ମୁମ୍ବାଇ: ଅଭିନେତ୍ରୀ ମାଲଭି ମଲହୋତ୍ରାଙ୍କୁ ନେଇ ନୈରାଶ୍ୟଜନକ ଖବର ସାମ୍ନାକୁ ଆସିଛି । ଶୁଣିବାକୁ ମିଳୁଛି ଯେ ଗତ 26 ରାତି ପ୍ରାୟ 9ଟାରେ ମୁମ୍ବାଇର ଭର୍ସୋଭା ପୋଲିସ ଷ୍ଟେସନ ଅଞ୍ଚଳରେ ଯୋଗେଶ କୁମାର ମହିପାଲ ସିଂ ନାମକ ଜଣେ ଯୁବକ ତାଙ୍କୁ ଛୁରାମାଡ କରିଛି । ଏହି ଆକ୍ରମଣରେ ସେ ଆହତ ମଧ୍ୟ ହୋଇଛନ୍ତି । ଯାହାପରେ ତାଙ୍କୁ କୋକିଲାବେନ ଅମ୍ବାନୀ ହସ୍ପିଟାଲରେ ଭର୍ତ୍ତି କରାଯାଇଥିଲା । ଏବେ ତାଙ୍କ ଚିକିତ୍ସା ଚାଲିଛି ।
ଏହି ମାମଲାଟି ପ୍ରେମରେ ଧୋକାକୁ ନେଇ କୁହାଯାଉଛି । କାରଣ ମାଲଭି ଗତ ବର୍ଷ ଯୋଗେଶଙ୍କ ସହ ବନ୍ଧୁତା ସ୍ଥାପନ କରିଥିଲେ । ଦୁହେଁ ତିନିରୁ ଚାରିଥର ସାକ୍ଷାତ ମଧ୍ୟ କରିଥିଲେ । ହେଲେ ଯୋଗେଶ କ୍ରମାଗତ ଭାବରେ ମାଲଭିଙ୍କୁ ତାଙ୍କ ସହ ପ୍ରେମ ସମ୍ପର୍କ ରଖିବାକୁ ବାଧ୍ୟ କରିଥିଲେ। ଆଉ ବିବାହ କରିବାକୁ ସବୁବେଳେ କହିଥିବାବେଳେ ଯୋଗେଶଙ୍କ ପ୍ରେମ ସ୍ବୀକାର କରିନଥିଲେ ମାଲଭି । ଯାହାପରେ ମାଲଭିଙ୍କୁ ଫୋନ୍ କରି ଖୁବ୍ ହଇରାଣ ମଧ୍ୟ କରୁଥିଲେ ସେ ।
ବାରମ୍ବାର ନିରାଶ ହେବା ପରେ ଏପରି ପଦକ୍ଷେପ ନେଇଥିଲେ ଯୋଗେଶ । ଆଉ ଏକୁଟିଆ ପାଇ ତାଙ୍କୁ ଛୁରୀରେ ଆକ୍ରମଣ କରି ସେ ଫେରାର ହୋଇଯାଇଛନ୍ତି । ବର୍ତ୍ତମାନ ତାଙ୍କ ବିରୋଧରେ ଭର୍ସୋଭା ପୋଲିସ ଷ୍ଟେସନରେ ଏକ ମାମଲା ରୁଜୁ ହୋଇଛି।
ବ୍ୟୁରୋ ରିପୋର୍ଟ, ଇଟିଭି ଭାରତ
