ସାନା: ୟେମେନ ଉପରେ ଭାରି ପଡିବାରେ ଲାଗିଛି କୋରୋନା ମହାମାରୀ । ଯୁଦ୍ଧରୁ ମୁକ୍ତି ପରେ ୟେମେନର ସ୍ବାସ୍ଥ୍ୟ ସୁବିଧା ଓ ଆର୍ଥିକ ଅବସ୍ଥା ନଇଁ ପଡିଥିବା ବେଳେ କୋରୋନା ମାଡରେ ଆଣ୍ଠେଇବାକୁ ବସିଛି ୟେମେନ । ୟୁନିସେଫ ଦ୍ବାରା ନିକଟରେ ପ୍ରକାଶିତ ଏକ ରିପୋର୍ଟ ମୁତାବକ ୟେମେନରେ କୋରୋନା ମହାମାରୀ ପରେ ପ୍ରାୟ 2.4 ମିଲିୟନ 5ବର୍ଷରୁ କମ୍ ଶିଶୁ ଅନାହାର ଦେଇ ଗତି କରୁଛନ୍ତି ।
ୟେମେନରେ ଆବଶ୍ୟକୀୟ ସାମଗ୍ରୀର ଅଭାବ ଓ ରୋଜଗାରର ଅଭାବ ଯୋଗୁଁ ଶିଶୁମାନେ ଖାଦ୍ୟାଭାବ ଭଳି ପରିସ୍ଥିତିର ସମ୍ମୁଖୀନ ହେଉଥିବା ଦେଖାଯାଉଛି । ତେବେ ଯଦି ଏପରି ସ୍ଥିତି ଲାଗି ରୁହେ ତେବେ ଆଗାମୀ 6 ମାସ ମଧ୍ୟରେ ପ୍ରାୟ 30,000 ୟେମେନର ଶିଶୁମାନେ ଗମ୍ଭୀର ସ୍ବାସ୍ଥ୍ୟ ସମସ୍ୟା ବା ଅପପୁଷ୍ଟିରେ ପୀଡିତ ହେବେ । ୟେମେନରେ ଖାଦ୍ୟ ସୁରକ୍ଷା ଅପହଞ୍ଚ ଥିବା ବେଳେ ଅଧାରୁ ଅଧିକ ସ୍ବାସ୍ଥ୍ୟ ସେବା ଅକର୍ମଣୀୟ ହୋଇ ବନ୍ଦ ପଡି ରହିଛି । ନା ଅଛି ଔଷଧର ସୁବିଧା ନା ସେବା ଯୋଗାଇବା ପାଇଁ ଅଛନ୍ତି ପର୍ଯ୍ୟାପ୍ତ କର୍ମୀ ।
ଏନେଇ ୟୁନିସେଫରେ ୟେମେନର ପ୍ରତିନିଧିତ୍ବ କରୁଥିବା ସାରା ବେସୋଲୋ କହିଛନ୍ତି କି ଯଦି ବର୍ତ୍ତମାନ ସମୟରେ ୟେମେନରେ ଶିଶୁଙ୍କ ସ୍ବାସ୍ଥ୍ୟ ପ୍ରତି ଧ୍ୟାନ ନଦିଆଯାଏ, ତେବେ ଆଗକୁ ଯାଇ ଆର୍ଥିକ, ସ୍ବାସ୍ଥ୍ୟଗତ ଓ ଗମ୍ଭୀର ସମସ୍ୟା ଦେଇ ଗତି କରୁଥିବା ଦେଶ ପାଇଁ ଶିଶୁଙ୍କ ଯତ୍ନ ଆବଶ୍ୟକୀୟ ନୁହେଁ ବୋଲି ବିଶ୍ବ ଦରବାରରେ କୁହାଯିବ । ସେପଟେ ୟେମେନରେ ଲାଗି ରହିଥିବା ସମସ୍ୟାର ସମାଧାନ ପାଇଁ ୟୁନିସେଫ ଦୁଇଟି ଫଣ୍ଡ ଆରମ୍ଭ କରିଛି । ଗୋଟିଏ ହେଉଛି ମୌଳିକ ସୁବିଧା ଯୋଗାଣକାରୀ ଫଣ୍ଡ, ଅନ୍ୟଟି ହେଉଛି କୋରୋନା ସହ ମୁକାବିଲା ପାଇଁ ଫଣ୍ଡ ।
ମୌଳିକ ସୁବିଧା ପାଇଁ 461 ମିଲିୟନ ଡଲାରର ଆବଶ୍ୟକତା ରହିଥିବା ବେଳେ ବର୍ତ୍ତମାନ ସୁଦ୍ଧା ଏହାର 39 ପ୍ରତିଶତ ଅର୍ଥ ସଂଗ୍ରହ ହୋଇପାରିଛି । ସେପଟେ କୋରୋନା ମୁକାବିଲା ପାଇଁ ଅତ୍ୟଧିକ 53 ମିଲିୟନ ଡଲାର ମଧ୍ୟରୁ ଏଯାବତ୍ ମାତ୍ର 10 ପ୍ରତିଶତ ଅର୍ଥ ସଂଗ୍ରହ କରାଯାଇପାରିଛି । ୟୁନିସେଫର ଅନ୍ୟ ଏକ ରିପୋର୍ଟ ମୁତାବକ ୟେମେନରେ 9.58 ମିଲିୟନ ଶିଶୁଙ୍କୁ ପାନୀୟ ଜଳ ମିଳୁନଥିବା ବେଳେ 7.8 ମିଲିୟନ ଶିଶୁ ଶିକ୍ଷାରୁ ବଞ୍ଚିତ । ସେପଟେ ପ୍ରାୟ 3487ଜଣ ଶିଶୁ ଗତ 5 ବର୍ଷ ହେବ ୟେମେନ ସେନା କ୍ୟାମ୍ପରେ ସହଯୋଗୀ ଭାବେ କାର୍ଯ୍ୟ କରିଆସୁଛନ୍ତି ।
ବର୍ତ୍ତମାନ ସୁଦ୍ଧା ୟେମେନରେ କୋରୋନା ଆକ୍ରାନ୍ତ ସଂଖ୍ୟା 1076 ରହିଥିବା ବେଳେ ମୃତ୍ୟୁ ସଂଖ୍ୟା 288 ରେକର୍ଡ କରାଯାଇଛି ।
@IANS
