ମୁମ୍ବାଇ: କରୋନା ଭାଇରସ ଯୋଗୁଁ ସମଗ୍ର ବିଶ୍ୱ ଭୟଭୀତ ହୋଇପଡିଛି । ଭାରତରେ ମଧ୍ୟ ଏହି ମହାମାରୀରେ ଆକ୍ରାନ୍ତଙ୍କ ସଂଖ୍ୟା କ୍ରମାଗତ ଭାବେ ବୃଦ୍ଧି ପାଉଛି ଏବଂ ଏହାକୁ ରୋକିବା ପାଇଁ ସମଗ୍ର ଦେଶକୁ ସରକାର ଲକଡାଉନ ଘୋଷଣା କରିଛନ୍ତି ।
ତେବେ ଏହି ସମୟରେ ବଲିଉଡ ଅଭିନେତା ଶକ୍ତି କପୁର ମଧ୍ୟ ଏକ ଭିଡିଓ ସେୟାର କରିଛନ୍ତି ଯେଉଁଥିରେ ସେ ଜଣେ ଇଟାଲୀୟ କରୋନାରେ ପୀଡିତଙ୍କ କାହାଣୀ କହି ଲୋକଙ୍କୁ ସଚେତନ କରାଉଛନ୍ତି ।
ସେ କହିଥିଲେ ଯେ, 'ଇଟାଲୀରେ ଜଣେ 93 ବର୍ଷ ବୟସ୍କ ବ୍ୟକ୍ତି ଡାକ୍ତରଖାନାରୁ ସୁସ୍ଥ ହୋଇ ଫେରୁଥିବା ସମୟରେ ଡାକ୍ତର ତାଙ୍କୁ କହିଥିଲେ ଯେ, ଆପଣଙ୍କୁ ଗୋଟିଏ ଦିନର ଭେଣ୍ଟିଲେଟର ବିଲ ଦେବାକୁ ପଡିବ ପାଞ୍ଚ ହଜାର । ଏହା ପରେ ସେହି ବୟସ୍କଙ୍କ ଆଖି ଭରିଗଲା।
ତା’ପରେ ବୃଦ୍ଧ ଜଣକ କହିଲେ, ମୋର ବହୁତ ଟଙ୍କା ଅଛି, କିନ୍ତୁ ଆଜି ଗୋଟିଏ କଥା ହୃଦୟଙ୍ଗମ ହୋଇଛି ଯେ ମୋତେ ଭଗବାନଙ୍କୁ ଏକ ବଡ ବିଲ ଦେବାକୁ ପଡିବ । ଯିଏ ମୋତେ ସାରା ଜୀବନ ବିନା କୌଣସି ଦେୟରେ ନିଶ୍ୱାସ ନେବାକୁ ସୁଯୋଗ ଦେଇଥିଲା । ଆଉ ଆଜି ଭେଣ୍ଟିଲେଟର ସାହାଯ୍ୟରେ ମତେ ନିଶ୍ୱାସ ନେବା ପାଇଁ ଟଙ୍କା ଦେବାକୁ ପଡିବ ।
ଏହି କାହାଣୀ କହିବା ସମୟରେ ଶକ୍ତି କପୁରଙ୍କୁ ଭାବପ୍ରବଣତା ଦେଖାଯାଏ । ସେ କହିଥିଲେ, 'ଏହି ଜିନିଷ ମୋ ହୃଦୟରେ ବସିଯାଇଛି । ତେଣୁ ଯତ୍ନ ନିଅ, ଘରେ ରୁହ ଏବଂ ଜୀବନର ମୂଲ୍ୟ ବୁଝ ।
ବ୍ୟୁରୋ ରିପୋର୍ଟ, ଇଟିଭି ଭାରତ
