ମୁମ୍ବାଇ: ଅଭିନେତ୍ରୀ କଙ୍ଗନା ରାଣାୱତଙ୍କ ସମେତ ଫିଲ୍ମ ନିର୍ମାତା କରଣ ଜୋହର ଓ ଏକତା କପୁର ପାଇବେ ପଦ୍ମଶ୍ରୀ ପୁରସ୍କାର । ନଭେମ୍ବର 8 ରେ ନୂଆଦିଲ୍ଲୀରେ ଅନୁଷ୍ଠିତ ହେବାକୁ ଥିବା ଏକ ସମାରୋହରେ ଏମାନଙ୍କୁ ପୁରସ୍କୃତ କରାଯିବ। କଳା କ୍ଷେତ୍ରରେ ଉତ୍କର୍ଷତା ପ୍ରଦର୍ଶନ ପାଇଁ ଏହି ତିନିଜଣଙ୍କୁ ସର୍ବୋଚ୍ଚ ନାଗରିକ ସମ୍ମାନରେ ସମ୍ମାନିତ କରାଯିବ ।
ଏହା ଏକ ସରକାରୀ କାର୍ଯ୍ୟକ୍ରମ । ପୁରସ୍କାର ବିଜେତାଙ୍କୁ ନିମନ୍ତ୍ରଣ ପତ୍ର ପଠାଇ ଦିଆଯାଇଛି । ଏହି ସମ୍ମାନଜନକ ପୁରସ୍କାର ଗ୍ରହଣ କରିବା ପାଇଁ ସେମାନେ ବେଶ ଉତ୍ସାହିତ ଅଛନ୍ତି । ବାପାଙ୍କ ସାମ୍ନାରେ ଏହି ସମ୍ମାନଜନକ ପୁରସ୍କାର ଗ୍ରହଣ କରିବାକୁ ଚାହିଁଛନ୍ତି ଫିଲ୍ମ ନିର୍ମାତା ଏକତା କପୁର । ତେଣୁ ସେ ତାଙ୍କ ବାପା ଅଭିନେତା ଜିତେନ୍ଦ୍ରଙ୍କ ସହିତ ଦିଲ୍ଲୀ ଯାତ୍ରା କରିବା ନେଇ ସୂଚନା ମିଳିଛି ।
୨୦୨୦ରେ ପଦ୍ମଶ୍ରୀ ପାଇଁ ତିନିଜଣଙ୍କ ନାମ ଘୋଷଣା ହୋଇଥିଲା । ପଦ୍ମଶ୍ରୀ ପାଇଁ କଙ୍ଗନାଙ୍କ ନାମ ଘୋଷଣା ହେବା ପରେ ସେ କହିଥିଲେ ଏହି ସମ୍ମାନ ପାଇଁ ଦେଶକୁ ଧନ୍ୟବାଦ ଦେଉଛି । ଏହି ପୁରସ୍କାର ମୁଁ ସେହି ପ୍ରତିଟି ମହିଳାଙ୍କୁ ସମର୍ପିତ କରୁଛି ଯେଉଁମାନେ ସ୍ବପ୍ନ ଦେଖିବାକୁ ସାହସ ରଖନ୍ତି । ନିକଟରେ କଙ୍ଗନା ରଣାୱତ ଜାତୀୟ ଫିଲ୍ମ ପୁରସ୍କାର ପାଇଥିଲେ ।
ପୁରସ୍କାର ପାଇଁ ଏକତାଙ୍କ ନାମ ଘୋଷଣା ହେବା ପରେ ଏକତା କହିଥିଲେ ଏ ଇଣ୍ଡଷ୍ଟ୍ରିରେ ’ମୁଁ ୧୭ ବର୍ଷ ବୟସରେ ଯାତ୍ରା ଆରମ୍ଭ କରିଥିଲି । ଏହି ସମ୍ମାନଜନକ ପୁରସ୍କାର ପାଇଁ ମୁଁ ଗର୍ବିତ’ । ସେହିପରି କରଣ ଜୋହର ମଧ୍ୟ ବେଶ ଖୁସି ଅଛନ୍ତି । ସେ କହିଛନ୍ତି ତାଙ୍କ ନାଁ ଯେତେବେଳେ ଘୋଷଣା ହେଲା ସେ ଆଶ୍ଚର୍ଯ୍ୟ ହୋଇଯାଇଥିଲେ। ‘ମୋ ସହିତ ଏହା ଘଟିଛି ମୁଁ ଆଦୌ ବିଶ୍ବାସ କରି ପାରିଲି ନାହିଁ’ ବୋଲି କହିଛନ୍ତି କରଣ ଜୋହର ।
ବ୍ୟୁରୋ ରିପୋର୍ଟ,ଇଟିଭି ଭାରତ
