ପାଟନା: ବଲିଉଡ ଅଭିନେତା ସୁଶାନ୍ତ ସିଂ ରାଜପୁତଙ୍କ ଅକାଳ ବିୟୋଗରେ ପ୍ରଶଂସକମାନେ ଏବଂ ବଲିଉଡ ସେଲିବ୍ରିଟିମାନଙ୍କ ମଧ୍ୟରେ ଏକ ଶୋକର ଛାୟା ଖେଳିଯାଇଛି । ଏହି ସମୟରେ ବିହାରରୁ ଖବର ଆସିଛି ଯେ, ପାଟନାର ଜଣେ ଛାତ୍ରୀ ଯିଏ ସୁଶାନ୍ତଙ୍କ ପ୍ରଶଂସକ ଥିଲେ, ସେ ସୁଶାନ୍ତଙ୍କ ମୃତ୍ୟୁ ଦୁଃଖରେ ଆତ୍ମହତ୍ୟା କରିଛନ୍ତି ।
ଆତ୍ମହତ୍ୟା କରିଥିବା ଛାତ୍ରୀ ଜଣଙ୍କ 17 ବର୍ଷ ବୟସର । ସୂଚନାମୁତାବକ, ଛାତ୍ରୀ ଜଣକ ଫ୍ୟାନ୍ରେ ଝୁଲି ନିଜ ଜୀବନ ଦେଇଛନ୍ତି ।
ଛାତ୍ରୀ ଜଣକ ଚଳିତ ବର୍ଷ ମାଟ୍ରିକ୍ ପରୀକ୍ଷା ଦେଇଥିଲେ, ଜଣାପଡିଥିଲା ଯେ ତାଙ୍କର ଖରାପ ଫଳାଫଳ ଯୋଗୁଁ ସେ ବହୁତ ଦୁଃଖରେ ଥିଲେ ଏବଂ ସୁଶାନ୍ତଙ୍କ ଆତ୍ମହତ୍ୟା ତାଙ୍କ ଉପରେ ଗଭୀର ପ୍ରଭାବ ପକାଇଥିଲା ।
ଛାତ୍ରୀଟି ସୁଶାନ୍ତଙ୍କ ଏତେ ବଡ ପ୍ରଶଂସକ ଥିଲେ ଯେ, ସେ ଦିନରାତି ମୋବାଇଲ୍ ଏବଂ ଟିଭିରେ ସୁଶାନ୍ତଙ୍କୁ ଦେଖୁଥିଲେ । ଯେତେବେଳେ ଛାତ୍ରୀ ଜଣଙ୍କୁ ପାଟନା ମେଡିକାଲ କଲେଜ ଏବଂ ହସ୍ପିଟାଲ ପିଏମସିଏଚକୁ ନିଆଯାଇଥିଲା, ଡାକ୍ତରମାନେ ସେଠାରେ ତାଙ୍କୁ ମୃତ ଘୋଷଣା କରିଥିଲେ ।
ପ୍ରକାଶ ଥାଉ କି,ସୁଶାନ୍ତ ସିଂଙ୍କ ମୃତ୍ୟୁ ପୁରା ଇଣ୍ତଷ୍ଟ୍ରି ସହିତ ସମଗ୍ର ଦେଶକୁ ଥରାଇ ଦେଇଛନ୍ତି । ସୋମବାର ଦିନ ରାଜପୁତଙ୍କୁ ଭିଲେ ପର୍ଲିର ପୱନ ହନ୍ସ ରେ ଶବଦାହ କରାଯାଇଥିଲା । ଏହି ଅନ୍ତିମ ସଂସ୍କାରରେ ସୁଶାନ୍ତଙ୍କ ପରିବାର ସମେତ ବଲିଉଡ ଜଗତର ଅନେକ ସେଲିବ୍ରିଟିମାନେ ଉପସ୍ଥିତ ଥିଲେ ।
ବ୍ୟୁରୋ ରିପୋର୍ଟ, ଇଟିଭି ଭାରତ
