ମୁମ୍ବାଇ: ହିନ୍ଦୀ ସିନେମା ଜଗତରେ ଇଣ୍ଡିପପ୍ ବା ଜାଜ୍ ସଙ୍ଗୀତ କଥା କହିଲେ ମନକୁ ଭାସି ଆସେ ଗୋଟିଏ କଣ୍ଠ । ଯାହାଙ୍କ ସ୍ବରରେ ସଙ୍ଗୀତକୁ ମିଳିଥିଲା ଏକ ନୂତନ ପରିଚୟ । ଏକ ଏପରି କଣ୍ଠ ଯାହା ଅଗଣିତ ଶ୍ରୋତାଙ୍କ ମନକୁ କିଣିବାରେ ସକ୍ଷମ । କେବଳ ସେତିକି ନୁହେଁ, ଭାରତୀୟ ସଙ୍ଗୀତ ଜଗତରେ ଏକ ନୂଆ ଯୁଗର ସେ କରିଥିଲେ ଶିଳାନ୍ୟାସ। ଆଧୁନିକ ସମୟରେ ସଙ୍ଗୀତର ବିଭିନ୍ନ ପ୍ରକାରଭେଦ ଟ୍ରେଣ୍ଡ କରୁଥିବା ବେଳେ 60 ଓ 70 ଦଶକରେ ଚାଲିଥିଲା କେବଳ ଗୋଟିଏ ଟ୍ରେଣ୍ଡ । ଯାହାକ କାୟା ପଲଟ କରିଥିଲେ କଣ୍ଠଶିଳ୍ପୀ ଆଶା ଭୋସଲେ । ପ୍ରାୟ 70 ବର୍ଷର ନିଜର ସଙ୍ଗୀତ କ୍ୟାରିଅରରେ ସେ ଗାଇଛନ୍ତି ହଜାର ହଜାର ସଙ୍ଗୀତ । ଯାହା ଢେର ପୁରୁଣା ହୋଇଯାଇଥିଲେ ସୁଦ୍ଧା ଆଜି ବି ଶ୍ରୋତାଙ୍କ ପ୍ରିୟ ସଙ୍ଗୀତ ତାଲିକାରେ ସାମିଲ ।
ସିନେମା ଜଗତରେ ସେ ସଭିଙ୍କ ପ୍ରିୟ ଆଶା ତାଇ । 1933 ମସିହାରେ ଜନ୍ମ ଗ୍ରହଣ କରିଥିବା ଆଶା ଆଜି 87 ବର୍ଷ ବୟସରେ ପାଦ ଥାପିଛନ୍ତି । ଜଣେ ସଫଳ ପ୍ରଚ୍ଛଦପଟ ଗାୟିକା ଓ ଉଦ୍ୟୋଗୀ ଭାବେ ପରିଚୟ ହାସଲ କରିଥିବା ଆଶା କିନ୍ତୁ ମୁଖ୍ୟତଃ ନିଜ ସଙ୍ଗୀତ ପାଇଁ ଲୋକଙ୍କ ପାଖରେ ଆଦୃତି ହାସଲ କରିଛନ୍ତି । ହିନ୍ଦୀ ସିନେମା ବ୍ୟତୀତ ସେ ଅନେକ ଆଲବମରେ ମଧ୍ୟ କଣ୍ଠଦାନ କରିଛନ୍ତି । ତେବେ କେବଳ ଭାରତ ନୁହେଁ ବିଦେଶରେ ମଧ୍ୟ ତାଙ୍କର ରହିଛି ସ୍ବତନ୍ତ୍ର ପରିଚୟ ।
1943 ମସିହାରେ ଯାତ୍ରା ଆରମ୍ଭ କରିଥିବା ଆଶା 2006 ମସିହାରେ କହିଥିଲେ କି ସେ ସମୟ ସୁଦ୍ଧା ସେ 12 ହଜାର ସଙ୍ଗୀତ ପାଇଁ କଣ୍ଠଦାନ କରିସାରିଛନ୍ତି । ଆଉ ଆଜିକା ତାରିଖରେ ଏହି ସଂଖ୍ୟା ଯେ କେଉଁ ନୂଆ ମାଇଲଖୁଣ୍ଟରେ ପହଞ୍ଚି ସାରିଥିବ, ତାହା ଆମର କଳ୍ପନା ବାହାରେ । ସର୍ବାଧିକ ସୋଲୋ ସଙ୍ଗୀତ ବା ବ୍ୟକ୍ତିଗତ ସଙ୍ଗୀତ ପାଇଁ ରେକର୍ଡିଂ କରିଥିବାରୁ 2011 ମସିହାରେ ତାଙ୍କ ନାମ ଗିନିଜ ବୁକ ଅଫ ୱାର୍ଲଡ ରେକର୍ଡରେ ସ୍ଥାନିତ ହୋଇଥିଲା । ଏହା ବ୍ୟତୀତ ସଙ୍ଗୀତ ଜଗତରେ ତାଙ୍କର ନିଷ୍ଠାପର ସାଧନା ପାଇଁ ଭାରତ ସରକାରଙ୍କ ଦ୍ବାରା 2000 ମସିହାରେ ତାଙ୍କୁ ଦାଦା ସାହେବ ଫାଲକେ ପୁରସ୍କାର ଓ 2008 ମସିହାରେ ପଦ୍ମ ବିଭୂଷଣ ସମ୍ମାନରେ ସମ୍ମାନୀତ କରାଯାଇଥିଲା ।
ଏକାଧାରରେ ସେ ଜଣେ ସିନେମା, ପପ୍, ଗଜଲ, ଭଜନ, ଭାରତୀୟ ଶାସ୍ତ୍ରୀୟ ସଙ୍ଗୀତ, କୱାଲି, ଲୋକ ସଙ୍ଗୀତ ଓ ରବିନ୍ଦ୍ର ସଙ୍ଗୀତଜ୍ଞ । ନିଜ ଜୀବନ କାଳରେ ସେ ପ୍ରାୟ 20ରୁ ଉର୍ଦ୍ଧ୍ବ ଭାଷାରେ ଅତି ନିଖୁଣ ଭାବେ କଣ୍ଠଦାନ କରିଛନ୍ତି । ସଙ୍ଗୀତ ବ୍ୟତୀତ ସେ ଅଭିନୟରେ ମଧ୍ୟ ନିଜ ଭାଗ୍ୟ ପରୀକ୍ଷା କରିଥିଲେ । 2013 ମସିହାରେ ‘ମାଇ’ ଚଳଚ୍ଚିତ୍ରରେ ସେ ମା’ ଭୂମିକାରେ ପଦାର୍ପଣ କରିଥିଲେ । ହେଲେ ଚଳଚ୍ଚିତ୍ରରେ ତାଙ୍କ ଅଭିନୟ ନେଇ ତାଙ୍କୁ ଅନେକ ସମାଲୋଚନାର ଶିକାର ହେବାକୁ ପଡିଥିଲା ।
ତେବେ 87ତମ ଜନ୍ମଦିନରେ ଆସନ୍ତୁ ମନେ ପକାଇବା ଆଶା ତାଇଙ୍କର କିଛି ଅଭୁଲା ଓ ଲକ୍ଷ ଲକ୍ଷ ଲୋକଙ୍କ ହୃଦୟ ଜିତିଥିବା ସଙ୍ଗୀତ ଓ ଏହା ପଛର କିଛି କାହାଣୀ:
- ଚୁରା ଲିୟା ହୈ ତୁମନେ:
ଆଶା ଭୋସଲେଙ୍କ ସବୁଠାରୁ ଚର୍ଚ୍ଚିତ ଓ ଲୋକପ୍ରିୟ ସଙ୍ଗୀତ ମଧ୍ୟରେ ଏହା ଅନ୍ୟତମ । ‘ୟାଦୋଁ କି ବାରାତ’ ଚଳଚ୍ଚିତ୍ରର ଏହି ଗୀତରେ ଧର୍ମେନ୍ଦ୍ର, ଜୀନତ ଅମାନ, ତାରିକ ଖାନ ଓ ନୀତୁ ସିଂ ରହିଥିଲେ । ଗୀତଟିକୁ ଆର. ଡି. ବର୍ମନ ସଂଯୋଜନା କରିଥିବା ବେଳେ ଏଥିରେ ସ୍ବରର ଯାଦୁ ଚଳାଇଥିଲେ ଆଶା ଓ ମହମ୍ମଦ ରଫି ।
