ହାଇଦ୍ରାବାଦ: ଦେଶରେ ମହିଳା ଓ ଯୁବତୀଙ୍କ ପ୍ରତି ଦୁଷ୍କର୍ମଜନିତ ଅପରାଧ ବଢି ଚାଲିଥିବାବେଳେ ଏଥିରେ ଆଉ ଏକ କଳଙ୍କିତ କାରନାମା ଯୋଡିଛନ୍ତି ଜଣେ ଯବାନ । ଦେଶକୁ ଶତ୍ରୁ କବଳରୁ ରକ୍ଷା କରିବା ପାଇଁ ଯେଉଁ ବର୍ଦ୍ଦି ପିନ୍ଧିଛନ୍ତି ସେଥିରେ ଲାଗିଛି କଳଙ୍କ । ଜଣେ 19 ବର୍ଷିୟା ଯୁବତୀଙ୍କୁ ଦୁଷ୍କର୍ମ କରିବା ପାଇଁ ପ୍ରୟାସ କରିଥିବା ଅଭିଯୋଗରେ ଗିରଫ ହୋଇଛନ୍ତି 32 ବର୍ଷିୟ ଜଣେ ଯବାନ ।
ପୋଲିସ ସୂଚନାନୁସାରେ ସିକନ୍ଦରାବାଦରେ ଥିବା ସିଗନାଲ୍ ରେଜିମେଣ୍ଟାରିରେ ଯବାନ ଜଣକର ପୋଷ୍ଟିଂ ହୋଇଥିଲା । ରାତିରେ ବର୍ଷା ହେଉଥିବା ଯୋଗୁଁ ପୀଡିତା ଓ ତାଙ୍କ ବୟଫ୍ରେଣ୍ଡ ଏକ ଛୋଟ ପାହାଡ ପାଖରେ ଥିବା ଗଛ ତଳେ ଆଶ୍ରୟ ନେଇଥିଲେ । ଏହି ସମୟରେ ସେଠାରେ ଥିବା ଅଭିଯୁକ୍ତ ଯବାନ ଜଣକ ପୀଡିତାଙ୍କ ସାଙ୍ଗକୁ ପିଟିବା ସହ ଯୁବତୀଙ୍କୁ ଟାଣି ନେଇ ଦୁଷ୍କର୍ମ କରିବାକୁ ପ୍ରୟାସ କରିଥିଲେ । ସେ ଯେତେବେଳେ ମୁକ୍ତି ପାଇଁ ଚେଷ୍ଟା କରିଥିଲେ ଯବାନ ଜଣକ ତାଙ୍କୁ ମଧ୍ୟ ମାଡ ମାରିଥିଲେ ।
ତେବେ ସେହି ସମୟରେ ପାଖରେ ଥିବା ରାସ୍ତାରେ ଯାଉଥିବା ଜଣେ ପୋଲିସ କନେଷ୍ଟବଳ ଯୁବତୀଙ୍କ ଚିତ୍କାର ଶୁଣି ଘଟଣାସ୍ଥଳକୁ ଦୌଡି ଆସିଥିଲେ । ତାଙ୍କୁ ଦେଖି ଅଭିଯୁକ୍ତ ଖସି ପଳାଇବାକୁ ଉଦ୍ୟମ କରିଥିଲେ । କିନ୍ତୁ କନେଷ୍ଟବଳ ତାଙ୍କର କେତେକ ସହକର୍ମୀଙ୍କ ସହ ଅଭିଯୁକ୍ତର ପିଛା କରିଥିଲେ । କିଛି ବାଟ ଦୌଡିବା ପରେ ଯବାନଙ୍କୁ ସେମାନେ କାବୁ କରିନେଇଥିଲେ । ଯବାନ ଜଣକ ଜଣେ କନେଷ୍ଟବଳକୁ ମାଡ ମାରିଥିଲେ ମଧ୍ୟ ତାଙ୍କୁ ପୋଲିସ ହେପାଜତକୁ ନିଆଯାଇଥିଲା ।
ପୋଲିସ ସୂଚନାନୁସାରେ ଅଭିଯୁକ୍ତ ଯବାନ ବିହାରର ଭାଗଲପୁରର । ଯୁବତୀ ଜଣକ ଏନେଇ ଏକ କେସ୍ ରୁଜୁ କରିବା ପରେ ପୋଲିସ ତାଙ୍କୁ ଗିରଫ କରିଛି । ଏହାସହ ତାଙ୍କୁ କୋର୍ଟରେ ହାଜର କରାଯିବା ପରେ ହାଜତକୁ ନିଆଯାଇଛି ।
