ମୁମ୍ବାଇ: ଖିଲାଡି ଅକ୍ଷୟ କୁମାର ସବୁବେଳେ ସୋସିଆଲ ମିଡିଆରେ ଆକ୍ଟିଭ ନଜର ଆସନ୍ତି । ପ୍ରାୟତଃ ସେ ନିଜର ୱାର୍କଆଉଟ ଭିଡିଓ ସେୟାର କରି ଫ୍ୟାନ୍ସଙ୍କୁ ଫିଟ୍ ରହିବା ପାଇଁ ସଚେତନ ମଧ୍ୟ କରାଇ ଥାଆନ୍ତି । କିନ୍ତୁ ଏଥର ସେ କୌଣସି ଫିଟନେସ ଭିଡିଓ ସେୟାର କରିନାହାଁନ୍ତି। ଏବେ ସେ ସୋସିଆଲ ମିଡିଆରେ ଯାହା ସେୟାର କରିଛନ୍ତି ତାହା ଦେଖି ଆପଣଙ୍କ ମୁହଁରେ ହସ ଆସିଯିବ ।
ଆଜ୍ଞା ହଁ, ସେ ଏକ ଅଟୋ ରିକ୍ସାର ଫଟୋ ଟ୍ବିଟରରେ ସେୟାର କରିଛନ୍ତି । ଏହି ଅଟୋ ରିକ୍ସାଟି ମୁମ୍ବାଇର । କଥାଟି ହେଲା କି ସେୟାର ହୋଇଥିବା ଅଟୋ ରିକ୍ସାରେ ଅନେକ ଗଛଲତା ଲାଗିଥିବାର ନଜର ଆସୁଛି । ଯାହା ଏକ ଛୋଟ ବଗିଚା ପରି ଦେଖାଯାଉଛି।
ଏହାର ଫଟୋ ସେୟାର କରି ସେ କ୍ୟାପସନରେ ଲେଖିଛନ୍ତି, ‘ଆଜି ସୁଟିଂ କରୁଥିବା ସମୟରେ ଏକ ଅଟୋ-ରିକ୍ସା ଦେଖିଲି । ଯାହା ଗଛତଲାରେ ଭରପୁର ଥିଲା । ସେହି ଅଟୋ ଚାଳକ ଉପରେ ମୁ ଗର୍ବିତ । ଯିଏ ଛୋଟ ପ୍ରୟାସ କରି ଦେଶରେ ଗୋ ଗ୍ରୀନକୁ ସମର୍ଥନ କରୁଛନ୍ତି।’
ପ୍ରକାଶ ଥାଉକି ନିକଟରେ ରିଲିଜ ହୋଇଥିବା ଅକ୍ଷୟଙ୍କ ମଲ୍ଟି ଷ୍ଟାରର ଫିଲ୍ମ ‘ମିଶନ ମଙ୍ଗଲ’ ସୁପରଡୁପର ହିଟ୍ ସାବ୍ୟସ୍ତ ହୋଇଥିଲା । ବର୍ତ୍ତମାନ ଅକ୍ଷୟଙ୍କ ହାତରେ ଚାରି, ପାଞ୍ଚୋଟି ଫିଲ୍ମ ରହିଅଛି । ଖୁବଶୀଘ୍ର ସେ ପରଦାରେ କମେଡି ଫିଲ୍ମ ‘ହାଉସଫୁଲ 4’ ଏବଂ ‘ଗୁଡନ୍ୟୁଜ’ ନେଇ ନଜର ଆସିବେ । ଖାଲି ଏତିକି ନୁହେଁ ଏହାସହ ସେ ରୋହିତ ସେଟ୍ଟୀଙ୍କ ‘ସୂର୍ଯ୍ୟବଂଶୀ’, ‘ଲକ୍ଷ୍ମୀବମ’, ‘ବଚ୍ଚନ ପାଣ୍ଡେ’ ଏବଂ ‘ପୃଥ୍ବୀରାଜ’ ଭଳି ଫିଲ୍ମରେ କାମ କରୁଛନ୍ତି ।
