ମୁମ୍ବାଇ: ‘ଜିରୋ’ ଫିଲ୍ମ ପରଠୁ ସୁନ୍ଦରୀ ଅଭିନେତ୍ରୀ ଅନୁଷ୍କା ଶର୍ମାଙ୍କୁ ଏଯାବତ ଅନ୍ୟ କୌଣସି ଫିଲ୍ମରେ ଦେଖିବାକୁ ମିଳିନାହିଁ । ହେଲେ ତାଙ୍କ ପ୍ରଯୋଜିତ ଫିଲ୍ମ ଦର୍ଶକଙ୍କ ମନ କିଣିବାରେ ଲାଗିଛି । ଗତ ଜାନୁୟାରୀରେ ସେ ବେବି ଗାର୍ଲଙ୍କୁ ଜନ୍ମ ଦେଇଥିଲେ । ଏବେ ଝିଅ ସହ ଘରେ ସମୟ ବିତାଉଛନ୍ତି । ହେଲେ ତାଙ୍କୁ ଦୀର୍ଘ ସମୟରୁ ପରଦାରେ ଦେଖିବାକୁ ଅନାଇ ବସିଥିବା ଫ୍ୟାନ୍ସଙ୍କ ପାଇଁ ସାମ୍ନାକୁ ଆସିଲା ନୈରାଶ୍ୟଜନକ ଖବର । କାରଣ ଅଭିନେତ୍ରୀ ନେଇଛନ୍ତି ବଡ ନିଷ୍ପତ୍ତି । ଯାହା ତାଙ୍କ ଫ୍ୟାନ୍ସଙ୍କୁ ନିରାଶ କରିଛି ।
କଥାଟି ହେଲା ଯେ ସେ ଝିଅର ଯତ୍ନ ନେବା ପାଇଁ ଅଭିନୟକୁ ଏବେ ବାଏ ବାଏ କରିଛନ୍ତି । ଆସନ୍ତା ବର୍ଷ ପର୍ଯ୍ୟନ୍ତ ସେ କୌଣସି ପ୍ରୋଜେକ୍ଟରେ କାମ କରିବେ ନାହିଁ । ସେ ନିଜ କାମରୁ ବ୍ରେକ ନେଇଛନ୍ତି । ଆଉ ନିଜ ଟିମକୁ ମନା କରିଦେଇଛନ୍ତି ଫିଲ୍ମରେ ସାଇନ କରିବାକୁ ।
ପ୍ରକାଶ ଥାଉକି ଅନୁଷ୍କା ନିଜ ପ୍ରଡକ୍ସନ କମ୍ପାନୀ ଜରିଆରେ ୱେବ ସିରିଜ ‘ପାତାଲ ଲୋକ’, ‘ବୁଲବୁଲ’ ୱେବ ଫିଲ୍ମ ଓ ସିରିଜ ନିର୍ମାଣ କରିସାରିଛନ୍ତି । ଯାହାକୁ ବେଶ୍ ସଫଳତା ହାସଲ କରିଛି । ତାଙ୍କ ଆଗାମୀ ପ୍ରଯୋଜିତ ଓ ସାକ୍ଷୀ ତନବରଙ୍କ ଫିଲ୍ମ ‘ମାଈ’ ଓ ‘ବାବିଲ ଖାନ’ଙ୍କ କାଲା ଖୁବଶୀଘ୍ର ରିଲିଜ ହେବାକୁ ଯାଉଛି । ଦିବଂଗତ ଅଭିନେତା ଇରଫାନ ଖାନଙ୍କ ପୁଅ ବାବିଲ ଏହି ଫିଲ୍ମ ଜରିଆରେ ଡେବ୍ୟୁ କରିବାକୁ ଯାଉଛନ୍ତି ।
