ନୂଆଦିଲ୍ଲୀ: ଜାତୀୟସ୍ତରରେ ଘରୋଇ ଫର୍ମଗୁଡିକୁ ସେମାନଙ୍କ ଅଧିକାର ମୁତାବକ ବଜାରରେ ପ୍ରତିଯୋଗିତା ଓ ଚାହିଦା ମୁତାବ ମୂଲ୍ୟ ଯୋଗାଇବା ପାଇଁ ନିକଟରେ କେନ୍ଦ୍ର ସରକାର ଅନେକ ପ୍ରଶଂସନୀୟ ପଦକ୍ଷେପ ଗ୍ରହଣ କରିଛନ୍ତି । ପ୍ରଥମେ 59ଟି ଚାଇନିଜ ଆପ୍କୁ କେନ୍ଦ୍ର ସରକାର ଦେଶରେ ବ୍ୟାନ କରିସାରିଥିବା ବେଳେ ଏବେ ଏହି ତାଲିକାରେ ସାମିଲ ହୋଇଛି ଆହୁରି 47ଟି ଚାଇନିଜ ଆପ୍ । ଯାହାକୁ ପ୍ରଶଂସା କରିଛି ଟେଲିକମ ଇକ୍ବିପମେଣ୍ଟ ମ୍ୟାନୁଫ୍ୟାକ୍ଚରର୍ସ ଆସୋସିଏସନ (ଟେମା) । ତେବେ କେବଳ ଆପ୍ ନୁହେଁ ଏଣିକି ଟେଲିକମ ପ୍ରଡକ୍ଟ ଉପରେ ମଧ୍ୟ କିଛି ନୂଆ ନିୟମ ଲାଗୁ ହୋଇଥିବା ମଧ୍ୟ ଟେମା ସ୍ପଷ୍ଟ କରିଛି ।
ଏନେଇ ଧାରା 275(1) ଅଧିନରେ ଏକ୍ସପେଣ୍ଡିଚର ବିଭାଗ(ଡିଓଇ) ନିଜ ଅଧିକାରର ପ୍ରୟୋଗ କରି ରାଜ୍ୟ ସରକାରମାନଙ୍କୁ କିଛି ନିୟମ କଡାକଡି ପାଇଁ ନିର୍ଦ୍ଦେଶ ଦେଇଛନ୍ତି । ଏହି ନିୟମ ଆଧାରରେ ଟେଲିକମ ପ୍ରଡକ୍ଟ ଗୁଡିକ କାର୍ଯ୍ୟକ୍ଷମ ହେବା ପୂର୍ବରୁ ସେଗୁଡିକୁ ଟେଷ୍ଟିଂ ପ୍ରକ୍ରିୟା ଦେଇ ଗତି କରିବାକୁ ହେବ । ଏଥିସହ ସମସ୍ତ ନୂଆ ଟେଣ୍ଡର ପାଇଁ ନୂଆ ନିୟମ ମଧ୍ୟ ପ୍ରସ୍ତୁତ କରାଯାଇଛି । ଏହା ଆଧାରରେ ଯଦି କୌଣସି ଚାଇନିଜ କମ୍ପାନୀ ଜେଇଏମରେ ନିଜ ପ୍ରଡକ୍ଟ ବିକ୍ରି କରିବାକୁ ଚାହାନ୍ତି, ତେବେ ସେମାନଙ୍କୁ ପ୍ରଥମେ ରେଜିଷ୍ଟର କରିବାକୁ ହେବ । ଏହା ସମସ୍ତ ମୋବାଇଲ ହ୍ୟାଣ୍ଡ ସେଟ୍ କମ୍ପାନୀ ଯଥା ଓପ୍ପୋ, ଭିଭୋ, ସାଓମି ଆଦି କମ୍ପାନୀ ପାଇଁ ଲାଗୁ ହେବା ନେଇ ସ୍ପଷ୍ଟ ହୋଇଛି ।
ଏନେଇ ଟେମା ଉପାଧ୍ୟକ୍ଷଙ୍କ କହିବା ଅନୁଯାୟୀ କେନ୍ଦ୍ର ସରକାରଙ୍କ ପଦକ୍ଷେପ ଦ୍ବାରା ଖୁବଶୀଘ୍ର ଜାତୀୟ ସୀମା ଓ ଡାଟା ଉପରେ ଅଙ୍କୁଶ ଲାଗିବ । ଯାହା ଉଭୟଙ୍କୁ ଅଧିକ ସୁରକ୍ଷା ଦେବ ଓ ଘରୋଇ ଫର୍ମଗୁଡିକୁ ନିଯୁକ୍ତି ସୁଯୋଗ ଯୋଗାଇବ ।
ସେପଟେ ଟେମା ସରକାରଙ୍କ ଏହି ନିଷ୍ପତ୍ତି ପରେ ପରେ ସମସ୍ତ ଘରୋଇ କମ୍ପାନୀମାନଙ୍କ ସୁବିଧା ପାଇଁ ପିପିପି ଏଆଇଆଇ ନିର୍ଦ୍ଦେଶକୁ ମଧ୍ୟ ଯଥାଶୀଘ୍ର ଲାଗୁ କରିବା ପାଇଁ ଅପିଲ କରିଛି । ଏହାଦ୍ବାରା ଭାରତ ଟେଲିକମ ମାନୁଫ୍ୟାକ୍ଚରିଂ କ୍ଷେତ୍ରରେ ଆତ୍ମନିର୍ଭରଶୀଳ ହୋଇପାରିବ ବୋଲି ଟେମା ମତ ପ୍ରକାଶ କରିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
