ଜେରୁସେଲମ: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ମଧ୍ୟପୂର୍ବ ଶାନ୍ତି ଚୁକ୍ତି ମୁତାବକ ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ ନେତାନ୍ୟାହୁ ପାଲେଷ୍ଟାଇନ ସହ ବୁଝାମଣା କରିବା ପାଇଁ ପ୍ରସ୍ତୁତ ହୋଇଛନ୍ତି । ଆମେରିକାସ୍ଥିତ ଇସ୍ରାଏଲ ସମର୍ଥନକାରୀ ଖ୍ରୀଷ୍ଟ ଧର୍ମାବଲମ୍ବୀ ଦଳ ଆୟୋଜିତ କରିଥିବା ‘ଖ୍ରୀଷ୍ଟିଆନ୍ସ ୟୁନାଇଟେଡ ଫର୍ ଇସ୍ରାଏଲ’ ଆଲୋଚନାଚକ୍ରରେ ନେତାନ୍ୟାହୁ ଏନେଇ ସ୍ପଷ୍ଟ କରିଛନ୍ତି । ତେବେ ରବିବାର ବିଳମ୍ବିତ ରାତିରେ ଏନେଇ ନେତାନ୍ୟାହୁ ଆଗୁଆ ଏକ ରେକର୍ଡିଂ କରି ଏହି ସୂଚନା ଦେଇଥିବା ଜଣା ପଡିଛି ।
ଜୁଲାଇ 1ରୁ ଇସ୍ରାଏଲ ଏହାର ପଶ୍ଚିମାଞ୍ଚଳରେ ଆଧିପତ୍ୟ ବିସ୍ତାର କରିବା ନେଇ ଘୋଷଣା କରିଥିବା ବେଳେ ଏହାର ଠିକ୍ ଦୁଇ ଦିନ ପୂର୍ବରୁ ପାଲେଷ୍ଟାଇନ ସହ ବୁଝାମଣା ନେଇ ଇସ୍ରାଏଲ ପୁଣି ସୂଚନା ଦେଇଛି । ତେବେ ଏହି ବୁଝାମଣା ନେଇ ନେତାନ୍ୟାହୁ କହିଛନ୍ତି କି ପୁଣି ଏକ ସୁଯୋଗ ଯେପରି ହାତଛଡା ନହୁଏ ସେଥିପାଇଁ ପାଲେଷ୍ଟାଇନ ଏଥର ସାବଧାନ ହେବା ଦରକାର । ସେମାନେ ଏହି ଐତିହାସିକ ଚୁକ୍ତିର ପାଳନ ପାଇଁ କେତେକ ବୁଝାମଣା କରିବା ପାଇଁ ପ୍ରସ୍ତୁତ ରହିବା ଦରକାର । ଯାହା ଇସ୍ରାଏଲ ସମେତ ପାଲେଷ୍ଟାଇନରେ ମଧ୍ୟ ଶାନ୍ତିର ବାତାବରଣ ସୃଷ୍ଟି କରିବ ।
