ମୁମ୍ବାଇ: ବଲିଉଡର ଭର୍ସାଟାଇଲ ଆକ୍ଟର ନୱାଜୁଦ୍ଦୀନ ସିଦ୍ଦିକୀ ବର୍ତ୍ତମାନ ନିଜର ଆଗାମୀ ଫିଲ୍ମ ‘ମୋତିଚୁର ଚକନାଚୁର’କୁ ନେଇ ଚର୍ଚ୍ଚାରେ । ପ୍ରଥମଥର ସେ ଫିଲ୍ମରେ ବି-ଟାଉନର ଆନ୍ନା ସୁନୀଲ ସେଟ୍ଟୀଙ୍କ ଲାଡଲୀ ଆଥିୟା ସେଟ୍ଟୀଙ୍କ ସହ ରୋମାନ୍ସ କରୁଥିବାର ନଜର ଆସିବେ । ଯାହାକୁ ନେଇ ଏକ୍ସାଇଟେଡ ଫ୍ୟାନ୍ସ । ଇତିମଧ୍ୟରେ ତାଙ୍କ ଫ୍ୟାନ୍ସଙ୍କ ପାଇଁ ଆଉ ଏକ ଗୁଡନ୍ୟୁଜ ସାମ୍ନାକୁ ଆସିଛି । ଖୁବଶୀଘ୍ର ନୱାଜୁଦ୍ଦୀନଙ୍କୁ ପୁଣି ଏକ ସମ୍ମାନରେ ସମ୍ମାନିତ କରାଯିବ ।
ଆଜ୍ଞା ହଁ, ଏଥର ତାଙ୍କୁ ଲେସ୍ଲୀ ହୋ ଏସିଆନ ଫିଲ୍ମ ଟ୍ୟାଲେଣ୍ଟ ଆୱାର୍ଡରେ ସମ୍ମାନିତ କରାଯିବ । ଏମାସ 23ରେ ସିଙ୍ଗାପୁରରେ ଆୟୋଜିତ ହେବାକୁ ଯାଉଥିବା ଇଣ୍ଟରନ୍ୟାସନାଲ ଫିଲ୍ମ ଫେଷ୍ଟିଭାଲ (ଏସଆଇଏଫଏଫ)ରେ ତାଙ୍କୁ ଏହି ପୁରସ୍କାର ଦିଆଯିବ । ନେଟଫ୍ଲିକ୍ସର ଫେମସ ୱେବ ସିରିଜ ‘ସାକ୍ରେଡ ଗେମ୍ସ’ରେ ଶାନଦାର ଅଭିନୟ ପାଇଁ ତାଙ୍କୁ ଏହି ପୁରସ୍କାର ମିଳିବ ।
ପ୍ରକାଶ ଥାଉକି ଏସଆଇଏଫଏଫ 30ତମ ସଂସ୍କରଣ ଏମାସ 21ରେ ଆରମ୍ଭ ହୋଇ ଆସନ୍ତା ମାସ 8ରେ ଶେଷ ହେବ । ସମାରୋହ ବ୍ୟତୀତ ନୱାଜୁଦ୍ଦୀନ ଫେଷ୍ଟିଭାଲରେ ଏକ କଥାବାର୍ତ୍ତା କାର୍ଯ୍ୟକ୍ରମରେ ଯୋଗ ମଧ୍ୟ ଦେବେ । ନିକଟରେ ନୱାଜୁଦ୍ଦୀନଙ୍କୁ ଗୋଲ୍ଡେନ ଡ୍ରାଗନ ଆୱାର୍ଡ କାର୍ଡିଫ ଇଣ୍ଟରନ୍ୟାସନାଲ ଫିଲ୍ମ ଫେଷ୍ଟିଭାଲରେ ମିଳିଥିଲା । ଏହି ଅବସରରେ ନୱାଜୁଦ୍ଦୀନ ଇନଷ୍ଟାଗ୍ରାମରେ ସମସ୍ତଙ୍କୁ ଧନ୍ୟବାଦ ଜଣାଇଥିଲେ ।