- " class="align-text-top noRightClick twitterSection" data="">
- ପିୟା ତୁ ଅବ ତୋ ଆଜା:
ଯେତେ ନୂଆ ଗୀତ ଆସୁ କି ଯେତେ ନୂଆ ସିଙ୍ଗର ଆସନ୍ତୁ, ଏହି ଗୀତର କ୍ରେଜ ଆଜିବି ଲୋକଙ୍କୁ ମତୁଆଲା କରେ । କାରଭାଁ ଚଳଚ୍ଚିତ୍ରର ଏହି ଗୀତରେ ନଜର ଆସିଥିଲେ କ୍ୟାବେରେ କ୍ବିନ ହେଲେନ । କୁହାଯାଏ କି ହେଲେନଙ୍କୁ ଯଦି କେହି ସଫଳତାର ଶୀର୍ଷକୁ ପହଞ୍ଚାଇଛି ତେବେ ସେ ହେଉଛି ଆଶାଙ୍କ ମନଛୁଆଁ କଣ୍ଠ ଓ ସଙ୍ଗୀତର ଯାଦୁ । ଯାହା ହେଲେନଙ୍କ ନୃତ୍ୟକୁ ଅଧିକ ପ୍ରସ୍ଫୁଟିତ କରିଥିଲା ।
- " class="align-text-top noRightClick twitterSection" data="">
- ଇନ୍ତେହାଁ ହୋ ଗୟୀ:
1984ର ଶରାବୀ ଚଳଚ୍ଚିତ୍ରରେ ରହିଛି ଆଶା ଭୋସଲେଙ୍କର ଅନ୍ୟତମ ବେଷ୍ଟ ଡୁଏଟ । କିଶୋର କୁମାର ଏଥିରେ ଆଶାଙ୍କ ସହ ସ୍ବର ସଜାଇଥିବା ବେଳେ ଏହି ସଙ୍ଗୀତ ଆଜି ବି ନିଜ ଲୋକପ୍ରିୟତା ବଜାୟ ରଖିଛି ।
- " class="align-text-top noRightClick twitterSection" data="">
- ୟେ ମେରା ଦିଲ:
ଏହି ଗୀତଟିକୁ ଶୁଣିଲେ ଯେ କେହି ବି ଗୀତ ସହ ତାଳ ଦେଇ ଏହାର ମଜା ଉଠାଇ ପାରିବ । 1978 ମସିହାର ‘ଡନ’ ଚଳଚ୍ଚିତ୍ରର ଏହି ଭିନ୍ନ ସ୍ବାଦର ଗୀତ ଶୁଣିଲେ ଯେ କେହି ବି ନିୟନ୍ତ୍ରଣ ହରାଇ ଗୀତକୁ ଗୁଣୁ ଗୁଣୁ ହେବା ସହ ଏଥିରେ ନାଚିବାକୁ ବାଧ୍ୟ ହୁଏ ।
- " class="align-text-top noRightClick twitterSection" data="">
- ଦିଲ ଚିଜ୍ କ୍ୟା ହେ:
