ଲଣ୍ଡନ: କୋରୋନା ମହାମାରୀ ପ୍ରଭାବରେ ବ୍ରିଟିଶ ଅର୍ଥନୀତି ଦୁର୍ବଳ ହୋଇ ପଡିଥିବା ବେଳେ ଧିରେ ଧିରେ ସ୍ଥିତିରେ ସୁଧାର ଆସିବା ସହ ଅର୍ଥନୀତିକୁ ସଳଖିବା ପାଇଁ ଯୋଜନା ପ୍ରସ୍ତୁତିରେ ଲାଗି ପଡିଛନ୍ତି ପ୍ରଧାନମନ୍ତ୍ରୀ ବୋରିଶ ଜନଶନ । 10 ବର୍ଷ ତଳେ ଦେଶରେ ସରକାରୀ ଯୋଜନା ବିଫଳ ହେବାରୁ ଆର୍ଥିକ ଅନଟନ ପରିସ୍ଥିତି ସୃଷ୍ଟି ହୋଇଥିଲା । ଏହା ଯେପରି ପୁଣି ନ ଦୋହରେ ସେଥିପାଇଁ ବୋରିଶ ଦୃଢ ପ୍ରତିଜ୍ଞାବଦ୍ଧ ବୋଲି ରବିବାର ସ୍ପଷ୍ଟ କରିଛନ୍ତି ।
ବର୍ତ୍ତମାନ ସମୟରେ ଅର୍ଥନୀତିକୁ ସଳଖିବା ପାଇଁ ନୂଆ ଯୋଜନାର ପ୍ରସ୍ତୁତି ଓ ଭିତ୍ତିଭୂମିରେ ପରିବର୍ତ୍ତନ କରିବାର ଆବଶ୍ୟକ ଥିବା ବୋରିଶ କହିଛନ୍ତି । ଏପ୍ରିଲ ମାସରେ ଦେଶଚର ଅର୍ଥନୀତିରେ 20.4 ପ୍ରତିଶତ ହ୍ରାସ ପରିଲକ୍ଷିତ ହେବା ପରେ ବୋରିଶ ଅଧିକ ସଚେତନା ହୋଇ ଏ ଦିଗରେ ଗୁରୁତ୍ବାରୋପ କରିଥିବା ଦେଖାଯାଇଛି । ଦେଶରେ କୋରାନ ବିତ୍ପାତ୍ତ ସତ୍ତ୍ବେ ସରକାର ଯେପରି ପୁଣି ଅଣ୍ଟା ସଳଖିଛି ସେଥିପାଇଁ ପ୍ରତ୍ୟେକ ବିଭାଗୀୟ ଅଧିକାରୀ ଓ ଦେଶବାସୀଙ୍କୁ ବୋରିଶ ଧନ୍ୟବାଦ ମଧ୍ୟ ଜଣାଇଛନ୍ତି ।
ବୋରିଶ ଦେଶବାସୀଙ୍କୁ ଆଶ୍ବସ୍ତ କରି କହିଛନ୍ତି କି ଦେଶରେ 10 ବର୍ଷ ପୁରୁଣା ସ୍ଥିତି ପୁଣି ସୃଷ୍ଟି ହେବ ନାହିଁ । ଏଥିପାଇଁ ଯୁଦ୍ଧକାଳୀନ ଭିତ୍ତିରେ ବିଭିନ୍ନ ଦିଗରେ କାର୍ଯ୍ୟ ଆରମ୍ଭ ହୋଇଛି । ସ୍ବାସ୍ଥ୍ୟ, ଶିକ୍ଷା ଓ ଅନ୍ୟ ଆବଶ୍ୟକୀୟ ଅଧିକାର କ୍ଷେତ୍ରରେ ଦେଶବାସୀ କିପରି ଭରପୂର ସୁବିଧା ପାଇପାରିବେ ସେନେଇ ଆଲୋଚନା ଜାରି ରହିଛି । ଖୁବଶୀଘ୍ର ଏନେଇ ଯୋଜନା ପ୍ରସ୍ତୁତ ହେବ ବୋଲି ମଧ୍ୟ ବୋରିଶ ସ୍ପଷ୍ଟ କରିଛନ୍ତି ।
@IANS
