ବେଜିଂ: ଚୀନର ରାଜଧାନୀର ବେଜିଂର ଏକ ହସ୍ପିଟାଲରେ ଭୟାବହ ଅଗ୍ନିକାଣ୍ଡ । ଏଥିରେ ୨୧ଜଣଙ୍କ ମୃତ୍ୟୁ ହୋଇଥିବା ଜଣାପଡିଛି । ଗତକାଲି(ମଙ୍ଗଳବାର) ବେଜିଂର ଚାଙ୍ଗପେଙ୍ଗ ହସ୍ପିଟାଲର ଇନପେସେଣ୍ଟ ବିଭାଗରେ ନିଆଁ ଲାଗିଥିଲା । ଏନେଇ ସ୍ଥାନୀୟ ଗଣମାଧ୍ୟମ ପକ୍ଷରୁ ସୂଚନା ଦିଆଯାଇଛି ।
ସୂଚନା ଅନୁସାରେ, ଫେଙ୍ଗଟାଇ ଜିଲ୍ଲାର ଚାଙ୍ଗପେଙ୍ଗ ହସ୍ପିଟାଲରେ ମଙ୍ଗଳବାର ଅପରାହ୍ନ ପାଖାପାଖି ୧ଟା ସମୟରେ ନିଆଁ ଲାଗିଯାଇଥିଲା । ଫଳରେ ଭୟଭୀତ ହୋଇ ରୋଗୀମାନେ ଦୌଡିବାକୁ ଲାଗିଥିଲେ । ଖବରପାଇ ଅଗ୍ନିଶମ ବାହିନୀ ଏବଂ ଉଦ୍ଧାରକାରୀ ଦଳ ଘଟଣାସ୍ଥଳରେ ପହଞ୍ଚି ଉଦ୍ଧାରକାର୍ଯ୍ୟ ଆରମ୍ଭ କରିଥିଲେ । ସଙ୍ଗେସଙ୍ଗେ ୭୧ ଜଣ ରୋଗୀଙ୍କୁ ଉଦ୍ଧାର କରାଯାଇ ଅନ୍ୟତ୍ର ସ୍ଥାନାନ୍ତର କରାଯାଇଥିଲା । ଗତକାଲି(ମଙ୍ଗଳବାର) ସନ୍ଧ୍ୟା ୬ଟା ସୁଦ୍ଧା ୨୧ଜଣଙ୍କ ମୃତ୍ୟୁ ହୋଇଥିବା ନେଇ ସୂଚନା ଦିଆଯାଇଥିଲା । ଅଗ୍ନିକାଣ୍ଡର କାରଣ ସ୍ପଷ୍ଟ ହୋଇନଥିବା ବେଳେ ତଦନ୍ତ ଜାରି ରହିଥିବା ନେଇ ସ୍ଥାନୀୟ ଗଣମାଧ୍ୟମର ରିପୋର୍ଟରେ ପ୍ରକାଶ ପାଇଥିଲା ।
ତେବେ ହସ୍ପିଟାଲରେ ନିଆଁ ଲାଗିଥିବା ସମୟରେ କିଛି ୟୁଜର୍ସର ସୋସିଆଲ ମିଡିଆରେ ଭିଡିଓ ପୋଷ୍ଟ କରିଛନ୍ତି । କିଛି ଲୋକେ ନିଜ ଜୀବନ ବଞ୍ଚାଇବା ପାଇଁ ହସ୍ପିଟାଲ ଝରକା ଦେଇ ଡେଇଁ ପଡିଥିବା ଦେଖାଦେଇଛି । ତେବେ ନିଆଁ ଆଁରେ ହସ୍ପିଟାଲର ଅନେକ କ୍ଷତିକ୍ଷତି ହୋଇ ହୋଇଛି । ଯନ୍ତ୍ରାଶଂ ଜଳିପୋଡି ଯାଇଛି । ହସ୍ପିଟାଲରୁ ଉଦ୍ଧାର କରି ଅନ୍ୟ ହସ୍ପିଟାଲରେ ଭର୍ତ୍ତି କରାଯାଇଥିବା ବେଳେ ୨୧ଜଣଙ୍କୁ ମୃତ ଘୋଷଣା କରାଯାଇଥିଲା । ହସ୍ପିଟାଲରେ ନିଆଁ ଲାଗିବା କାରଣରୁ ୨୫ ମିନିଟ ଯାଏଁ ଗାଡି ଚଳାଚଳ ସମ୍ପୂର୍ଣ୍ଣ ବନ୍ଦ ରହିଥିଲା । ତେବେ ବର୍ତ୍ତମାନ ସୁଦ୍ଧା ଅଗ୍ନିକାଣ୍ଡର କାରଣ ସ୍ପଷ୍ଟ ହୋଇନଥିବା ବେଳେ ମୃତ୍ୟୁ ସଂଖ୍ୟା ମଧ୍ୟ ବୃଦ୍ଧି ହୋଇପାରେ ବୋଲି ଅନୁମାନ କରାଯାଉଛି ।
ପ୍ରକାଶଥାଉକି, ଗତ ୧୬ ତାରିଖ ଦିନ ଦୁବାଇର ଏକ କୋଠାରେ ନିଆଁ ଲାଗିଯାଇଥିଲା । ନିଆଁ ଆଁରେ ୧୬ଜଣଙ୍କ ମୃତ୍ୟୁ ହୋଇଥିବା ବେଳେ ୯ଜଣ ଆହତ ହୋଇଥିଲେ । ତେବେ ମୃତକଙ୍କ ମଧ୍ୟରେ ୪ ଜଣ ଭାରତୀୟ ରହିଥିଲେ । ନିଆଁର ପ୍ରକୋପ ଏତେ ମାତ୍ରାରେ ରହିଥିଲା ଯେ, ଲୋକେ ବାହାରକୁ ବାହିରି ନପାରି ପ୍ରାଣ ହରାଇଥିଲେ ।
