଛନ୍ତି । ଏହି କାରଣ ପାଇଁ ସେ ବଲିଉଡ ଛାଡିବାକୁ ଚାହୁଁଛନ୍ତି ।
ଏହି ପ୍ରସଙ୍ଗ ଉପରେ ବଲିଉଡର ଅନେକ କଳାକାର ନିଜ ନିଜର ପ୍ରତିକ୍ରିୟା ଦେଇ କିଏ ଏହାକୁ ପବ୍ଲିସିଟି ଷ୍ଟଣ୍ଟ କହିଥିଲେ ତ ଆଉ କିଏ ତାଙ୍କ ଇଚ୍ଛାକୁ ସମ୍ମାନ ଦେଇଥିଲେ । ଇତିମଧ୍ୟରେ ଫିଲ୍ମ ‘ଦଙ୍ଗଲ’ ନିର୍ଦ୍ଦେଶକ ନିତେଶ ତିୱାରୀ ପୁଣି ଜାୟରାଙ୍କୁ ନେଇ ଏକ ସାକ୍ଷାତକାରରେ ନିଜ ମନ କଥା କହିଛନ୍ତି ।
ନିକଟରେ ଏକ ସାକ୍ଷାତକାରରେ ଯୋଗ ଦେଇଥିବା ନିତେଶ କହିଥିଲେ କି ସେ ପୂର୍ବରୁ ଯାହା କହିଥିଲେ ଏବଂ ମଧ୍ୟ ସେହି କଥା କହୁଛନ୍ତି । ଜାୟରା ‘ଦଙ୍ଗଲ’ ଏବଂ ‘ସିକ୍ରେଟ ସୁପରଷ୍ଟାର’ ଭଳି ଫିଲ୍ମରେ ଶାନଦାର ଅଭିନୟ କରିଥିଲେ । ଜାୟରାଙ୍କ ବଲିଉଡ ଛାଡିବା ଖବର ଶୁଣି ସେ ବହୁତ ଦୁଃଖି ହୋଇଥିଲେ ।
କାରଣ ତାଙ୍କ ଭଳି ଟ୍ୟାଲେଣ୍ଟେଡ ଅଭିନେତ୍ରୀକୁ ହରାଇବା ତାଙ୍କ ପାଇଁ ଏବଂ ବଲିଉଡ ପାଇଁ ନିହାତି ଦୁଃଖର କଥା ଥିଲା । ଏହି ସବୁ କଥା ସତ୍ତ୍ବେ ଆମକୁ ଭାବିବାକୁ ପଡିବ କି ଆମେ ସମସ୍ତେ ପରିପକ୍ବ ଆଉ ସମସ୍ତଙ୍କୁ ନିଜ ଜୀବନ ବିଷୟରେ ଭାବିବାର ଅଧିକାର ଅଛି । ଯଦି ଆପଣ ଚାହୁଁନାହାଁନ୍ତି ଆପଣଙ୍କୁ କେହି ଆପଣଙ୍କ ଜୀବନ, କ୍ୟାରିୟ ବିଷୟରେ ପ୍ରଶ୍ନ କରୁନ୍ତୁ ବୋଲି । ତେବେ ଆପଣଙ୍କର ମଧ୍ୟ କୌଣସି ଅଧିକାର ନାହିଁ କାହାରିକୁ ପ୍ରଶ୍ନ କରିବାର ବୋଲି କହିଛନ୍ତି ନିତେଶ ।