ବଲିଉଡର ଅନ୍ୟତମ ଆଇକନିକ ସଙ୍ଗୀତ ଯାହାକୁ ନିଜ ଅଦାକାରୀରେ ସଜାଇ ଲୋକଙ୍କ ନିକଟତର କରିଥିଲେ ଅଭିନେତ୍ରୀ ରେଖା । ଆଶାଙ୍କ କଣ୍ଠର ପରିପକ୍ବତା ଓ ରେଖାଙ୍କ ଚିତ୍ତାକର୍ଷକ ନୃତ୍ୟର ଯୁଗଳବନ୍ଦୀ ଏହି ଗୀତଟିକୁ ଆକାଶଛୁଆଁ ସଫଳତା ଆଣି ଦେଇଥିଲା । 1981 ମସିହାର ଉମରାଓ ଜାନ ଚଳଚ୍ଚିତ୍ରର ଏହି ଗୀତ ପାଇଁ ସେହି ବର୍ଷ ଜାତୀୟ ଶ୍ରେଷ୍ଠ ଫିଲ୍ମ ଆୱାର୍ଡ ଫର୍ ପ୍ଲେ ବ୍ୟାକ ସିଙ୍ଗର ଭାବେ ସେ ପୁରସ୍କୃତ ହୋଇଥିଲେ ।
- " class="align-text-top noRightClick twitterSection" data="">
- ଦୋ ଲଫଜୋଁ କି ହେ:
ଦି ଗ୍ରେଟ ଗ୍ୟାମ୍ବଲର ଚଳଚ୍ଚିତ୍ରର ନଦୀ ତଟରେ ନୌକାରେ ବସି ଜୀନତ ଅମାନଙ୍କ ସେହି ଗୀତକୁ କିଏ ବା ଭୁଲିପାରେ । ଶାନ୍ତ, ସ୍ଥିର ଓ ଗଭୀର ଭାବପୂର୍ଣ୍ଣ ଏହି ଗୀତଟି ଭେନିସରେ ସୁଟିଂ ହୋଇଥିବା ବେଳେ ଏହା ଆଶାଙ୍କ ପାରଦର୍ଶିତାକୁ ଖୁବ ସ୍ପଷ୍ଟ ଜାହିର କରେ ।
- " class="align-text-top noRightClick twitterSection" data="">
- ଦମ ମାରୋ ଦମ:
1971ର ଚଳଚ୍ଚିତ୍ର ହରେ ରାମା ହରେ କ୍ରିଷ୍ଣାର ଏହି ଗୀତ ସେ ସମୟର ସେନସେସନ ପାଲଟିଥିଲା କହିଲେ କିଛି ଭୁଲ ହେବ ନାହିଁ । ଆନନ୍ଦ ବକ୍ସିଙ୍କ ଶବ୍ଦ ସଂଯୋଜନା ସହ ରାହୁଲ ଦେବ ବର୍ମନଙ୍କ ନିର୍ଦ୍ଦେଶନାରେ ଆଶା ଭୋସଲେ ଏହି ଗୀତ ପାଇଁ ପାଇଥିଲେ ଫିଲ୍ମଫେୟାର ବେଷ୍ଟ ଫିମେଲ ପ୍ଲେବ୍ୟାକ ସିଙ୍ଗର ଆୱାର୍ଡ । ତେବେ ଏଥିରେ ତିଳେ ହେଲେ ସନ୍ଦେହ ନାହିଁ କି ଏହି ଗୀତ ଏବେ ବି ପାର୍ଟି ଓ ପବ୍ର ଆକର୍ଷଣର କେନ୍ଦ୍ର ବିନ୍ଦୁ ।
- " class="align-text-top noRightClick twitterSection" data="">
- ଏକ ମେଁ ଔର ଏକ ତୁ:
