ମୁମ୍ବାଇ: ପ୍ରଥମଥର ପରଦାରେ ଜୁନିୟର ବଚ୍ଚନ ଅଭିଷେକ ବଚ୍ଚନ ଓ ଲୋକପ୍ରିୟ ଅଭିନେତା ରାଜକୁମାର ରାଓଙ୍କ ଯୋଡି ଦେଖିବାକୁ ମିଳିବ । ‘ମେଡ ଇନ ଚାଇନା’ ପରେ ରାଜକୁମାର ନିର୍ମାତା ଅନୁରାଗ ବାସୁଙ୍କ ଆଗାମୀ ଫିଲ୍ମରେ ନଜର ଆସିବେ । ଆଉ ଏହି ଫିଲ୍ମରେ ତାଙ୍କ ସାଥ ଦେବେ ଅଭିଷେକ । ଏହା ଏକ ମଲ୍ଟିଷ୍ଟାରର ଫିଲ୍ମ । ଏହି ଦୁଇଜଣଙ୍କ ବ୍ୟତୀତ ଫିଲ୍ମରେ ହ୍ୟାଣ୍ଡସମ ଆକ୍ଟର ଆଦିତ୍ୟ ରୟ କପୁର, ଫତିମା ସନା ସେଖ, ସନୟା ମଲହୋତ୍ରା ଓ ପଙ୍କଜ ତ୍ରିପାଠୀ ମଧ୍ୟ ମୁଖ୍ୟ ଭୂମିକାରେ ଅଭିନୟ କରିବେ ।
ଏଯାବତ ଫିଲ୍ମର ଟାଇଟଲ ଘୋଷଣା ହୋଇନାହିଁ । ‘ଦଙ୍ଗଲ’ ପରେ ଫତିମା ଓ ସନୟାଙ୍କ ପୁଣିଥରେ ଯୋଡି ଦେଖିବାକୁ ପାଇବେ ଦର୍ଶକ । ଏହି ଅନଟାଇଟଲ୍ଡ ଫିଲ୍ମକୁ ଆସନ୍ତା ବର୍ଷ ମାର୍ଚ୍ଚ 13ରେ ରିଲିଜ କରିବାର ଯୋଜନା କରିଛନ୍ତି ମେକର୍ସ ।
ଏହାର ସୂଚନା ଫିଲ୍ମ କ୍ରିଟିକ ଏବଂ ଟ୍ରେଡ ଆନାଲିଷ୍ଟ ତରଣ ଆଦର୍ଶ ଟ୍ବିଟରରେ ଦେଇଛନ୍ତି । ସେ ଫିଲ୍ମ ସେଟରୁ ଅନୁରାଗ, ଆଦିତ୍ୟ ଓ ସନୟାଙ୍କ ଏକ ଫଟୋ ସେୟାର କରି ଫିଲ୍ମରେ ଅଭିଷେକ ଓ ରାଜକୁମାରଙ୍କ ଏଣ୍ଟ୍ରି ବିଷୟରେ ଲେଖିଛନ୍ତି । ପ୍ରକାଶ ଥାଉକି, ଅଭିଷେକ ବର୍ତ୍ତମାନ କୁକି ଗୁଲାଟିଙ୍କ ଫିଲ୍ମ ‘ବିଗ ବୁଲ’ରେ ବ୍ୟସ୍ତ ଅଛନ୍ତି । ‘ବିଗ ବୁଲ’ରେ ଅଭିଷେକଙ୍କ ସହ ରୋମାନ୍ସ କରୁଥିବାର ନଜର ଆସିବେ ସେକ୍ସୀ ଅଭିନେତ୍ରୀ ଇଲିୟାନା ଡିକ୍ରୁଜ । ଏହାର ପ୍ରଯୋଜନା ଅଭିନେତା ଅଜୟ ଦେବଗନ କରୁଛନ୍ତି ।
