ମୁମ୍ବାଇ: ଆଜିକାଲି ବଲିଉଡରେ ବାୟୋପିକ ଯୁଗ ଚାଲିଛି । ସିକ୍ବେଲ ଏବଂ ରିମେକ ଫିଲ୍ମ ଦେଖିବାକୁ ଖୁବ୍ ପସନ୍ଦ କରୁଛନ୍ତି ଦର୍ଶକ । ଗତ ଦୁଇବର୍ଷ ମଧ୍ୟରେ ଦର୍ଶକ ଅଧିକାଂଶ ବାୟୋପିକ ଦେଖିସାରିଲେଣି । ଏପରିକି ଅନେକ ସିକ୍ବେଲ ଫିଲ୍ମ ବଲିଉଡରେ ହିଟ୍ ସାବ୍ୟସ୍ତ ହୋଇସାରିଲାଣି ।
ଏବେ ଏହି ସିକ୍ବେଲ ଫିଲ୍ମ ତାଲିକାରେ ସାମିଲ ହୋଇଛି ଖିଲାଡି ଅକ୍ଷୟ କୁମାରଙ୍କ 2007ରେ ଆସିଥିବା ସାଇକୋଲଜିକାଲ ଥ୍ରିଲର ଫିଲ୍ମ 'ଭୁଲ ଭୁଲୈୟା' । ଏହି ଫିଲ୍ମର ନିର୍ଦ୍ଦେଶନା ଦେଇଥିଲେ ପ୍ରିୟଦର୍ଶନ ।
ଫିଲ୍ମକୁ ନେଇ ଖବର ସାମ୍ନାକୁ ଆସୁଛି ଯେ ଖୁବଶୀଘ୍ର ଏହାର ସିକ୍ବେଲ ପରଦାରେ ଦେଖିବାକୁ ମିଳିବ । ଆଉ ସମସ୍ତଙ୍କ ଫେଭରେଟ ଅଭିନେତା କାର୍ତ୍ତିକ ଆର୍ୟନ ଫିଲ୍ମରେ ଅକ୍ଷୟଙ୍କ ସ୍ଥାନରେ ନଜର ଆସିବେ ।
ପ୍ରକାଶ ଥାଉକି କାର୍ତ୍ତିକ ବର୍ତ୍ତମାନ ଦୁଇଟି ସିକ୍ବେଲ ଫିଲ୍ମରେ କାମ କରୁଛନ୍ତି । ପ୍ରଥମଟି ହେଲା ସୈଫ ଅଲ୍ଲୀ ଖାନଙ୍କ ଫିଲ୍ମ 'ଲଭ ଆଜ କଲ-2' । ଯେଉଁଥିରେ ସେ ସୈଫଙ୍କ ଲାଡଲୀ ତଥା ଅଭିନେତ୍ରୀ ସାରା ଅଲ୍ଲୀ ଖାନଙ୍କ ସହ ନଜର ଆସିବେ । ଆଉ ଅନ୍ୟଟି ହେଲା ଫିଲ୍ମ ନିର୍ମାତା କରନ ଜୋହରଙ୍କ 'ଦୋସ୍ତାନା-2' ।
ଖାଲି ଏତିକି ନୁହେଁ ସେ ଅଭିନେତ୍ରୀ ଭୂମି ପେଡନେକର ଓ ଅନନ୍ୟା ପାଣ୍ଡେଙ୍କ ସହ ପୁରୁଣା ଫିଲ୍ମ ପତି 'ପତ୍ନୀ ଔର ୱୋ'ର ରିମେକ ଫିଲ୍ମରେ ମଧ୍ୟ କାମ କରୁଛନ୍ତି । ଏହାବ୍ୟତୀତ କାର୍ତ୍ତିକ ଅନୀସ ବଜ୍ମୀଙ୍କ କମିକ କ୍ୟାପର ଫିଲ୍ମରେ ମଧ୍ୟ ଅଭିନୟ କରୁଥିବାର ଦେଖାଯିବେ । ଯେଉଁଥିରେ ତାଙ୍କ ଅପୋଜିଟ ଫିଟନେସ କୁଇନ ଦିଶା ପଟାନୀ ନଜର ଆସିବେ ।
ବର୍ତ୍ତମାନ ସେ 'ଭୁଲ ଭୁଲୈୟା' ଫିଲ୍ମ ପାଇଁ ରାଜି ହୋଇସାରିଛନ୍ତି । ଫିଲ୍ମର ସ୍କ୍ରିପ୍ଟ ଏଯାବତ ଫାଇନାଲ ହୋଇନାହିଁ । ଯାହା ଉପରେ କାମ ଚାଲିଛି । ସବୁ କିଛି ଠିକ ହୋଇସାରିଲା ପରେ ମେକର୍ସ ଫିଲ୍ମର ଷ୍ଟାର-କାଷ୍ଟ ଏବଂ ସୁଟିଂ ତାରିଖ ଘୋଷଣା କରିବେ ।
