ପୁରୀ: କାଳିଆ ପ୍ରେମରେ ବନ୍ଧା ଅଭିନେତା ଗୋବିନ୍ଦା । ପୁଣିଥରେ ବଲିଉଡ ଅଭିନେତା ଗୋବିନ୍ଦା ମଙ୍ଗଳବାର ଶ୍ରୀକ୍ଷେତ୍ର ଆସି ରତ୍ନ ସିଂହାସନରେ ଚତୁର୍ଦ୍ଧା ବିଗ୍ରହଙ୍କୁ ଦର୍ଶନ କରିଛନ୍ତି । ମହାପ୍ରଭୁଙ୍କ ସେ ଜଣେ ପରମ ଭକ୍ତ । ପ୍ରଭୁଙ୍କ ଡାକରାରେ ପୁନର୍ବାର ପୁରୀ ଆସିବାର ସୌଭାଗ୍ୟ ପାଇଛନ୍ତି । ଏଥିସହ କୋଭିଡ ଦ୍ବିତୀୟ ଲହର ଜନିତ କଟକଣା ଭିତରେ ଶ୍ରୀମନ୍ଦିରରେ ଭକ୍ତଙ୍କ ପାଇଁ ଦର୍ଶନ ବ୍ୟବସ୍ଥା ଅତି ଶୃଙ୍ଖଳିତ ହୋଇଥିବା ଗୋବିନ୍ଦା କହିଛନ୍ତି ।
ଗୋଟିଏ ସମୟରେ ଜୀବନର ଜଟିଳ ପରିସ୍ଥିତି ମଧ୍ୟ ଦେଇ ଗତି କରୁଥିବା ଗୋବିନ୍ଦା ମହାପ୍ରଭୁଙ୍କ ଦର୍ଶନ ପରେ ସେ ସବୁ ଅନେକାଂଶରେ ଦୂର ହୋଇଛି । ଦର୍ଶନ ପରେ ତାଙ୍କ ଜୀବନ ଶାନ୍ତି ଓ ଖୁସିମୟ ହେବ ବୋଲି ଗଣମାଧ୍ୟମ ସାମ୍ନାରେ ଏହି ବଲିଉଡ ଅଭିନେତା ପ୍ରତିକ୍ରିୟା ଦେଇଛନ୍ତି ।
ଗୋବିନ୍ଦା ଚତୁର୍ଦ୍ଧାମୂର୍ତ୍ତିଙ୍କ ସହ ମା ବିମଳା, ମା ମହାଲକ୍ଷ୍ମୀ ଓ ପାର୍ଶ୍ବଦେବାଦେବୀଙ୍କୁ ଦର୍ଶନ କରିଛନ୍ତି । ତାଙ୍କ ସହ ଭିତରଚ୍ଛ ମଧୁସୂଦନ ମହାପାତ୍ର, ବରିଷ୍ଠ ସେବାୟତ ମହାବୀର ପ୍ରତିହାରୀ ଓ ଶ୍ୟାମସୁନ୍ଦର ମହାପାତ୍ର ପ୍ରମୁଖ ଉପସ୍ଥିତ ଥିଲେ । ଗୋବିନ୍ଦା ଶ୍ରୀମନ୍ଦିରରେ ୩୦ ମିନିଟରୁ ଅଧିକ ସମୟ ଧରି ରହିଥିବାବେଳେ ସିଂହଦ୍ବାର ଦେଇ ପ୍ରବେଶ ଓ ଉତ୍ତର ଦ୍ବାର ଦେଇ ପ୍ରସ୍ଥାନ କରିଥିଲେ । ତେବେ ସୌଭାଗ୍ୟ ମିଳିଲେ ଶ୍ରୀକ୍ଷେତ୍ର ଆସିବେ ବୋଲି ସେ କହିଛନ୍ତି ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
