ମୁମ୍ବାଇ: ରବିବାର ଆୟୋଜିତ ହୋଇଥିବା ବିଶ୍ବକପ ଫାଇନାଲରେ ନ୍ୟୁଜିଲାଣ୍ଡ ଏବଂ ଇଂଲଣ୍ଡର କଡାକଡି ଟକ୍କର ଦେଖିବାକୁ ମିଳିଥିଲା । ଏହି ରୋମାଞ୍ଚକ ମ୍ୟାଚରେ ଇଂଲଣ୍ଡ, ନ୍ୟୁଜିଲାଣ୍ଡକୁ ହାରାଇ ଐତିହାସିକ ବିଜୟ ହାସଲ କରିଛି । ଆଉ ପ୍ରଥମଥର ନିଜ ଖାତାରେ ବିଶ୍ବକପ ସାମିଲ କରିବାରେ ସଫଳ ହୋଇପାରିଛି ।
ଇଂଲଣ୍ଡ ବିଜୟ ଉପରେ ବଲିଉଡ ଷ୍ଟାର୍ସ ସୋସିଆଲ ମିଡିଆରେ ନିଜ ନିଜ ପ୍ରତିକ୍ରିୟା ଦେବାରେ ଲାଗି ପଡିଛନ୍ତି । ପ୍ରଥମେ ପପୁଲାର ଫିଲ୍ମ ନିର୍ମାତା ଅନୁରାଗ କଶ୍ୟପ ପୋଷ୍ଟରରେ ଲେଖିଛନ୍ତି, "ଖରାପ ନିୟମ ପାଇଁ ଇଂଲଣ୍ଡ ବିଜେତା ହୋଇଗଲା, ନ୍ୟୁଜିଲାଣ୍ଡ ପ୍ରକୃତ ବିଜେତା ।" ଅନୁରାଗଙ୍କ ଏହି ଟ୍ବିଟରୁ ଜଣାପଡୁଛି ଯେ ସେ ଇଂଲଣ୍ଡ ବିଜୟ ଉପରେ ଖୁସି ନାହାଁନ୍ତି ।
ସେହିପରି ତାପସୀ ପନ୍ନୁ ଲେଖିଛନ୍ତି, "ଇଂଲଣ୍ଡ ୱାର୍ଲ୍ଡକପ ଜିତିଲା ଆଉ ନ୍ୟୁଜିଲାଣ୍ଡ ହୃଦୟ । ଦୁଇ ପକ୍ଷରୁ ଆମଙ୍କୁ ଜବରଦସ୍ତ ମ୍ୟାଚ ଦେଖିବାକୁ ମିଳିପାରିଥିଲା ।"
ମହାନାୟକ ଅମିତାଭ ବଚ୍ଚନ ମଧ୍ୟ ନିଜ ହୃଦୟର କଥା ଲେଖିଛନ୍ତି । ସେ ଟ୍ବିଟ କରି ଲେଖିଛନ୍ତି, "ଗତ ଦୁଇ ସ୍ପୋର୍ଟର ଦୁନିଆରେ ହାରିଥିବା ମଧ୍ୟରେ କିଛି ସାହାସୀ ଲୋକ ଥିଲେ । ଭାରତ ଭଲ ପ୍ରଦର୍ଶନ କରିଥିଲା, ନ୍ୟୁଜିଲାଣ୍ଡ ମଧ୍ୟ ଏବଂ ଫେଡରର ମଧ୍ୟ ଭଲ ଖେଳିଥିଲେ ।"
ଅନ୍ୟପଟେ ସିଦ୍ଧାର୍ଥ ମଲହୋତ୍ରା ଲେଖିଛନ୍ତି, "ଜବରଦସ୍ତ ଐତିହାସିକ ଫାଇନାଲ ମ୍ୟାଚ ଥିଲା । ଦୁଇ ପକ୍ଷରୁ ଶାନଦାର କ୍ରିକେଟ । ଗମ୍ଭୀର, କ୍ରେଜି, ପାଗଳ ଏବଂ ଭାବୁକ ।
ପ୍ରକାଶ ଥାଉକି ଏହି ମ୍ୟାଚରେ ନ୍ୟୁଜିଲାଣ୍ଡ ଟସ ଜିତି ପ୍ରଥମେ ବ୍ୟାଟିଂ କରି 241/8ର ସ୍କୋର କରିଥିଲା । ଏହାପରେ ଇଂଲଣ୍ଡ ଟିମ 50 ଓଭରରେ 241 ରନ କରି ମ୍ୟାଚକୁ ଟାଏ କରିଦେଇଥିଲେ । ପରେ ଇଂଲଣ୍ଡ ମ୍ୟାଚରେ ଅଧିକ ବାଉଣ୍ଡ୍ରୀ ଲଗାଇଥିବାରୁ ଟିମକୁ ବିଜେତା ଘୋଷିତ କରାଯାଇଥିଲା ।
