ଓ୍ବାସିଂଟନ: କୋରୋନା ସଂକ୍ରମିତ ହେଲେ ଆମେରିକା ରାଷ୍ଟ୍ରପତି ଜୋ' ବାଇଡେନଙ୍କ ପତ୍ନୀ ତଥା ପ୍ରଥମ ମହିଳା ଜିଲ ବାଇଡେନ । କୋରୋନାର ସାମାନ୍ୟ ଲକ୍ଷଣ ଜିଲ ବାଇଡେନଙ୍କ ଠାରେ ଦେଖା ଦେଇଥିବା ତାଙ୍କ କମ୍ୟୁନିକେସନ ଡିରେକ୍ଟର ଏଲିଜାବେଥ୍ ଆଲେକ୍ସଜାଣ୍ଡାର ଏକ ବିବୃତ୍ତିରେ କହିଛନ୍ତି । ଅନ୍ୟପଟେ ପତ୍ନୀ କୋରୋନା ସଂକ୍ରମିତ ହେବା ପରେ ରାଷ୍ଟ୍ରପତି ଜୋ ବାଇଡେନ ମଧ୍ୟ କୋରୋନା ପରୀକ୍ଷା କରିଥିଲେ, ରିପୋର୍ଟ କିନ୍ତୁ ନେଗେଟିଭ ଆସିଛି ।
ଏହା ମଧ୍ୟ ପଢନ୍ତୁ- ବାଇଡେନଙ୍କ ପତ୍ନୀଙ୍କୁ ପ୍ରଧାନମନ୍ତ୍ରୀଙ୍କ ଉପହାର, କ’ଣ ରହିଛି ଏହି ହୀରାର ବିଶେଷତ୍ବ
ବିବୃତ୍ତିରେ କୁହାଯାଇଛି ଯେ, ଜିଲ ବାଇଡେନ କୋରୋନା ସଂକ୍ରମିତ ହୋଇଛନ୍ତି । କୋରୋନାର ସାମାନ୍ୟ ଲକ୍ଷଣ ରହିଥିବାରୁ ବର୍ତ୍ତମାନ ସେ ଡେଲାୱେରର ରେହବୋଥ ବିଚ୍ରେ ଥିବା ଘରେ ରହିବେ । ରାଷ୍ଟ୍ରପତି ଜୋ ବାଇଡେନ ମଧ୍ୟ କୋରୋନା ପରୀକ୍ଷା କରିଥିଲେ । କିନ୍ତୁ ତାଙ୍କ ରିପୋର୍ଟ ନେଗେଟିଭ ଆସିଛି । ହ୍ବାଇଟ୍ ହାଉସ ପକ୍ଷରୁ ପ୍ରକାଶିତ ଏକ ବିଜ୍ଞପ୍ତିରେ କୁହାଯାଇଛି ଯେ, ଜିଲ ବାଇଡେନଙ୍କ କୋରୋନା ରିପୋର୍ଟ ପଜିଟିଭ ଆସିବା ପରେ ରାଷ୍ଟ୍ରପତି ଜୋ ବାଇଡେନ ମଧ୍ୟ ଗତ ସନ୍ଧ୍ୟାରେ କୋଭିଡ ପରୀକ୍ଷା କରିଥିଲେ । କିନ୍ତୁ ତାଙ୍କ ରିପୋର୍ଟ ନେଗେଟିଭ ଆସିଛି । ଆସନ୍ତା ଏକ ସପ୍ତାହ ପର୍ଯ୍ୟନ୍ତ ରାଷ୍ଟ୍ରପତି ନିୟମିତ କୋରୋନା ପରୀକ୍ଷା କରିବେ । ବର୍ତ୍ତମାନ ଆମେରିକାରେ କୋରୋନା ସଂକ୍ରମଣ ବୃଦ୍ଧି ହେବାରେ ଲାଗିଛି। ଏନେକ ଲୋକ ହସ୍ପିଟାଲ୍ରେ ମଧ୍ୟ ଭର୍ତ୍ତି ହୋଇଛନ୍ତି । ସେହିପରି କୋରୋନାର ନୂଆ ଭାରିଆଣ୍ଟ୍ EG.5 ସଂକ୍ରମଣ ମଧ୍ୟ ବୃଦ୍ଧି ହେବାରେ ଲାଗିଛି ।
ଏହା ମଧ୍ୟ ପଢନ୍ତୁ-G20 summit: ୮ରେ ମୋଦି-ବାଇଡେନଙ୍କ ମଧ୍ୟରେ ଦ୍ବିପାକ୍ଷିକ ଆଲୋଚନା
ତେବେ ଆସନ୍ତା 9 ତାରିଖରୁ ଭାରତରେ ଆରମ୍ଭ ହେବ ଜି-20 ସମ୍ମିଳନୀ। ସମ୍ମିଳନୀରେ ଯୋଗ ଦେବାକୁ ଆସନ୍ତା 7 ତାରିଖରୁ 4 ଦିନିଆ ଭାରତ ଆସିବେ ଆମେରିକା ରାଷ୍ଟ୍ରପତି ଜୋ ବାଇଡେନ । ଏନେଇ ହ୍ବାଇଟ୍ ହାଉସ ପକ୍ଷରୁ ସୂଚନା ଦିଆଯାଇଥିଲା । ଏହା ପୂର୍ବରୁ ଆସନ୍ତା 8 ତାରିଖରେ ଦିନ ପ୍ରଧାନମନ୍ତ୍ରୀ ମୋଦି ଓ ବାଇଡେନଙ୍କ ମଧ୍ୟରେ ଦ୍ବିପାକ୍ଷିକ ଆଲୋଚନା ହେବ । ଏହାପରେ 9 ତାରିଖରେ ଜି 20 ସମ୍ମିଳନୀରେ ଅଂଶ ଗ୍ରହଣ କରିବେ ଆମେରିକା ରାଷ୍ଟ୍ରପତି । ହ୍ବାଇଟ୍ ହାଉସ୍ର ଜାତୀୟ ସୁରକ୍ଷା ପରାମର୍ଶଦାତା ଜେ.କେ ସୁଲିଭାନ ମଙ୍ଗଳବାର ରାଷ୍ଟ୍ରପତି ବାଇଡେନଙ୍କ ଭାରତ ଗସ୍ତ ସମ୍ପର୍କରେ ଘୋଷଣା କରିଥିଲେ । ତେବେ ଜିଲ୍ ବାଇଡେନ କୋରୋନା ସଂକ୍ରମିତ ହେବା ପରେ ଏହା ବାଇଡେନଙ୍କ ଭାରତ ଗସ୍ତ ଉପରେ ପ୍ରଭାବ ପକାଇ ପାରେ ବୋଲି ଆଶଙ୍କା କରାଯାଉଛି ।
