ଦୁବାଇ: ବିଶ୍ବର ସବୁଠାରୁ ବ୍ୟସ୍ତବହୁଳ ଅନ୍ତର୍ଜାତୀୟ ବିମାନବନ୍ଦର ଜଳ ପ୍ଲାବିତ । ଦୁବାଇରେ ଗଲା 24 ଘଣ୍ଟା ଧରି ଲଗାତାର ଭୀଷଣ ବର୍ଷା ଫଳରେ ବିମାନ ଦୁବାଇ ଇଣ୍ଟରନ୍ୟାସନାଲ ଏୟାରପୋର୍ଟରେ ବିମାନ ଚଳାଚଳ ବାଧାପ୍ରାପ୍ତ ହୋଇଛି । ବିମାନ ବନ୍ଦରର ଚତୁର୍ଦ୍ଦିଗ ଜଳବନ୍ଦୀ । ବିମାନ ବନ୍ଦର ବଢି କାରଣରୁ ପାଖାପାଖି 300ରୁ ଉର୍ଦ୍ଧ୍ବ ଭାରତୀୟ ଫସି ରହିଥିବା ସୂଚନା ରହିଛି ।
ବିମାନ ବନ୍ଦରର ଜଳମୟ ପ୍ରଭାବରେ ଏକାଧିକ ବିମାନ ଉଡାଣକୁ ରଦ୍ଦ କରିଦିଆଯାଇଛି । ସେହପରି ଅନେକ ପ୍ଲେନର ରୁଟରେ ପରିବର୍ତ୍ତନ କରାଯାଇଛି । ଏଥିସହ ଅନେକ ଫ୍ଲାଇଟ 12ରୁ 14 ଘଣ୍ଟା ବିଳମ୍ବରେ ଉଡାଣ ଭରିଥିବା ସୂଚନା ରହିଛି । ଅନ୍ୟପଟେ ଏୟାର ଇଣ୍ଡିଆ ମୁଖପାତ୍ର ଧନଞ୍ଜୟ କୁମାର କହିଛନ୍ତି, ପ୍ରବଳ ବର୍ଷା ଫଳରେ ଦୁବାଇ ଅନ୍ତର୍ଜାତୀୟ ବିମାନ ବନ୍ଦର ଜଳାର୍ଣ୍ଣବ । ଏହାକୁ ଆଖି ଆଗରେ ରଖି ଏୟାର ଇଣ୍ଡିଆ ଦୁବାଇ ଯିବାକୁ ଥିବା ଏୟାର ଇଣ୍ଡିଆର 4ଟି ବିମାନ ଉଡାଣକୁ ବାତିଲ କରିଥିବା ସୂଚନା ଦେଇଛନ୍ତି ।
ଦୁବାଇ ଇଣ୍ଟରନ୍ୟାସନାଲ ଏୟାରପୋର୍ଟରେ ଫସି ରହିଥିବ ଅନେକ ଭାରତୀୟଙ୍କୁ ଆମେରିକା ଯିବା ପାଇଁ ବିମାନ ସେବା ଉପଲବ୍ଧ ହୋଇପାରିନାହିଁ । ଏମିରେଟସ୍ ନିଜ ଯାତ୍ରୀଙ୍କ ପାଇଁ ନିର୍ଦ୍ଦେଶନାମା ଜାରି କରିଛି । ପ୍ରବଳ ବର୍ଷା ଫଳରେ ବିମାନ ଚଳାଚଳ ବାଧାଗ୍ରସ୍ତ ରହିଛି । ଯାତ୍ରୀ ମାନଙ୍କ ନିମନ୍ତେ ବୈକଳ୍ପିକ ବ୍ୟବସ୍ଥା ଗ୍ରହଣ କରାଯିବ ବୋଲି ପ୍ରତିଶ୍ରୁତି ମିଳିଛି । ସୋସିଆଲ ମିଡିଆରେ ଏୟାରପୋର୍ଟର ରନୱେ ବୁଡି ଯାଇଥିବା ଭିଡିଓ ଅପଲୋଡ କରାଯାଇଛି ।
