କାନବେରା: 2019-20ରେ ଅଷ୍ଟ୍ରେଲିଆରେ ବିଧ୍ବଂସକାରୀ ଲୀଳା ସୃଷ୍ଟି କରିଥିଲା ବୁଶଫାୟାର ବା ଜଙ୍ଗଲରେ ନିଆଁ ଘଟଣା । ଆଖି ପିଛୁଳାକେ ଘଟଣାରେ ଲକ୍ଷ ଲକ୍ଷ ଏକରର ଜଙ୍ଗଲ ଜମି ନଷ୍ଟ ହୋଇଥିବା ବେଳେ ହଜାର ହଜାର ବନ୍ୟଜନ୍ତୁ ଏଥିରେ ପ୍ରାଣ ହରାଇଥିଲେ । ଏହି ବୁଶ ଫାୟାର ଯୋଗୁଁ ବିଷାକ୍ତ ଧୂଆଁ ବଳୟରେ ଆସି ପ୍ରାୟ 445 ଜଣ ମଣିଷ ମଧ୍ୟ ରୋଗାଗ୍ରସ୍ତ ହୋଇଥିବା ଜଣା ପଡିଛି । ଏହି ବିପଦରୁ ଅଷ୍ଟ୍ରେଲିଆକୁ ମୁକ୍ତି ପାଇଁ ସାରା ବିଶ୍ବରୁ ଛୁଟିଥିଲା ସହାୟତାର ସୁଅ ।
କୋଟି କୋଟି ଟଙ୍କାର ସହାୟତା ବୁଶଫାୟାର ରିକଭରି ଫଣ୍ଡରେ ଜମା ହୋଇଥିଲା । ହେଲେ ଏହାକୁ ସମ୍ପୂର୍ଣ୍ଣ ବିଫଳ ବୋଲି ଗୁରୁବାର ଆକ୍ଷେପ କରିଛନ୍ତି ବିରୋଧୀ ନେତା ଆନ୍ଥୋନୀ ଆଲବାନିଜ । ବିରୋଧୀ ଶ୍ରମିକ ଦଳର ନେତା ଆନ୍ଥୋନୀ ଏହା କହିଛନ୍ତି କି ଜାତୀୟ ବୁଶଫାୟାର ରିକଭରି ଫଣ୍ଡରେ ଜମା ହୋଇଥିବା 2 ବିଲିୟନ ଅଷ୍ଟ୍ରେଲିଆନ ଡଲାର ବା 1.3 ବିଲିୟନ ଆମେରିକୀୟ ଡଲାରର ଅର୍ଥ ରାଶି ସରକାରଙ୍କର ଏକ ବିଫଳ ଯୋଜନା । ବୁଶଫାୟାର ଦ୍ବାରା ପ୍ରଭାବିତ ଅଞ୍ଚଳରେ ରହୁଥିବା ଲୋକଙ୍କ ମଧ୍ୟରୁ ମାତ୍ର 4 ପ୍ରତିଶତ ଲୋକେ ଏହି ଫଣ୍ଡରୁ ଅନୁକମ୍ପା ରାଶି ପାଇପାରିଥିବାରୁ ଏହି ଯୋଜନାକୁ ବିଫଳ କହିଛନ୍ତି ଆନ୍ଥୋନୀ ।
ସୂଚନା ଅନୁଯାୟୀ ଜାନୁଆରୀ ମାସରେ ପ୍ରଧାନମନ୍ତ୍ରୀ ସ୍କଟ ମୋରିସନ ଏହି ଜାତୀୟ ରିକଭରି ଫଣ୍ଡ ପାଇଁ ଘୋଷଣା କରିଥିଲେ । ଏହାର ଲକ୍ଷ୍ୟ ଥିଲା ସଂଗୃହିତ ଅର୍ଥରୁ ପ୍ରଭାବିତ ଜଙ୍ଗଲ ଓ ମାନବ ଜମିରେ ସୁଧାର ଆଣିବା । ପ୍ରଭାବିତ ଲୋକଙ୍କୁ ଅନୁକମ୍ପା ରାଶି ଯୋଗାଇବା ସହ ଜଙ୍ଗଲ ସୃଷ୍ଟି କରିବା । ତେବେ ମଙ୍ଗଳବାର ଏହି ରିକଭରି ଏଜନ୍ସିର ଡେପୁଟି ସହଯୋଗୀ ଆଣ୍ଡ୍ରିୟୁ ହକିଂ ସିନେଟରେ କହିଥିଲେ କି ପ୍ରଭାବିତ 7.1 ମିଲିୟନ ଲୋକଙ୍କ ମଧ୍ୟରୁ ଏଯାବତ୍ କେବଳ 2,91,000 ଲୋକେ ଅନୁକମ୍ପା ରାଶି ପାଇପାରିଛନ୍ତି ।
@IANS