ଆରଡି ବର୍ମନଙ୍କ ନିର୍ଦ୍ଦେଶନା ଓ ଗୁଲଶନ ବୱରାଙ୍କ ଶବ୍ଦ ସଂଯୋଜନାରେ ପ୍ରସ୍ତୁତ ଏହି ଗୀତଟିରେ ଫୁଟ ଟ୍ୟାପିଂ ଡ୍ୟାନ୍ସ ଖୁବ ଲୋକପ୍ରିୟତା ହାସଲ କରିଥିଲା । ସେଥିରେ ପୁଣି ଆଶାଙ୍କ କଣ୍ଠର ହରକତ ଓ ଚୁଲିବୁଲି ଅନ୍ଦାଜ ଗୀତଟିକୁ ଅଧିକ ଜୀବନ୍ତ କରିଥିଲା । 1975 ମସିହାର ହିଟ ଚଳଚ୍ଚିତ୍ର ଖେଲ ଖେଲ ମେଁରେ ସ୍ଥାନୀତ ଥିଲା ଏହି ସୁପର ହିଟ୍ ଗୀତ ।
- " class="align-text-top noRightClick twitterSection" data="">
- ମୁଝେ ରଙ୍ଗ ଦେ:
କେବଳ ଯେ 70 ଓ 80 ଦଶକରେ ଆଶା ନିଜ ଦବଦବା ବଜାୟ ରଖିଥିଲେ ତାହା ନୁହେଁ । ବିଂଶ ଦଶକରେ ମଧ୍ୟ ଜାରି ରହିଥିଲା ତାଙ୍କ ସଫଳତାର ଯାତ୍ରା । ବିଂଶ ଦଶକର ଲେଜେଣ୍ଡ ଏ ଆର୍ ରେହମାନର କମ୍ପୋଜିଶନରେ ଆଶାଙ୍କ ସ୍ବରର ଯୁଗଳବନ୍ଦୀରେ ଆସିଥିଲା ଥକସକ ଚଳଚ୍ଚିତ୍ରର ମୁଝେ ରଙ୍ଗ ଦେ ଗୀତ । ଏହା ଏତେ ଲୋକପ୍ରିୟତା ହାସଲ କରିଥିଲା କି ଏହାକୁ ହଲିଉଡ ଚଳଚ୍ଚିତ୍ର ଆକ୍ସିଡେଣ୍ଟାଲ ହଜବ୍ୟାଣ୍ଡରେ ମଧ୍ୟ ସ୍ଥାନୀତ କରାଯାଇଥିଲା ।
- " class="align-text-top noRightClick twitterSection" data="">
ପ୍ରାୟ 70 ବର୍ଷର ଆଶାଙ୍କ ସଫଳତାର ଯାତ୍ରା ସତରେ ବେଶ ପ୍ରଶଂସନୀୟ । ସେ ଗାଇଥିବା ଏମିତି କୌଣସି ଗୀତ ନାହିଁ ଯାହାକୁ ଶ୍ରୋତା ନିଜ ପସନ୍ଦ ତାଲିକାରେ ବାଦ ଦେଇଦେବେ । ସେ ଭାବନାର ପ୍ରକାଶ ହେଉ କି ସ୍ବରରେ ଆଧୁନିକତାର ଛାପ, ବେଦନା ହେଉ କି ରହସ୍ୟର ଗମ୍ଭୀରତା । ପ୍ରତିଟି କ୍ଷେତ୍ରରେ ନିଜର ପାରଦର୍ଶୀତା ଦେଖାପାରିଛନ୍ତି ସଭିଙ୍କ ପ୍ରିୟ ଆଶା ତାଇ । ଆଜି ତାଙ୍କର 87ତମ ଜନ୍ମଦିନରେ ତାଙ୍କର ଭଲ ସ୍ବାସ୍ଥ୍ୟ କାମନା ସହ ଇଟିଭି ଭାରତ ପରିବାରର ଢେର ସାରା ଶୁଭେଚ୍ଛା ।
ବ୍ୟୁରୋ ରିପୋର୍ଟ, ଇଟିଭି ଭାରତ
