ମୁମ୍ବାଇ: ବାସ୍କେଟବଲ ଆସୋସିଏସନର ବିଶିଷ୍ଟ ଖେଳାଳି କୋବେ ବ୍ରାୟଣ୍ଟଙ୍କ ନିଧନ ହୋଇଯାଇଛି । ରବିବାର ହେଲିକାପ୍ଟର କ୍ରାଶରେ କୋବେ ଓ ତାଙ୍କ 13 ବର୍ଷିୟ ଝିଅ ଗିୟାନା ମାରିୟାଙ୍କ ଦେହାନ୍ତ ହୋଇଥିଲା । ଏହି ଦୁଃଖଦ ଘଟଣା ପରେ କ୍ରିକେଟ ଜଗତରୁ ନେଇ ବଲିଉଡରେ ମଧ୍ୟ ଶୋକର ବାତାବରଣ ଦେଖିବାକୁ ମିଳୁଛି । ଏନବିଏର ଫେମସ ଖିଲାଡିଙ୍କ ମୃତ୍ୟୁରେ ହଲିଉଡ, ବଲିଉଡ ବର୍ତ୍ତମାନ ଦୁଃଖରେ । ପ୍ରିୟଙ୍କା ଚୋପ୍ରା, ରଣବୀର ସିଂ, କରନ ଜୋହର, ଅର୍ଜୁନ କପୁର, ଫରହାନ ଅଖତର, ଅଭିଷେକ ବଚ୍ଚନ ଓ ଅକ୍ଷୟ କୁମାର ତାଙ୍କ ନିଧନରେ ଶୋକ ପ୍ରକାଶ କରିଛନ୍ତି ।
ସବୁ କଳାକାର ଟ୍ବିଟ କରି ତାଙ୍କୁ ଶ୍ରଦ୍ଧାଞ୍ଜଳି ଦେଇଛନ୍ତି । ଅକ୍ଷୟ ଟ୍ବିଟ କରି ଲେଖିଛନ୍ତି, ‘ଦୁନିଆ ଜଣେ ମହାନ ଆଥେଲିଟଙ୍କୁ ହରାଇଛି । ଅନେକ ପିଲାଙ୍କୁ ଓ ମୋ ଭାଣିଜିଙ୍କୁ କୋବେ ବାସ୍କେଟବଲ ଖେଳିବାକୁ ପ୍ରେରଣା ଯୋଗାଇଥିଲେ।’
ସେହିପରି ପ୍ରିୟଙ୍କା ତାଙ୍କ ନିଧନରେ ଏକ ଭାବବିହ୍ବଳଭରା ପୋଷ୍ଟ ଲେଖି ଦୁଃଖ ପ୍ରକାଶ କରିଛନ୍ତି । ସେ ନିଜ ଇନଷ୍ଟାଗ୍ରାମରେ କୋବେଙ୍କ ଏକ ଫଟୋ ସେୟାର କରିଛନ୍ତି । ଆଉ ଜଣାଇଛନ୍ତି ସେ 13 ବର୍ଷ ବୟସରେ କୋବେଙ୍କ ସହ ପ୍ରଥମଥର ସାକ୍ଷାତ କରିଥିଲେ । ଫଟୋର କ୍ୟାପସନରେ ଲେଖିଛନ୍ତି, ‘କୋବେ ହିଁ ତାଙ୍କ ଭିତରେ ଖେଳ ପାଇଁ ପ୍ରେମ, ସ୍ନେହ ସୃଷ୍ଟି କରିଥିଲେ । ସେ ପୁରା ଜେନେରେସନକୁ ପ୍ରେରଣା ଯୋଗାଇଥିଲେ ।’ ପ୍ରିୟଙ୍କ ବ୍ୟତୀତ ତାଙ୍କ ସ୍ବାମୀ ନିଜ ଜୋନସ ମଧ୍ୟ ସୋସିଆଲ ମିଡିଆରେ ଦୁଃଖ ପ୍ରକାଶ କରିଛନ୍ତି ।
ପ୍ରକାଶ ଥାଉକି ରିପୋର୍ଟ ଅନୁଯାୟୀ କୋବେଙ୍କ ହେଲିକାପ୍ଟର ଦୁର୍ଘଟଣା କାଲାବାସାସର ପାହାଡିଆ ଅଞ୍ଚଳରେ ହୋଇଥିଲା । ଏହି ଦୁର୍ଘଟଣାରେ ହେଲିକାପ୍ଟରେ ଥିବା ସବୁ ଯାତ୍ରୀଙ୍କ ଦେହାନ୍ତ ହୋଇଛି । ତାଙ୍କ ନିଧନ ପରେ ଆମେରିକାର ପୂର୍ବତନ ରାଷ୍ଟ୍ରପତି ବରାକ ଓବାମା, ଅଭିନେତା ବିନ ଡିଜଲ, ଇଭେନ ଜନସନ, ଗାୟକ ଜଷ୍ଟିନ ବିବର ଶୋକ ପ୍ରକାଶ କରିଛନ୍ତି ।
